“Xezertv.info” xəbər verir ki, “Qərbi Azərbaycana Qayıdış Gənclərin Səsi ilə” layihəsi çərçivəsində maarifləndirici görüşlər, podkast xarakterli videoçarxlar və hesabat konfransı təşkil olunub. Layihənin məqsədi Qərbi Azərbaycan icmasının konstitusiya və beynəlxalq hüquq çərçivəsində mövcud olan hüquqları barədə gənclərin məlumatlılığını artırmaq, onları bu prosesin fəal iştirakçısına çevirmək və beynəlxalq ictimaiyyətə Qərbi Azərbaycana qayıdış prosesinin hüquqi əsaslarını və humanitar mahiyyətini çatdırmaq olub.
Layihə çərçivəsində ayrı-ayrılıqda keçirilən görüşlərdə millət vəkili, Qərbi Azərbaycan İcması Gənclər Şurasının sədr müavini Naqif Həmzəyev Qərbi Azərbaycanın tarixi kökləri, azərbaycanlıların həmin ərazilərdə məskunlaşma tarixi, deportasiya mərhələləri və beynəlxalq hüquq çərçivəsində qayıdış hüququnun əsasları barədə geniş məlumat verib. Hərbi jurnalist Heydər Mirzə Qərbi Azərbaycan həqiqətlərinin beynəlxalq arenada təqdim olunması, effektiv kommunikasiya strategiyalarının qurulması və informasiya məkanında düzgün narrativlərin formalaşdırılması məsələlərinə toxunub. Beynəlxalq hüquqşünas və siyasət üzrə tədqiqatçı Fərid Şükürlü isə qayıdış prosesinin beynəlxalq hüquq normalarına uyğun tənzimlənməsi, mövcud mexanizmlər və hüquqi çərçivə barədə iştirakçılara ətraflı izahlar təqdim edib.
Layihə çərçivəsində gənclərin təqdimatında podkast xarakterli videoçarxlar hazırlanıb və Birliyin sosial şəbəkə hesablarında paylaşılıb. Videoçarxlarda Qərbi Azərbaycanın tarixi həqiqətləri, qayıdış prosesinin hüquqi mexanizmləri və gözləntilər, gənclərin bu prosesdə rolu, eləcə də qayıdış hüququnun beynəlxalq və milli çərçivədə tənzimlənməsi və beynəlxalq müstəvidə düzgün təmsil olunması məsələləri geniş şəkildə işıqlandırılıb. Hazırlanan videomateriallar mövzunun daha geniş auditoriyaya çatdırılmasına və gənclərin qayıdış prosesinin fəal təbliğatçısı kimi iştirakına imkan yaradıb.
Layihənin yekununda Hesabat konfransı təşkil edilib. Tədbirin rəsmi açılış hissəsində Azərbaycan Respublikası Milli Məclisinin deputatı Vüqar İskəndərov, Azərbaycan Respublikası Gənclər Fondunun Daxili nəzarət və monitorinq şöbəsinin müdiri İsmayıl Süleymanov, Qərbi Azərbaycan İcmasının İdarə Heyətinin üzvü, AMEA A.A.Bakıxanov adına Tarix və Etnoqrafiya İnstitutunun “Qərbi Azərbaycan tarixi” şöbəsinin müdiri Cəbi Bəhramov və Xəzər Müdafiə Tədqiqatları Mərkəzinin rəhbəri, hərbi ekspert Ramil Məmmədli çıxış ediblər. Çıxışlarda gənclərin müvafiq istiqamətdə maarifləndirilməsinin əhəmiyyəti, təşəbbüslərin davamlılığının təmin edilməsi və Qərbi Azərbaycan həqiqətlərinin yerli və beynəlxalq ictimaiyyətə çatdırılmasında gənclərin rolu xüsusi vurğulanıb.
Konfrans çərçivəsində layihə üzrə görülən işlər və əldə olunan nəticələr təqdim edilib, təşəbbüsün gənclərin mövzuya marağının artmasına və daha fəal vətəndaş mövqeyinin formalaşmasına töhfə verdiyi bildirilib. Daha sonra “Qayıdış prosesində qarşıda duran vəzifələr: maarifləndirmə, hüquq və çağırışlar” mövzusunda panel müzakirəsi keçirilib. Paneldə Qafqaz Tarixi Mərkəzinin direktoru, tarixçi Rizvan Hüseynov, Hüquq və İnsan Haqları İnstitutunun Hüquqi Tədqiqat şöbəsinin müdiri Aygün Arifli, AMEA-nın akademik Z. M. Bünyadov adına Şərqşünaslıq İnstitutunun böyük elmi işçisi Mirzə Ənsərli çıxış edərək tarixi sənədlər, təhlükəsizlik məsələləri və insan hüquqları kontekstində mühüm məqamlar ətrafında fikir mübadiləsi aparıblar, qayıdış hüququnun əsaslandırılması və beynəlxalq müstəvidə təqdimatı istiqamətində təkliflər səsləndiriblər.
Qeyd edək ki, layihə Azərbaycan Respublikasının Gənclər Fondunun maliyyə dəstəyi, Gənclərin Həmrəyliyi İctimai Birliyinin təşkilatçılığı ilə həyata keçirilib.
