Bakının mərkəzində yerləşən bina ilə bağlı növbəti dəfə şikayət var. Bir il əvvəl saytımıza müraciət edən sakinlər söküntü ilə bağlı narahatlıqlarını bildirmişdilər, amma onlar məsələnin hələ də həllini tapmadığını deyirlər.
Bu dəfə “Qafqazinfo”ya eyni ünvanda - Neftçilər prospekti 14-də yaşayan Vüqar Qonaqov müraciət edib.
Şikayətçinin sözlərinə görə, binada insanlar yaşadığı halda söküntü aparılır, mənzillərə ziyan vurulur: “Hətta mən evdə olmayanda avadanlıqlarımı sökərək mənzilimi yararsız hala salıblar. 1983-cü ildə istifadəyə verilən 9 mərtəbəli yaşayış binası ilə bağlı problemlər illərdir davam edir.2011-ci ildə binanın üstündə əlavə mərtəbə və restoran tikilməsinə cəhd göstərilsə də, sakinlərin etirazından sonra işlər dayandırılmışdı. 2013-cü ildə isə bina qəzalı elan edildi. Burada yaşayanlara hər kvadratmetr üçün 1500 manat kompensasiya təklif olundu və bəzi ailələr köçürüldü. Bununla razılaşmayan vətəndaşların məhkəməyə müraciətindən sonra aparılan tikinti-texniki ekspertiza binanın dayanıqlığına təsir edən hər hansı amilin olmadığını, yalnız kosmetik təmirə ehtiyac duyulduğunu müəyyən etdi və məcburi köçürülmə prosesi dayandırıldı”.
Vətəndaş deyir ki, 2025-ci ilin may ayından etibarən binanın sökülməsi və ərazidə yeni yaşayış kompleksinin tikilməsi prosesi yenidən başlayıb: “Bunun üçün bizə hər kvadratmetr üçün 2700 manat kompensasiya təklif olunub, razılaşmayanlara isə binanın istənilən halda söküləcəyi bildirilib. Nəticədə 44 ailənin də mənzili satılıb, hazırda binada cəmi 5 ailə yaşayır. Bununla belə binada hələ də sakinlər yaşadığı halda söküntü işləri aparılır. Pilləkənlər, məhəccərlər və digər ümumi istifadə yerləri sökülür, nəticədə insanların həyat və sağlamlığı üçün təhlükə yaranır. Hətta mən olmadığım vaxt naməlum şəxslər evimə daxil olaraq pəncərələri, kombini, sayğacı, isti döşəmə sistemi, elektrik xətləri, kondisioner xətləri, hamam aksesuarları və digər avadanlıqları söküblər. Səbail RİH-yə dəfələrlə şikayət etsək də, bizə inşaat işlərini “PMD Group”un həyata keçirdiyini və onların məsuliyyət daşıdığını deyiblər”.
Vüqar Qonaqovun iddiasına görə, sakinlərə söküntünün dövlət layihəsi çərçivəsində aparıldığı bildirilsə də, bunu təsdiqləyən rəsmi sənəd təqdim edilməyib.
.jpg)
Səbail Rayon İcra Hakimiyyətindən sorğumuza cavab olaraq bildirildi ki, hazırda sakinlərə kompensasiya ödənilməklə köçürülmə işləri həyata keçirilir: “Bildiririk ki, aidiyyəti qurumun müvafiq rəyinə əsasən, Səbail rayonu, Mikayıl Useynov küçəsi 14 ünvanında yerləşən yaşayış binası uzun illər təmirsiz istismar nəticəsində deformasiyalara məruz qalıb və hazırda qəzalı vəziyyətdədir.
Sözügedən ünvanda yerləşən yaşayış binasının qəzalı vəziyyətdə olması ilə əlaqədar həmin binada yaşayan sakinlərin kompensasiya ödənilməklə köçürülmə işləri həyata keçirilir. Hazırda sakinlərin bir çoxunun köçürülməsi təmin edilib, digər sakinlərlə danışıqlar aparılır”.
“PMD Group” MMC-nin də mövqeyini öyrənmək məqsədilə şirkətlə əlaqə saxlamağa çalışsaq da, zəngimizə cavab verilmədi.
Fatimə Şahverdiyeva
