“Təmiz Quba” Mənzil Kommunal Təsərrüfat Birliyinin direktoru Dəyanət Orucovun özünə müavin təyin etmək üçün Quba rayon sakini Rəşad Əmiraslanovdan rüşvət qismində 2500 manat vəsait alması ilə bağlı yeni faktlar üzə çıxıb.
Redaksiyamıza müraciət edən Quba rayon sakini Qafarov Həmid Yaşar oğlu bildirib ki, o, dostu Rəşad Əmiraslanovu “Təmiz Quba” Mənzil Kommunal Təsərrüfat Birliyinə işə düzəltmək üçün Dəyanət Orucovla görüşdürüb. İdarənin inzibati binasında baş tutan bu görüş zamanı Dəyanət Orucov Rəşad Əmiraslanovu həmin idarəyə işə düzəltməklə bağlı razılıq verib. Dəyanət Orucov Rəşad Əmiraslanovun həmin müəssisəyə direktor müavini vəzifəsinə təyin ediləcəyi vədini verib və bunun üçün ondan 5000 manat vəsait tələb edib. Bu vəsaitin yarısını, yəni 2500 manatını öncədən, qalan yarısını isə işə təyinatla bağlı əmr verildikdən sonra alacağını bildirib. Razılaşmadan qısa müddət sonra tərəflər Quba rayonunun Nügədi kəndi ərazisində görüşərək öncədən razılaşdırılmış olan 2500 manat vəsaiti Dəyanət Orucova veriblər. Bundan sonra Dəyanət Orucov onlara bildirib ki, qalan 2500 manatı da 1 həftə müddətində hazır etsinlər. O, bu təyinat üçün artıq müvafiq inzibati strukturun razılığının alındığını deyib.
Bir müddət sonra sözügedən vəzifəyə başqa bir şəxsin təyin olunduğu müəyyənləşir. Amma Dəyanət Orucov qarşı tərəfin bu narazılığını da onu başqa bir vəzifəyə təyin etməsi vədləri ilə sakitləşdirir. Amma bir müddət sonra vəd verdiyi həmin vəzifəyə də başqa bir təyinatın olduğu bəlli olur.
Qeyd edək ki, bu, vətəndaş Həmid Qafarovun Dəyanət Orucov tərəfindən düşürüldüyü ilk dələduzluq halı olmayıb. Belə ki, 2025-ci ilin 19 yanvar tarixində, yəni Dəyanət Orucov Quba Dövlət Aqrar İnkişaf Mərkəzinin direktoru olduğu müddətdə Qafarov Həmid Yaşar oğlunun şəxsi mülkiyyətində olan 22 hektar bağ sahəsinə verilən subsidiyanın intensivlik prinsipinə əsasən hesablanması üçün ondan 5000 manat vəsait alıb.
Dəyanət Orucov vətəndaş Həmid Qafarovdan aldığı 5000 manat pulun qarşılığında onun bağ sahəsinin subsidiyasının intensiv hesablanması vədini versə də, bu vədinə tam olaraq müvəffəq ola bilməyib. Bağ sahəsinin 14 hektarı yoxlamaya düşmədən planlaşdırıldığı kimi keçirilsə də, aparılan monitorinq nəticəsində yerdə qalan 8 hektar bağın subsidiyasının intensiv hesablanması mümkün olmur. Beləliklə, hər hektar üçün 800 manat cərimə tərtib edilərək ümumilikdə 2 illik məhdudiyyət tətbiq edilir. Yaranan bu problemdən sonra Dəyanət Orucov Həmid Qafarova narahat olmamağı, məsələnin həll edilməsi üçün birbaşa olaraq KTN-nin müavininə zəng edərək xahiş etdiyini bildirib.
Sinxron.
Qeyd edək ki, Həmid Qafarov faktla bağlı olaraq Quba Rayon Prokurorluğuna müraciət edib. Vətəndaşa rayon prokurorluğundan bildirilib ki, faktla əlaqədar olaraq cinayət işi açılıb, araşdırmalar aparılır.(7times.az)
