Nyu-York meri Zöhran Mamdani ildə 1 milyon dollardan çox qazanan sakinlər üçün şəxsi gəlir vergisinin 2% artırılmasını və korporativ vergi dərəcəsinin yüksəldilməsini təklif edib.
“Qafqazinfo” xəbər verir ki, bu təkliflər merin seçki kampaniyasında müdafiə etdiyi iqtisadi siyasətlərin davamıdır.
Mamdaninin sözlərinə görə, şəhərin büdcə kəsiri ilkin 12 milyard dollardan 7 milyard dollara endirilib, lakin Nyu-York hələ də maliyyə çətinlikləri ilə üz-üzədir.
“İnanıram ki, ən varlı şəxslər və gəlirli korporasiyalar şəhərin xidmətlərinin davamlılığı və sakinlərin ləyaqətli həyatı üçün əlavə töhfə verməlidirlər”, – deyə Mamdani bildirib.
Merin hesablamalarına görə, təklif edilən 2% vergi artımı büdcə kəsirinin təxminən yarısını qarşılaya bilər. O, korporativ vergi dərəcəsini 7,25%-dən 11,5%-ə yüksəltməyi planlaşdırır.
Ştat Senatının təsdiqi olmadan bu təkliflər qüvvəyə minməyəcək. Demokrat qubernator Keti Hoxul isə əvvəldən vergi artımına qarşı olduğunu açıqlayıb.
“Vergi artırmadan və növbəti nəsli borcla yükləmədən gələcəyimizə investisiya qoymaq mümkündür”, - o ötən ay bildirib.
Şəhərin ilkin büdcəsi çərşənbə axşamı ictimaiyyətə təqdim ediləcək.
