Yaponiyada sərnişin təyyarəsinin pilot kabinəsində görünən ilan uçuşun ləğvinə səbəb olub.
“Qafqazinfo” xəbər verir ki, təxminən 40 santimetr uzunluğunda olan sürünən 24 saatadək davam edən axtarışdan sonra salonun arxa hissəsindəki xalçanın altında tapılıb.
Hadisə Fukuoka hava limanından Kaqoşimaya uçmağa hazırlaşan “Japan Air Commuter” aviaşirkətinə məxsus təyyarədə baş verib. Uçuşdan əvvəl pilotlar kabinədə kiçik ilan gördüklərini bildiriblər. İlkin axtarışlara baxmayaraq, onu tapmaq mümkün olmadığından təhlükəsizlik məqsədilə uçuş ləğv edilib. Nəticədə 43 sərnişinin səyahət planları pozulub.
Texniki heyət kabinənin arxa hissəsində dəhliz xalçasını qaldırarkən ilanın onun altında gizləndiyini aşkar edib. Mütəxəssislər onun Yaponiyada geniş yayılmış zəhərsiz zolaqlı ilan növünə aid olduğunu müəyyənləşdiriblər. İlan tutularaq müvafiq qurumlara təhvil verilib.
Sürünənin təyyarəyə necə daxil olduğu hələ də məlum deyil. Aviaşirkət belə bir hadisə ilə əvvəllər qarşılaşmadığını bildirib.
Hadisədən sonra təyyarənin elektrik naqilləri və digər avadanlıqları yoxlanılıb. Zəruri təhlükəsizlik yoxlamaları başa çatdıqdan sonra təyyarə yenidən istismara qaytarılıb.
