Almaniya şirkətlərin və işçilərin pandemiyadan qurtulmasına kömək etmək üçün ötən həftə 750 milyard avroluq koronavirusla mübarizə paketi hazırlayıb. Bunun ardınca ölkə epidemiyadan sonrakı dövr üçün də planlar qurmağa başlayıb.
Cebhe.info xəbər verir ki, Almaniyanın maliyyə naziri Olar Şolts artıq koronavirus epidemiyası səbəbilə yaranacaq iqtisadi böhranı aradan qaldırmaq üçün tədbirlər görür. "Şpigel” jurnalında yer alan xəbərə görə, Şolts böhranın "ikinci mərhələsi" adlandırılan koronavirus pandemiyasından sonrakı dövrdə şirkət və müəssisələrin daha sürətli yaxşılaşmasına töhfə vermək məqsədilə 50 milyard avro dəyərində bir təşviqat planını həyata keçirməyi planlaşdırır. Xəbərlərdə şirkətlərə iqtisadi stimullarla yanaşı, əlavə dövlət sərmayələrinin də konyuktura planına daxil olduğu bildirilir. Təşviq proqramı sığınacaq axtaranlar və miqrantlar üçün ayrılan, lakin ehtiyac olmadığı üçün istifadə edilməyən ehtiyatlardan maliyyələşdiriləcək. Hesabatda eyni zamanda dövlət sərmayələri ilə yanaşı, özəl investisiyaları da gücləndirmək üçün investisiya qrantları və endirimlərin də gündəmdə olduğu ifadə edilib.
"Şpigel"in məlumatına görə, Şolts hazırda təqdim edilən dövlət yardımının korona böhranından sonra da bir müddət davam etməsini müdafiə edir: "Ən pis şey böhran zamanı böhrana qarşı xəsislik etməkdir. Əksini etməyə məcburuq".
Xatırladaq ki, martın 25-də Federal Məclis koronavirusa qarşı hökumətin iqtisadiyyatı dəstəkləmək üçün hazırladığı 750 milyard avroluq tarixi xilas etmə paketini təsdiqləyib. İqtisadi yardım paketi hökumətin 2013-cü ildən bəri ilk dəfə 156 milyard avroluq borca düşməsini proqnozlaşdırır. Bu rəqəm Almaniya büdcəsinin demək olar ki, yarısını təşkil edir.
Səyad Həsənli
