Dövlət başçısı İlham Əliyev “CNN Türk” televiziya kanalına müsahibəsində 30 illik işğal, 44 günlük İkinci Qarabağ müharibəsi, eyni zamanda, postmünaqişə dövründə dünya dövlətlərinin ikili siyasətinin yaratdığı problemlərə diqqəti yönəldərək Ermənistana və ona havadarlıq edən dövlətlərə mesajlarını ünvanladı. 30 ilin reallıqları ədalətə maraqların arxasından baxan dövlətlərə “məlum” olmasa da beynəlxalq hüququn norma və prinsiplərini həyata keçirdiyi siyasətin önündə saxlayan, haqqın, ədalətin yanında olanlara bəllidir. Hazırda tarixə qovuşan Dağlıq Qarabağ münaqişəsinin həllində vasitəçilik missiyasını yerinə yetirmək məqsədilə yaradılan ATƏT-in Minsk qrupunun həmsədrləri 28 illik fəaliyyətləri dövründə bir dəfə də olsun işğalçını adı ilə çağırmadılar, amma məsələnin danışıqlar yolu ilə həllinin mümkünlüyünü bildirməklə imitasiya naminə aparılan danışıqlara dəstəkləri ilə Ermənistana vaxt qazandılar. İşğalçı dövlət bu müddət ərzində silahlandırıldı, işğal etdikləri torpaqlarımızda qurduqları istehkamlarla bu əraziləri geri qaytarmaq istəmədiklərini təsdiqlədilər. Bu gün də oxşar proseslər cərəyan etsə də Vətən müharibəsində “Dəmir yumruq” əməliyyatının verdiyi dərslər unudulmamalıdır.Cənab İlham Əliyevin müsahibədə diqqət göstərdiyi əsas məsələlərdən biri Azərbaycanla Ermənistan arasında sülh müqaviləsinin gündəmdə olması, işğalçı dövlətin müxtəlif bəhanələrlə bundan yayınmasıdır: “Ermənistan ya buna hazır deyil, ya da bunun əleyhinədir. Ölkə Prezidentinin bəyan etdiyi kimi, bu böyük yanlışlıq olar və onlar özləri də peşman olacaqlar.
Təbii ki, ölkəmiz öz siyasətini qarşı tərəfin atacağı addıma uyğun aparacaq. Əgər Ermənistan Azərbaycanın bütün dünya tərəfindən tanınan ərazi bütövlüyünü tanımağa hazırdırsa, onda bölgəyə uzunmüddətli sülh gələcək. İşğalçılıq siyasəti ucbatından bütün layihələrdən kənarda qalan, iqtisadi böhran icərisində çabalayan Ermənistan əməkdaşlıq yolu ilə özünü düşdüyü ağır vəziyyətdən xilas edə bilər.Ermənistan baş nazirinin Azərbaycanla danışıqlara hazır olduğunu bildirməklə yanaşı, ATƏT-in Minsk qrupundan təklif gözlədiklərini dilə gətirməsi yenə də Vətən müharibəsindən əvvəlki vəziyyətə, yəni Minsk qrupu həmsədrlərinin maraqlarına uyğun addımların atılmasına qayıtmaq istəklərini nümayiş etdirir. Amma Ermənistan dövlət başçısı İlham Əliyevin “Biz bu təklifi masa üzərində əbədi saxlamalı deyilik” mesajından dərs almalıdır. Reallıqlar Ermənistanın dağıdıcı, Azərbaycanın qurucu obrazını təqdim edir. “Ermənilərin 30 ilə yaxın dövrdə işğal altında olan torpaqlarımızda törətdikləri dağıntılar, hətta 10 noyabr üçtərəfli Bəyanatına uyğun olaraq Kəlbəcər, Ağdam və Laçın geri qaytarılanda bu əraziləri boşaldarkən etdikləri vəhşiliklər dünyanın gözü qarşısında baş verdi. Halbuki ermənilər həmin razılaşmaya görə Kəlbəcəri noyabrın 15-də boşaltmalı idilər. Azərbaycan yenə də humanizm siyasətinin imkanlarından istifadə etdi. Ermənilər bu addımın qarşılığında apara bildiklərini apardılar, apara bilmədiklərini yandırdılar, hətta ekoloji terror törətdilər. Budur, ATƏT-in Minsk qrupundan sülh müqaviləsinin imzalanması ilə bağlı təklif gözləyən mənfur düşmənin əsl siması.
Cənab Prezident İlham Əliyevin “CNN Türk” televiziya kanalına müsahibəsində bəyan etdiyi kimi yolların açılması, Zəngəzur dəhlizinin yaradılması, bütün ticarət əlaqələrinin bərpası, yəni Cənubi Qafqazda uzun fasilədən sonra sülhün təmin edilməsi bizim maraqlarımıza cavab verir. Dövlət başçısının qeyd etdiyi kimi bu, Ermənistanın da maraqlarına cavab verir. Çünki onlar da dəmir yolu ilə həm İranla, həm Rusiya ilə əlaqə yarada bilərlər. Bu günə qədər bu əlaqə yoxdur və onlar üçün də yeni fürsətlər ortaya çıxacaq. Beləliklə, əgər Ermənistan bundan sonra normal şəkildə inkişaf etmək istəyirsə bir anlıq bu reallıqla barışmalı, 10 noyabr üçtərəfli Bəyanatında öz əksinin tapmış bu məsələnin həlli istiqamətində üzərinə düşən öhdəlikləri yerinə yetirməlidir. Təbii ki, bu dəhlizin açılması bir çox məqsədlərə, hədəflərə xidmət göstərir. Cənab Prezidentin müsahibəsində vurğulandığı kimi bu dəhlizin açılması ilə Azərbaycanla Türkiyə yeni bir nəqliyyat layihəsi ilə birləşəcək. Məlum olduğu kimi, dörd il əvvəl Bakıda Bakı-Tbilisi-Qars dəmir yolunun rəsmi açılış mərasimi oldu və Azərbaycan bu dəmir yolu sayəsində Türkiyə ilə birləşdi. Zəngəzur dəhlizi isə ikinci bir birləşmə istiqaməti olacaq. Beləliklə, ölkəmiz üçün yeni fürsətlər ortaya çıxacaq. Eyni zamanda, Azərbaycan öz ayrılmaz hissəsi olan Naxçıvan Muxtar Respublikası ilə də dəmir yolu ilə birləşəcək. Bundan başqa, Azərbaycan tələb edir ki, Ermənistanın nəzarəti altında olan Qərbi Zəngəzur ərazisində, Mehri bölgəsində avtomobil yolu da çəkilsin. Çünki Zəngəzur dəhlizinin tam fəaliyyəti üçün həm dəmir yolu, həm avtomobil yolu olmalıdır. Avropa İttifaqının da müsbət yanaşdığı Zəngəzur dəhlizininin açılması region ölkələri üçün də yeni fürsət yaradacaq. Ortada bir reallıq var və Ermənistanın o reallığa uyğun addım atmaqdan başqa çarəsi yoxdur. Yəni, Ermənistan vaxt itirmədən Azərbaycanla sülh müqaviləsi imzalamalı və Azərbaycanın dünya tərəfindən tanınan ərazi bütövlüyünü tanımalıdır. Əks təqdirdə isə Ermənistanı xoş gələcək gözləmir.
İmişli RİHB Aparatı İctimai-siyasi və humanitar məsələlər şöbəsinin müdir müavini,
dini qurumlarla iş təşkilatçısı: Rüfət Muradov
