“Sonsuz intellektin təzahürləri” kitabından bir epizod
Ali Baş Komandan İlham Əliyevin idrak və bəlağətə söykənən sərkərdəlik obrazı
Kitabın məsləhətçisi: Hüquq elmləri doktoru, professor, ictimai-siyasi xadim, əməkdar müəllim İbrahim Quliyev.
Tarix yalnız silahların gurultusu ilə yazılmır. Bəzən bir xalqın taleyini dəyişən ən böyük qüvvə düşüncə, strateji təfəkkür, siyasi uzaqgörənlik və xalqı vahid məqsəd ətrafında birləşdirə bilən lider iradəsi olur. Azərbaycanın müasir tarixində bu həqiqətin ən parlaq təzahürü 44 günlük Vətən müharibəsində əldə edilən möhtəşəm Qələbədir. Bu Zəfər təkcə döyüş meydanında qazanılmadı; o, illərlə formalaşan siyasi konsepsiyanın, milli strategiyanın, dövlət ağlının və güclü liderlik məktəbinin nəticəsi idi.
“Sonsuz intellektin təzahürləri” kitabının hər səhifəsində dövlət idarəçiliyinin fəlsəfəsi, milli maraqların qorunması və strateji düşüncənin gücü öz əksini tapır. Kitabın əsas ideyalarından biri budur ki, böyük zəfərlər təsadüflərin deyil, yüksək idrakın, zəkanın və uzaqgörən siyasətin məhsuludur. Azərbaycanın ərazi bütövlüyünün bərpası da məhz belə bir siyasi-intellektual məktəbin nəticəsi kimi tarixə həkk olundu.
Azadlıq heç zaman itkisiz əldə olunmur. Xalqımızın yüzlərlə qəhrəman oğlu və qızı Vətən torpaqlarının azadlığı uğrunda canından keçərək əbədi ölümsüzlük zirvəsinə yüksəldi. Şəhidlərimizin müqəddəs qanı ilə yazılan Zəfər salnaməsi Azərbaycan dövlətçiliyinin ən şərəfli səhifələrindən birinə çevrildi. Lakin bu böyük mübarizənin arxasında həm də dəmir iradə, qətiyyətli siyasi rəhbərlik və müdrik sərkərdəlik dayanırdı.
Ali Baş Komandan İlham Əliyevin rəhbərliyi ilə Azərbaycan uzun illər ərzində sistemli şəkildə güclü dövlət modelini formalaşdırdı. İqtisadi qüdrətin artırılması, müasir ordunun qurulması, beynəlxalq münasibətlər sistemində etibarlı tərəfdaş mövqeyinin möhkəmləndirilməsi və milli maraqların qətiyyətlə müdafiəsi gələcək Zəfərin əsas təməl daşları oldu. Bu prosesin mərkəzində isə dərin analitik təfəkkürə malik lider düşüncəsi dayanırdı.
İlham Əliyevin sərkərdəlik obrazını yalnız hərbi əməliyyatların idarə olunması ilə məhdudlaşdırmaq mümkün deyil. Onun fəaliyyətində diqqət çəkən əsas məqam intellektual liderlik modelidir. Bu modeldə siyasi məntiq, tarixi yaddaş, diplomatik ustalıq və milli maraqların müdafiəsi vahid bir sistem halında birləşir. Azərbaycanın bəxti bir də onda gətirdi ki, onun lideri poliqlotdur. Dünyanın millətlərinin dilində danışmaq istedadına malikdir. Müharibə dövründə dünya mediasına verdiyi çoxsaylı müsahibələr, beynəlxalq auditoriyalar qarşısında nümayiş etdirdiyi faktlara söykənən arqumentasiya və yüksək nitq mədəniyyəti Azərbaycanın haqq səsinin qlobal informasiya məkanında eşidilməsini təmin etdi.
Bəlağət sadəcə gözəl danışmaq deyil. Əsl bəlağət həqiqəti məntiq və sübutlarla təqdim etmək bacarığıdır. Müharibə günlərində Prezident İlham Əliyev informasiya cəbhəsində də qətiyyətli lider kimi çıxış etdi. Dünyanın aparıcı media qurumlarına verdiyi müsahibələrdə tarixi faktları, beynəlxalq hüququn prinsiplərini və Azərbaycanın haqlı mövqeyini ardıcıl şəkildə müdafiə etməsi onun siyasi nitq mədəniyyətinin və intellektual hazırlığının göstəricisi idi.
Tarix boyu böyük sərkərdələr yalnız ordulara rəhbərlik etməklə deyil, həm də ideyalar yaratmaqla tanınıblar. İlham Əliyevin rəhbərliyi altında Azərbaycan xalqı milli birliyin, həmrəyliyin və vətənpərvərliyin ən yüksək nümunəsini nümayiş etdirdi. Dövlət başçısının hər çıxışı cəmiyyətə mənəvi güc verir, qələbəyə inam hissini daha da möhkəmləndirirdi. Bu, liderlə xalq arasındakı etimadın və mənəvi bağlılığın ən bariz nümunəsi idi.
Qələbəyə aparan yolun hər mərhələsində yüksək intellektual hazırlıq özünü göstərirdi. Ordunun modernləşdirilməsi, hərbi texnologiyaların tətbiqi, strateji tərəfdaşlıqların qurulması və milli təhlükəsizlik konsepsiyasının ardıcıl şəkildə həyata keçirilməsi təsadüfi qərarlar deyildi. Bunlar uzun illər ərzində düşünülmüş və planlaşdırılmış dövlət strategiyasının tərkib hissələri idi. Məhz buna görə də 44 günlük müharibə zamanı Azərbaycan Ordusu qarşıya qoyulan vəzifələri yüksək peşəkarlıqla yerinə yetirdi.
“İdrakın gücü” ifadəsi bu mənada xüsusi məna daşıyır. Çünki hərbi qüdrətin arxasında dövlət ağlı dayanırdı. Müasir dövrdə müharibələr təkcə silahlarla deyil, informasiya, diplomatiya və iqtisadi potensialla da aparılır. Azərbaycan bütün bu istiqamətlərdə üstünlük nümayiş etdirərək öz haqqını təmin etdi. Bu üstünlüyün mərkəzində isə düşünülmüş dövlət siyasəti və qətiyyətli liderlik dayanırdı.
Azərbaycan xalqı tarixinin ən şanlı günlərini yaşayarkən bir həqiqəti də dərindən dərk etdi: milli birlik ən böyük sərvətdir. Şəhidlərin qəhrəmanlığı, qazilərin igidliyi, ordunun rəşadəti və xalqın həmrəyliyi dövlət rəhbərliyinin ətrafında sıx birləşərək böyük Zəfərin əsas sütunlarına çevrildi. Bu birlik modeli gələcək nəsillər üçün də örnək olacaq milli irsdir.
Bu gün azad Qarabağ və Şərqi Zəngəzurda aparılan genişmiqyaslı quruculuq işləri Zəfərin davam edən mərhələsini təşkil edir. Bərpa olunan şəhərlər, yenidən salınan kəndlər, inşa edilən yollar və müasir infrastruktur Azərbaycanın inkişaf strategiyasının yeni mərhələsini nümayiş etdirir. Bu proses həm də göstərir ki, əsl qələbə yalnız torpaqların azad olunması ilə deyil, həmin torpaqlarda həyatın yenidən canlandırılması ilə tamamlanır.
“Sonsuz intellektin təzahürləri” kitabının ideya xəttində xüsusi yer tutan məqamlardan biri də məhz budur: böyük dövlətlər güclü düşüncə ilə qurulur, böyük zəfərlər isə güclü idrakın nəticəsində qazanılır. Azərbaycanın qazandığı tarixi Zəfər də milli iradənin, strateji təfəkkürün və müdrik liderliyin vəhdətindən doğan möhtəşəm nəticədir.
Bu gün Azərbaycan qalib dövlətdir. Bu qələbənin salnaməsində qəhrəman şəhidlərin müqəddəs xatirəsi, qazilərin şücaəti və xalqın birliyi ilə yanaşı, Ali Baş Komandan İlham Əliyevin idrak, iradə və bəlağətə söykənən sərkərdəlik obrazı da xüsusi yer tutur. Tarix göstərdi ki, güclü ağıl, qətiyyətli iradə və milli məqsədə sədaqət bir araya gəldikdə ən mürəkkəb maneələr belə aşılır.
Azərbaycanın Zəfər yolu məhz bu həqiqətin ən parlaq sübutudur...
Hürü Hacızadə
Yazıçı-publisist
“Qızıl qələm” mükafatçısı
Fərid Faiqoğlu
AJB-nin üzvü
