Suraxanı Ağciyər Xəstəlikləri Mərkəzinin tabeliyində olan Doğum Evinin Baş həkimi Zalxa Osmanova xəstəxananın təmiri adı altında tibbi personalın hamısını pul verməyə məcbur edir. Bu haqda saytımıza xəstəxananın həkim və tibb bacılarından şikayət gəlib.
Şikayətçilər iddia edir ki, onların çalışdığı doğum evində özbaşnalıqlar və qanunsuz əməllər illərdir ki, davam edir. Belə ki, baş həkim Zalxa Osmanova xəstəxananı dövlətin qanunları ilə deyil, özünə sərf edən qaydalarla idarə edir və bu dözülməz hal alıb.
Hazırda baş həkim təmir adı ilə həkimləri 1000, tibb bacılarını 500 manat verməyə məcbur edir. Pulu verməyənləri gözümçıxdıya salır, işdən qovmaqla hədləyir.
Şikayətçilər qeyd edib ki, adı çəkilən müəssisə əvvəllər Suraxanı rayon 3 saylı Doğum evi olub. Sonradan fəaliyyəti dayandırlaraq, Suraxanı Ağciyər Xəstəlikləri Mərkəzinin tabeliyində olan Doğum Evinə çevirilib. Yüngülvari təmirdən sonra fəaliyyətinə başlayıb.
Hazırda yenidən təmir olunur. İddialara görə, dövlət təmir üçün vəsait ayırmasına baxmayaraq, Baş həkim Zalxa Osmanova fürsətdən istifadə edərək xəstəxana heyyətindən özü üçün pul toplayır.Bakunews.az
