Hər böyük uğurun arxasında kiçik, lakin inamla atılan bir ilk addım dayanır. Bəzən bir uşağın həyətdə dostları ilə oynadığı adi futbol oyunu onun həyatının istiqamətini dəyişən böyük bir başlanğıca çevrilir. Bəzən isə bir məşqçinin diqqəti, bir ailənin inamı və uşağın öz arzusuna olan sədaqəti gələcəkdə böyük bir idman hekayəsinin təməlini qoyur. Dünyamalı Ramalın futbol yolu da məhz belə başlanıb. Bu gün Sumqayıt futbolunun gələcək vəd edən gənc istedadlarından biri kimi diqqət çəkən Ramalın hekayəsi bizə bir daha göstərir ki, qalibin yaşı olmur. Qalib olmaq üçün əvvəlcə özünə inanmaq, sonra isə məqsədinə doğru səbrlə və inadla addımlamaq lazımdır.
8 aprel 2013-cü ildə dünyaya göz açan Dünyamalı Ramal hələ kiçik yaşlarından futbola böyük maraq göstərib. Onun futbol sevgisi sadəcə tamaşaçı kimi oyunları izləməklə məhdudlaşmayıb. O, topun arxasınca qaçmağı, meydanda mübarizə aparmağı, qol vurmağı, komanda yoldaşları ilə birlikdə qələbəyə can atmağı sevib. Futbol onun üçün zaman keçdikcə sadəcə bir oyun deyil, həyatının əsas arzularından birinə çevrilib.
Ramal futbola 7 yaşında başlayıb. Onun futbol həyatının ilk səhifəsi isə təsadüfi və maraqlı bir hadisə ilə yazılıb. Həyətdə futbol oynayan Ramalı görən Daşqın Alıyev onun oyununa diqqət yetirib. Daşqın Alıyev professional futbolçu olduğundan Ramalın şəxsində gələcəyin istedadlı futbolçusunu görmüşdü. Elə onun ilk müəllimi də Daşqın Alıyevdi. Uşağın meydandakı hərəkətləri, topa münasibəti və futbol oynamaq həvəsi Daşqın müəllimin diqqətindən yayınmayıb. O, Ramalın istedadını görərək onu öz komandasına dəvət edib. Bəzən həyatımızda çox adi görünən bir an gələcək taleyimizin istiqamətini müəyyənləşdirir. Ramal üçün də həmin dəvət məhz belə bir başlanğıc oldu.
Bu başlanğıcdan sonra onun qarşısında yeni imkanlar açıldı. Daha sonra Sumqayıt Futbol Akademiyasında keçirilən seçimlərdə iştirak edən Ramal çoxsaylı uşaqlar arasında öz bacarığı ilə seçilərək akademiyaya qəbul olundu. Daşqın müəllimin Ramal haqqında fikirləri özünü doğrultmuşdu. Bu, onun üçün həm böyük sevinc, həm də daha böyük məsuliyyət demək idi. Çünki futbol akademiyasına qəbul olunmaq yolun sonu deyil, əksinə, əsl yolun başlanğıcıdır. Burada istedadla yanaşı, intizam, zəhmət, səbr, məşqlərə ciddi münasibət və məşqçinin tapşırıqlarına əməl etmək tələb olunur.
Dünyamalı Ramal da illər ərzində bu tələbləri öz üzərində hiss edərək inkişaf etməyə başlayıb. Bu gün o, Sumqayıt Futbol Akademiyasının U-14 komandasında çıxış edir. Sumqayıt Futbol Akademiyası bir çox məşhur futbolçuların gələcək uğurlarının məkanı olub, bu xüsusi ilə danılmazdı. Sumqayıt Futbol Akademiyasının hal-hazırki rəhbəri Adil Şükürov gələcəyin futbolçularına böyük qayğı və diqqətlə yanaşır. Bu gün Sumqayıt Futbol Akademiyasında Ramal kimi onlarla istedadlı gənc, Azərbaycan futbolunun uğurlu gələcəyi üçün yetişdirilir. Yaşının az olmasına baxmayaraq, artıq bir neçə ildir ki, komandasının kapitanıdır. Kapitanlıq isə yalnız qolunda sarğı daşımaq deyil. Kapitan olmaq komanda yoldaşlarına nümunə olmaq, çətin anlarda ruhdan düşməmək, məğlubiyyət zamanı məsuliyyətdən qaçmamaq, qələbə zamanı isə komandanın uğurunu hər kəsin zəhməti kimi qiymətləndirməkdir.
Ramalın kapitan seçilməsi onun meydandakı liderlik xüsusiyyətlərinin göstəricisidir. O, komanda yoldaşlarını ruhlandırmağa, onlara dəstək olmağa və oyunun son saniyəsinə qədər mübarizə aparmağa çalışır. Futbolun gözəlliyi də elə bundadır: burada yalnız fərdi istedad deyil, komanda ruhu, qarşılıqlı etimad və bir məqsəd uğrunda mübarizə əsasdır.
Dünyamalı Ramalın digər üstün cəhətlərindən biri isə universal futbolçu olmasıdır. O, hücumçu, yarımmüdafiəçi və müdafiəçi mövqelərində çıxış edə bilir. Müxtəlif mövqelərdə oynamaq futbolçudan həm texniki hazırlıq, həm oyun düşüncəsi, həm də taktiki baxımdan çeviklik tələb edir. Ramalın bir neçə mövqedə özünü sınaması onun futbola yanaşmasının geniş olduğunu göstərir. O, meydanın müxtəlif hissələrində komandasına fayda verməyə çalışır.
Gənc futbolçunun idman həyatında iştirak etdiyi yarışların da xüsusi əhəmiyyəti var. Ramal son illərdə həm klub, həm məktəblərarası Respublika çempionatlarında, həm də xarici ölkələrdə təşkil olunan müxtəlif futbol turnirlərində iştirak edib. Belə yarışlar gənc futbolçular üçün yalnız medal qazanmaq imkanı deyil. Bu turnirlər onların təcrübə toplaması, fərqli oyun üslubları ilə tanış olması, müxtəlif rəqiblərlə qarşılaşması və öz imkanlarını daha yaxşı dərk etməsi baxımından mühüm məktəbdir.
Ramalın keçirdiyi oyunlarda vacib qolları və məhsuldar ötürmələri ilə yadda qalması da onun komandaya verdiyi töhfənin göstəricisidir. O, müxtəlif yarışlarda medal və mükafatlara layiq görülüb. Lakin hər bir gənc idmançı üçün qazandığı medal qədər, həmin medala aparan yol da qiymətlidir. Çünki uğurun arxasında saysız-hesabsız məşqlər, yorğunluq, təkrarlar, səhvlərdən nəticə çıxarmaq və yenidən meydana qayıtmaq dayanır.
Ramalın futbol həyatında ailəsinin dəstəyi xüsusi yer tutur. Uşağın hər hansı sahədə uğur qazanması üçün istedad qədər ona inanan insanların olması da vacibdir. Gənc futbolçu özü də atasının onun futbol yolundakı böyük dəstəyini xüsusi qeyd edir. Atasının məşqlərdə və oyunlarda onu tək qoymaması, daim yanında olması, ona inanması və çətin anlarda ruh yüksəkliyi verməsi Ramal üçün böyük mənəvi dayaqdır.
Bir uşağın uğurunda ailənin dəstəyi bəzən görünməyən, amma ən güclü amillərdən biridir. Məşqçinin verdiyi texniki bilik, akademiyanın yaratdığı imkanlar və futbolçunun öz zəhməti ilə yanaşı, ailənin mənəvi dəstəyi də onun inkişafında mühüm rol oynayır. Ramalın atasının onun yanında olması bu mənada təqdirəlayiq nümunədir. Gənc futbolçunun “Bu yolda mənim ən böyük dəstəkçim atam olub” sözləri onun ailəsinə olan sevgisinin və minnətdarlığının ifadəsidir.
Dünyamalı Ramalın arzuları da yaşından böyükdür. Onun ən böyük istəyi gələcəkdə peşəkar və tanınmış futbolçu olmaq, böyük arenalarda Azərbaycanı layiqincə təmsil etməkdir. Bu arzu sadəcə məşhur olmaq istəyindən ibarət deyil. Burada Vətən sevgisi, milli formanı geyinmək, Azərbaycanın bayrağını beynəlxalq arenalarda dalğalandırmaq və ölkəsini layiqincə təmsil etmək kimi böyük məqsəd var.
Ramal deyir: “Futbol mənim üçün sadəcə idman növü deyil, ən böyük arzularımdan biridir. Qarşıma qoyduğum məqsədlərə çatmaq üçün daha çox çalışmaq istəyirəm. Ən böyük arzum məşhur futbolçu olmaq, böyük arenalarda Azərbaycanı layiqincə təmsil etmək və ölkəmin bayrağını beynəlxalq yarışlarda dalğalandırmaqdır.”
Bu sözlərdə bir yeniyetmənin böyük arzusu, özünə inamı və gələcəyə baxışı hiss olunur. Əlbəttə, böyük arenalara gedən yol uzun və çətindir. Qarşıda daha çox məşq, daha ciddi rəqabət, daha ağır oyunlar və müxtəlif sınaqlar var. Lakin böyük məqsədlərə gedən yolda əsas məsələ yalnız istedad deyil, həmin istedadı zəhmətlə müşayiət etməkdir.
Dünyamalı Ramalın hekayəsi əslində yalnız bir gənc futbolçunun hekayəsi deyil. Bu, arzusu olan hər bir uşağın hekayəsidir. Hər bir uşaq öz dünyasında bir qəhrəmandır. Onun kiçik görünən arzuları gələcəkdə böyük uğurlara çevrilə bilər. Bu gün həyətdə futbol oynayan, sabah akademiyada məşq edən uşaq illər sonra Azərbaycanın milli formasını geyinərək beynəlxalq arenada meydana çıxa bilər. Bunun üçün ona inam, düzgün istiqamət və davamlı dəstək lazımdır.
“Qalibin yaşı olmur” ifadəsi də məhz belə uşaqlar üçün söylənilə bilər. Qələbənin yaş həddi yoxdur. Əsas olan insanın qarşısına məqsəd qoyması və həmin məqsədə çatmaq üçün əzmlə çalışmasıdır. Dünyamalı Ramal hələ yolun başlanğıcındadır. Onun qarşısında böyük futbol dünyası, yeni yarışlar, yeni rəqiblər və yeni imkanlar var. Bu yolda hər oyun onun üçün yeni dərs, hər məşq yeni təcrübə, hər uğur isə daha böyük hədəflərə aparan pillədir.
Sumqayıt Futbol Akademiyasının U-14 komandasında kapitan kimi çıxış edən Ramal artıq öz kiçik futbol hekayəsinin qəhrəmanına çevrilib. Lakin bu hekayənin ən maraqlı səhifələri hələ qarşıdadır. Bu gün onun əlində futbol topu, ürəyində böyük arzular, yanında ailəsinin dəstəyi və arxasında məşqçilərinin zəhməti var. Qarşıda isə daha böyük meydanlar dayanır.
Bir uşağın gözlərində gələcəyi görmək mümkündür. Dünyamalı Ramalın gözlərində isə futbol sevgisi, qələbə əzmi və Azərbaycanı böyük arenalarda təmsil etmək arzusu görünür. Bu arzunun reallaşması üçün ona ən çox lazım olan şeylərdən biri özünə inamdır. İstedad varsa, zəhmət varsa, məqsəd varsa və insan yolundan dönmürsə, böyük uğurlar üçün imkan da yaranır.
Dünyamalı Ramala bu uzun futbol yolunda uğurlar arzulayırıq. Arzu edirik ki, bu gün Sumqayıt meydanlarında top dalınca qaçan kiçik qəhrəman gələcəkdə böyük stadionların alqışlarını qazansın. Azərbaycan futbolunun gələcəyində öz sözünü desin, milli komandamızın formasını şərəflə geyinsin və üçrəngli bayrağımızı dünyanın müxtəlif arenalarında dalğalandırsın.
Çünki hər kəs öz hekayəsinin qəhrəmanıdır. Hər böyük yol kiçik bir addımla başlayır. Dünyamalı Ramalın böyük futbol yolunun ilk addımları isə artıq atılıb. İndi əsas məsələ bu yolu inamla, səbrlə, zəhmətlə və sevgi ilə davam etdirməkdir.
Kiçik qəhrəmanın Böyük uğurları hələ qarşıdadır...
Bu yolda ona böyük nailiyyətlər arzusu ilə...
Hürü Hacızadə
Yazıçı-publisist
“Qızıl qələm” mükafatçısı
Fərid Faiqoğlu
Xezertv.info-nun rəhbəri,
AJB-nin üzvü
