“Əhalinin tibbi sığortadan gözləntilərindən biri ambulator müalicə alan xəstələrin dərman vasitələri ilə təminatının İTS ilə qarşılanmasıdır. Milli Məclis bu məsələ ilə bağlı “Tibbi sığorta haqqında” qanuna da dəyişikliklər edib”.
Bunu Səhiyyə komitəsinin sədri Əhliman Əmiraslanov Milli Məclisin bu gün keçirilən plenar iclasında 2026-cı ilin dövlət büdcəsinin müzakirəsi zamanı bildirib.
“İnanıram ki, xəstələrin səbirsizliklə gözlədiyi bu problem növbəti ildə həllini tapacaq. Əhalini narahat edən digər məsələ onlara göstərilən ilkin tibbi xidmətin səviyyəsinin aşağı olmasıdır. Bu problem xüsusilə bölgələrdə, kənd yerlərində özünü daha qabarıq göstərir. Bölgələrdə olan tibb məntəqələrinin böyük qismi istifadəyə yararsız vəziyyətdədir, ciddi kadr çatışmazlığı var”, - komitə sədri qeyd edib.
Spiker Sahibə Qafarova deputatın fikirlərinə münasibət bildirib: “Biz sizinlə bu barədə danışmışdıq, tibbi sahədə çox böyük islahatlar gedir. Dediyiniz məsələlər, həkimlərin çatışmazlığı və s. böyük paket hazırlanır. Ümidvarıq ki, bu, çox yaxınlarda həyata keçəcək.
