Fransada, əsasən, heyvanlarda rast gəlinən Şamonda virusuna ilk dəfə insanda yoluxma halı aşkarlanıb. Oktyabrın əvvəlində Lion şəhərində vəfat edən xəstənin virusa ağcaqanad sancması nəticəsində yoluxduğu deyilir.
“Qafqazinfo” xəbər verir ki, Fransa Səhiyyə Nazirliyi xəstənin başqa bir ciddi xəstəlikdən müalicə aldığını və virusla əlaqəli nevroloji ağırlaşmalar keçirmiş ola biləcəyini bildirib.
Rəsmilər hadisənin immun sistemi ciddi zəifləmiş şəxsdə baş verdiyini və hazırda ictimaiyyət üçün risk olmadığını vurğulayıblar.
Əsasən, mal-qarada rast gəlinən virus ağcaqanadlar vasitəsilə yayıla, qoyun, keçi, alpaka və atlara da yoluxa bilər.
Avropa Xəstəliklərin Qarşısının Alınması və Nəzarəti Mərkəzi virusun insana necə keçdiyini araşdırır. İyulun sonlarından etibarən virus Avropanın bir sıra ölkələrində ferma heyvanlarında aşkarlanıb. Hadisə ilə bağlı Ümumdünya Səhiyyə Təşkilatına da məlumat verilib.
