Sabiq rabitə naziri Nadir Əhmədov 80 yaşında vəfat edib.
Qohumlarının İfadetv.com-a verdiyi məlumata görə, o bu gün dünyasını dəyişib.
Qeyd edək ki, N. Əhmədov 1997-2004-cü illərdə Rabitə naziri vəzifəsində çalışıb.
N. Əhmədov sabah dəfn ediləcək.
1940-cı ildə Nuxa rayonunun Aşağı Laysqı kəndində anadan olub. 1960-cı ildə Bakı Rabitə Texnikumunu, 1965-ci ildə isə Odessa Rabitə Elektrotexnika İnstitutunun Elektrik rabitəsi fakültəsini bitirib. 1968–70-ci illərdə sovet ordusunda xidmət edib. 1960-85-ci illərdə Bakı Telefon şəbəkəsində texnik, mühəndis, sex rəisi, stansiya xidməti rəisi, baş mühəndis, daha sonra rəis işləyib. 1985-ci ildən 1997-ci ilədək rabitə nazirinin müavini, 1997-ci ildən 2004-cü ilədək isə rabitə naziri olub.
Dövlət və ictimai işlərdə xidmətlərinə görə «Şərəf nişanı» ordeni ilə təltif olunmuş, SSRİ Rabitə Nazirliyinin «Rabitə ustası» adına, Respublikanın «Əməkdar rabitəçisi» fəxri adına, MDB Dövlətlərinin Assambleyasında qızıl medal və xüsusi diplomuna layiq görülüb; ABŞ Bioqrafiyalar İnstitutunun dünyada apardığı sorğusuna əsasən «2001-ci ilin adamı» seçilmiş, 2002-ci ildə ABŞ-da aparılan digər sorğuya əsasən «Dünyanın qabaqcıl ziyalısı» tituluna layiq görülmüşdür.
Azərbaycan KİV və Sosial Araşdırma Mərkəzləri tərəfindən 2000-ci ildə «İlin ən işgüzar dövlət məmuru», 2001-ci ildə «İlin ciddi siması», 2002-ci ildə «İlin naziri», 2003-cü ildə «İlin dövlət məmuru» və «Veteranların dostu» adına layiq görülüb. Abşeron rayonunun və Mingəçevir şəhərinin fəxri vətəndaşıdır.
50-dən çox səmərələşdirici təklifin, bir ixtiranın, beş texniki kitabın, çoxsaylı məqalələrin müəllifidir.
1979-87-ci illərdə Bakı şəhər Xalq Deputatları Sovetinə deputat seçilib.
Qarabağ müharibəsi veteranıdır.
Evli idi, 3 övladı və 3 nəvəsi var.
P.S.Sabiq nazir Nadir Əhmədov istər 25 il işlədiyi BTRİB-də, istər 12 il işlədiyi Rabitə nazirin müavini, istərsə də 7 il işlədiyi nazir vəzifəsində xalqına və dövlətinə vicdanla, ləyaqətlə, şərəflə gecə-gündüz xidmət etmiş, Azərbaycanın rabitə sahəsini xeyli inkişaf etdirmişdir. Nazir olduğu vaxtlarda şənbə və bazar günlərini də axşam saat 21-ə kimi iş otağında keçiridi. Belə günlərdə sürücüsünə əziyyət verməmək üçün evinə 88 saylı avtobusla gedib gələn müstəqil Azərbaycanın ilk və sonuncu naziri oldu. Və yeganə nazir olmuşdur ki, MTN-ə və digər qurumlara ( istər qara , istər ağ kassalara) dövlətin pulundan 1 manat da olsun verməmişdir. Onun dövründə rabitədən əldə edilən gəlirlə bütün Azərbaycan pensiyaçıların pensiyası ödənilir, bütün rabitəçilərin yüksək maaşları və mükafatları verilirdi. Nadir müəllim əsil ziyalı və əsil Vətəndaş idi. Allah rəhmət eləsin.
İFADETV.COM
