Astara rayon sakini Bağırov Famil Zaidağa oğlu 2016-cı ildə atasının faciəli şəkildə həlak olması ilə nəticələnən yol-nəqliyyat hadisəsinin obyektiv araşdırılmaması və cinayət məsuliyyətindən yayınma halları ilə bağlı Azərbaycan Respublikasının Baş Prokurorluğuna rəsmi müraciət ünvanlayıb. 9 ildi üç prokuror tərəfindən ədalətli qərarın verilmədiyi qeyd edilir.
Müraciətə əsasən, 04 may 2016-cı il tarixində Astara rayon Bayraq Meydanı yaxınlığında piyada olan Zaidağa Hüseynağa oğlu Bağırov “Hyundai Elantra” markalı, 99-GL-063 dövlət nömrə nişanlı avtomobillə vurularaq həlak olub. Sürücü və hadisənin səbəbkarı isə Dövlət Sərhəd Xidmətinin Sahil Mühafizə Xidmətində katerlər üzrə rəis vəzifəsində çalışan kapitan Samir Aydın oğlu Nadirov olub.
Mərhumun qohumları bildirirlər ki, hadisə araşdırılsa da, istintaq zamanı ciddi qanun pozuntularına yol verilib. Ailə üzvlərinin iddiasına görə, hadisəyə rəhbərlik edən istintaq qrupu – o cümlədən Astara Rayon Polis Şöbəsinin baş müstəntiqi Bəhruz Qulamov və həmin dövrdə rayon prokuroru olmuş Zakir Saatov – bilərəkdən sənədlərdə saxtakarlığa yol verərək, sürücünü məsuliyyətdən yayındırmağa çalışıblar.
Bağırov Famil müraciətində vurğulayır ki, bu hərəkətlər Cinayət Məcəlləsinin 297-ci (saxta ekspert rəyi) və 313-cü (vəzifə saxtakarlığı) maddələrinə uyğun olaraq cinayət tərkibi daşıyır və məsul şəxslər barədə ciddi hüquqi tədbirlər görülməlidir.
Zərərçəkmiş tərəf hadisənin yenidən obyektiv və şəffaf şəkildə araşdırılması, Samir Nadirovun məsuliyyətə cəlb olunması və istintaqı bilərəkdən təhrif edən şəxslərin cəzalandırılması üçün Baş Prokurorluqdan konkret addımların atılmasını tələb edir.
Məsələ ictimai rezonans doğurmaqda davam edir. Ailənin hüquqi mübarizəsi və cəmiyyətin bu cür hadisələrə qarşı gözləntiləri fonunda aidiyyəti orqanların bu müraciətə necə reaksiya verəcəyi maraqla gözlənilir.
Araşdırmalar davam edir.
Qarşı tərəfin mövqeyi də öyrənildikdən sonra yayımlanacaq.
