Dünyanın bütün inkişaf etmiş və inkişafda olan ölkələrində yol hərəkət nişanları insanların təhlükəsizliyi və rahatlığı baxımından olduqca mühüm məsələdir. Bizdə isə bu məsələ bəzən qanun və təlimatlarla deyil, aidiyyatı qurum məmurlarının subyektiv qərar və “yaradıcılığına” söykənir. Sadə vətəndaşlar isə qalıblar AYNA-nın yaradıcılığı ilə DYP-nin cərimələri arasında.
Bu barədə jurnalist İlham Aslanov yazıb. O bildirib ki, AYNA Radar məlumatlandırma işarələrini bilərəkdən düzgün olmayan yerlərə vurur ki, sürücülər cərimələnsin:
“Adətən Sürət həddi və Radar məlumatlandırma işarələri vətəndaşların rahat və təhlükəsiz sürüşünə xidmət etməli olduğu halda bizdə bir başa cərimələmə, cəzalandırma və stress yaşatmaq üçün tətbiq edilir.
Deməli yeni açılmış Sea Breeze yolunda maraqlı bir halın şahidi oldum. AYNA-nın Radar məlumatlandırma işarəsi DYP-nin stasionar radarının demək olar ki, altında idi.
Əslində isə “Yol hərəkəti haqqında” Qanunun 50-ci maddəsinə əsasən, radar nişanı yaşayış məntəqələrində 50-200 metr, yaşayış məntəqələrindən kənarda isə 150-1000 metr stasionar radardan əvvəldə quraşdırılır.
Bizdə isə bu məlumatlandırma işarəsi stasionar radarın 10 metrliyində quraşdırılıb. Yəqin bu yazıdan sonra o əraziyə bir əl gəzdirərlər.
Bu həm də qəza şəraitinin yaranması üçün president ola bilir.
AYNA-nın Gəncə yolunda quraşdırdığı bu işarələrlə əməliyyatını sizə ayrıca video material ilə təqdim edəcəm”.(Tribunainfo.az)
