Ölkə prezidentinin dəfələrlə etdiyi tövsiyyə və xəbərdarlıqlar bəzi icra başçıları tərəfindən heç də doğru alqılanmır. Bu üzdən də onlar öz fəaliyyətlərindəki nöqsanları aradan qaldırmaq üçün heç bir addım da atmırlar və fəaliyyətlərində dönüş yaratmırlar…
Ötən həftə Azərbaycan Prezidenti İlham Əliyev yeni təyinat alan icra başçılarını qəbul edərkən onlara təlimatlar verməklə yanaşı, eyni zamanda məmurlara bir daha xəbərdarlıq edib. Prezident bildirib ki, rəhbər vəzifədə çalışan hər bir şəxs, hər bir məmur təvazökar olmalıdır.
“Həyatda, məişətdə özü, onun yaxın qohumları özlərini elə aparmalıdırlar ki, bizim ümumi işimizə heç bir irad tutulmasın. Əfsuslar olsun ki, bəzi hallarda məmurlar özlərini cəmiyyətdə düzgün apara bilmirlər, ifrat dərəcədə təkəbbürlülük göstərirlər, özlərini hamıdan üstün tutmağa çalışırlar və beləliklə, həm öz nüfuzlarını itirirlər, eyni zamanda, dövlətimizə, dövlətin siyasətinə də ləkə vurmuş olurlar. Bununla bərabər, bəzi hallarda korrupsiyaya, rüşvətxorluğa düçar olurlar. Azərbaycan ictimaiyyəti yaxşı bilir ki, əyri yola gedən hər bir dövlət məmuru nəticədə məhkəmə, qanun qarşısında cavab verməli olur və belə hallar əfsuslar olsun ki, bu gün də var. Ancaq o da cəmiyyət üçün tam aydındır ki, heç bir qanunsuz hərəkət nəticəsiz qalmayacaq”, deyə prezident bildirib və əlavə edib ki, dövlət başçısı olaraq onun etimad göstərdiyi şəxslər bəzən bu etimadı doğrultmur.
“Əfsuslar olsun ki, yenə də deyirəm, göstərdiyim etimada rəğmən bəzi məmurlar bu göstərişləri yerinə yetirmək əvəzinə, ancaq öz ciblərini güdərək qanunsuz varlanmaya üstünlük verirlər”, deyə ölkə prezidenti vurğulayıb.
Qeyd edək ki, prezidentin bu tövsiyyə və xəbərdarlığı xalq işində şövqlə qarşılanıb və sıravi vətəndaşlar ümid edirlər ki, bəzi məmurlar prezidentin bu xəbərdarlığından doğru nəticə çıxaracaqlar.
Biz də öz tərəfimizdən qeyd edirik ki, prezidentin bu tövsiyyə və xəbərdarlıqları bəzi icra başçıları tərəfindən heç də doğru alqılanmır və bu üzdən də onlar öz fəaliyyətlərindəki nöqsanları aradan qaldırmaq üçün heç bir addım da atmırlar və fəaliyyətlərində dönüş yaratmırlar. Bunun sübutunu da gündəlik həyatımızda görürük və belə başçıların fəaliyyətinin yaratdığı fəsadlarla yaşamaqda davam edirik.
Xatırladaq ki, ölkə prezidentinin tövsiyyə və xəbərdarlıqlarını nəzərə almayan başçılar arasında Bakı şəhər icra başçıları öndə gedir və onlardan biri də Xətai rayon İcra hakimiyyətinin başçısı Rafiq Quliyevdir. Cənab Quliyev Bakı şəhərində ən çox qanunsuz tikintilərə icazə verən və prezidentin sözləri ilə desək, bundan ən çox “cibini dolduran” icra başçılarından biridir. Demək olar ki, hər gün Xətai rayonunda qanunsuz tikililərlə bağlı yerli mətbuatda, sosial şəbəkələrdə yeni-yeni xəbərlər tirajlanır və bu xəbərlərin artım tempinə baxarsaq, deyə bilərik ki, Xətai icra Hakimiyyətində bu yazılanlardan və tirajlanan videoçarxlardan nəinki nəticə çıxartmırlar, heç bu yazılanları veclərinə də almırlar.
Misal üçün bildirək ki, prezidentin son xəbərdarlığından sonra sosial şəbəkələrdə və yerli mətbuatda yayılan videoçarxda bildirilir ki, general Əliağa Şıxlınski 37 ünvanında inşa edilən binanın üzərinə yenidən iki mərtəbə inşa edilməkdədir. Sosila şəbəkələrdə haqlı olaraq sual edirlər ki, bəs aidiyyatı qurumlar hara baxırlar?
Qeyd edək ki, təkcə son bir ayda sosial şəbəkələrdə Xətai rayonu ilə bağlı ona yaxın belə videoçarxlar yayımlanıb, amma heç bir aidiyyatı qurum ortaya çıxıb bu özbaşınalıqlara son qoymur. Xətai icra hakimiyyəti isə ümumiyyətlə susur. Sanki rayon ərazisinin küçə və parklarında aparılan qanunsuz tikililərin onlarla heç bir əlaqəsi yoxdur və bu qanunsuzluğu durduracaq qurum da, onlar deyil.
Əlbəttə ki, Xətai rayon İcra Hakimiyyəti və şəxsən Rafiq Quliyevin bu qanunsuz tikintilərdən xəbərsiz olması mümkünsüzdür. Lap deyək ki, bütün bu qanunsuz tikililərin bəziləri Rafiq Quliyevin iradəsi xaricində baş verir. Amma bu günə qədər Xətai rayon İcra Hakimiyyəti cinayət məsuliyyəti yaradan bu qanunsuzluqlarla bağlı yuxarı instansiyalara və digər aidiyyatı qurumlara müraciət edibmi? Əgər ediblərsə, xahiş edirik, ictimaiyyətə təqdim etsinlər…
Bu gün Xətai rayonun parklarında, ölkə prezidentinin öz son çıxışında qeyd elədiyi kimi, ekoloji tarazlıq pozulub və bu, Rafiq Quliyevin fəaliyyətinin birbaşa nəticəsidir. Ona görə də bu gün Xətai sakinlərinin və ictimaiyyətin beynində bir sual dolaşmaqdadır: Rafiq Quliyev prezidentin son xəbərdarlıqlarından və təlimatlarından nəticə çıxaracaqmı?..
Poliqon.info
