Araşdırmaçı jurnalist Cavanşir Həsənli “Bakı Metropoliteni” QSC-nin rəisi Zaur Hüseynovun xaricdəki ailə biznesi haqda ilginc faktlar paylaşıb.
“Maliyyə nazirliyinin açıqlamasına görə, pandemiyadan ziyan çəkən dövlət şirkətlərinə maliyyə dəstəyi çərçivəsində “Bakı Metropoliteni”nə 2 mln. 600 min manat ilkin maliyyə dəstəyi göstərilib.
Metro işləmir, bəs pullar hara gedir?
Aşağıdakı sənədlər bu sualın cavabıdır. “Bakı Metropoliteni”nin rəisi Zaur Hüseynovun Londonda yaşayan 28 yaşlı oğlu Həbib Hüseynzadə ötən ay İngiltərədə böyük həcmdə yeni investisiya müqaviləsi imzalayıb.
İyunun 29-da bununla bağlı razılaşma əldə olunub, iyulun 21-də müqavilənin tələblərinə uyğun olaraq ödəmə Britaniyanın Barclay’s Bank UK PLC bankı vasitəsilə icra olunub. 41 səhifəlik müqavilənin şərtləri əsasında vəsaitin həcmi və hansı məqsədlə köçürülməsinin detalları məxfi saxlanılır.
Metropoliten rəisinin oğlu tikinti və daşınmaz əmlak biznesi ilə məşğul olur, indiyədək Callington yaxınlığında Downgate-də böyük ərazini satın alaraq, çoxsaylı evlər tikib, satışa çıxarıb.
Zaur Hüseynov 27 fevral 2014-cü il tarixli 290 saylı Sərəncamı ilə “Bakı Metropoliteni” Qapalı Səhmdar Cəmiyyətinin sədri vəzifəsinə təyin edilib. Oğlu Həbib Hüseynzadə PINNACLE WEST LIMITED-i 2016-cı ilin fevralında, 24 yaşında təsis edib”.
P.S. Metropoliten rəisi milyonları mənimsəyə bilər, amma Lerikdə bir işsiz gənc xoruz oğurlasa dərhal onu qanunla cəzalandırıb 4 il azadlıqdan məhrum edərlər. Necə deyərlər, "QANUN İNSANLAR ÜÇÜNDÜR, ADAMLAR ÜÇÜN DEYİL!".
