Son günlərdə sosial şəbəkələrdə avqustun 15-də miqrantların İspaniyanın Şimali Afrikadakı eksklavı Seuta şəhərinə yeni kütləvi axın cəhdi ilə bağlı çağırışlar yayılıb.
“Qafqazinfo” “20 Minutos” nəşrinə istinadən xəbər verir ki, bu barədə Seuta hökumətinin nümayəndəsi Alexandro Ramires bildirib.
O, İspaniya ərazisinə keçmə cəhdini koordinasiya etmək üçün mesencerlərdə yaradılmış qruplara qoşulmağa dəvət edən paylaşımlar yayıldığını, toplanma yeri qismində Mərakeşin Seuta ilə sərhəddəki Fenidek şəhərinin göstərildiyini qeyd edib.
“Baş verən hadisələrdən sonra sosial şəbəkələrdə bu cür şayiələrin yayılması narahatlıq doğurur”, - Ramires deyib.
Seuta hökumətinin nümayəndəsi səlahiyyətli orqanların müvafiq çağırışlar barədə məlumatlandırıldığını söyləyib.
Qeyd edək ki, iyulun 30-da Mərakeşin Fenidek sahillərindən on minlərlə miqrant İspaniyaya məxsus Seuta və Melilya anklavlarına üzərək və ya piyada keçməyə cəhd edib. İyulun sonundan etibarən azı 72 min qanunsuz miqrantın Seuta şəhərinə daxil olduğu, lakin onlardan təxminən 70 min nəfərinin Mərakeşə geri qayıtdığı bildirilir. İspaniya ərazisinə keçməyə çalışarkən azı 75 nəfər həlak olub.
