İranın Ali dini lideri Xameneyinin Azərbaycandakı nümayəndəsi Ocaq Necatın Bakıda fəaliyyət göstərən ofisi bağlanıb.
Dünən günorta saatlarında polis əməkdaşları və digər mütəxəssislərin iştirakı ilə ofisin yerləşdiyi Hüseyniyyə məscidinə baxış keçirilib və ibadət yerinin fəaliyyəti dayandırılıb.
Daxili İşlər Nazirliyinin Mətbuat xidmətinin rəisi, polis polkovniki Ehsan Zahidov “Qafqazinfo”nun sorğusuna cavab olaraq bildirib ki, təhlillər nəticəsində müəyyən edilib ki, şəhərin bir neçə yerində son günlər COVID-19 virusuna yoluxanların sayı artıb:
“Həmin yerlərdən də birinin Hüseyniyyə məscidi olduğu məlum olub. Buna görə də həmin yerlər, o cümlədən də məscidin fəaliyyəti dayandırılıb. Hazırda orada epidemioloji xidmət tərəfindən müvafiq tədbirlər görülür”.
Ocaq Necatın ofisinin Gəncə şəhərindəki nümayəndəliyinin də bağlandığı da bildirilir.
Azərbaycan-İran münasibətlərinin gərginləşməsi fonunda bu hadisənin baş verməsi təsadüfi görünmür. Belə ki, rəsmi Bakının bu addımı İran rejiminin Azərbaycana qarşı hədələyici davranışına cavab olduğu ehtimal edilir.
Xatırladaq ki, Ocaq Necat İranın ali rəhbərinin xüsusi nümayəndəsi kimi Azərbaycanda 1996-cı ildən təmsil olunur.
Onun fəaliyyətinin şübhəli olması ilə bağlı mütəmadi olaraq məlumatlar yayılıb. Ocaq Necatın rəhbərlik etdiyi ofisin əslində, islam inqilabı ideyalarını Azərbaycanda yaymaq üçün missionerlik fəaliyyətlə məşğul olduğu bildirilir. Eyni zamanda, Ocaq Necatın İran kəşfiyyat orqanları ilə əlbir olduğuna dair də iddialar var.
Ona görə də mütəmadi olaraq, bu nümayəndəliyin bağlanması sosial sifariş kimi səslənib. Digər bir fikir isə bundan ibarətdir ki, Ocaq Necatın fəaliyyəti diplomatik etiket qaydalarının pozulmasıdır. Azərbaycanla İran arasında diplomatik əlaqələr mövcud olduğu halda Ayətullah Xameneyinin dini nümayəndəliyinin Azərbaycanda ayrıca təmsil olunmasına ehtiyac yoxdur.
Təhlükəsizlik məsələləri üzrə ekspert İlham İsmayıl Cebhe.info-ya açıqlamasında qeyd etdi ki, Ocaq Necatın ofisininin bağlanması çox düzgün və zəruri addımdır:
“Höccətül-islam seyyid Ocaq Necatın ofisi sözün həqiqi mənasında dina bayrağı altında Azərbaycanda şəriət dövlətinin qurulmasının təbliğatını aparıb. Milli Təhlükəsizlik Nazirlyində işlədiyim müddətdə, Azərbaycanın dövlət müstəqilliyini qazanmasının ilk illərindən ölkəmizə gələn Ocaq Necat burada radikal şiə dindarlığını təbliğ edib, İran mədrəsələri yaradıb.
Həmin mədrəsələrdə dərs deməyə gələn üləmalar Azərbaycanın müstəqilliyini qəbul etməyərək yalnız şəriət dövləti yaratmaq ideyasını təbliğ ediblər. Ocaq Necat bu işlərlə şəxsən mənim özümün işlədiyim Şirvan bölgəsində, Gəncədə də məşğul olub. Ona görə də Ocaq Necatın dindən daha çox İranın xüsusi xidmət orqanları ilə birbaşa bağlantısı olması, hətta kadr əməkdaşı olması barədə məlumatlar var.
Hesab edirəm ki, bu qərar çoxdan verilməli idi. İran faktiki olaraq, Azərbaycanla “soyuq müharibə” həddinə gəlib çatıb. Bu məsələdə İran özünün əsl simasını göstərir. Vaxtilə Azərbaycanda İmam Xomeyni İmdad Komitəsi də fəaliyyət göstərirdi. Bu qurum perspektivdə Azərbaycanı şəriət dövlətinə çevirmək üçün İran tərəfdarlarının sayını artırmaqla məşğul idi. Biz zamanında çox tutarlı faktlar təqdim etdik. Mən “Açıq separatizmin məxfi tərəfləri adlı” məqalə də yazmışdım. Nəticədə, Nazirlər Kabineti Azərbaycanda İmam Xomeyni İmdad Komitəsinin fəaliyyətini qadağan etdi.
İranın özbaşınalığına çox dözmüşük. Amma İran rejiminin cavabını verməliyik. Ona görə də Azərbaycanın Ocaq Necatın rəhbərlik etdiyi dini nümayəndəliyi bağlamasını doğru addım hesab edirəm”.
İlham İsmayıl hesab edir ki, Azərbaycan İranla dilomatik münasibətləri və ticarət əlaqələrini davam etdirməlidir. Amma İran tərəfindən Azərbaycanın dövlət və milli maraqlarına zidd olan hərəkətlərinə cavab verilməlidir:
“Səbrin də bir həddi var. Çox şadam ki, artıq dövlət səviyyəsində rəsmi şəkildə İreanın cavabı verilir”.
Qeyd edək ki, Azərbaycan Prezidenti İlham Əliyev Cəbrayıl rayonuna səfəri zamanı Araz çayı sahilində İrandan Azərbaycan əleyhinə yönəlmiş təxribatçı çağırışlara sərt münasibətini ifadə edib.
"Biz xoş niyyət göstəririk. Amma o demək deyil ki, biz özümüzə qarşı əsassız ittihamları qəbul edəcəyik. Mən bunu burada - Cəbrayılda, bax, burada Araz çayının kənarında deyirəm, Azərbaycan xalqına və bütün dünyaya, bizə qarşı əsassız ittihamlar cavabsız qalmayacaq", - İlham Əliyev deyib.
“Biz bu ittihamları rədd edirik, qəbul etmirik və sübutlar tələb edirik”, - Azərbaycan Prezidenti vurğulayıb.
Onun sözlərinə görə, bu yaxınlarda “İranın hansısa əyalət mollası ağzını açıb Azərbaycana qarşı iftiralar uyduranda”, Bakı buna fikir verməyib.
“Amma sonra, əfsuslar olsun ki, rəsmi şəxslər bizə qarşı əsassız ittihamlar irəli sürməyə başlamışlar. Guya ki, Azərbaycan bu bölgələrə İsraili gətirib. Gözlərini açsınlar, görsünlər. Bunlar İsraili burada harada görüblər?! Burada bir adam da yaşamır. Burada bir bina da yoxdur. Sübutlar var? Yoxdur. Sübutlar yoxdursa, hər kəs gərək dediyi sözlərə görə, cavabdehlik daşısın. Biz imkan verə bilmərik ki, bizə qarşı kimsə əsassız iftira uydursun”, - dövlət başçısı İlham Əliyev belə deyib.
İlham İsmayılın sözlərinə görə, Azərbaycan Prezidentinin və Xarici İşlər Nazirliyininin İrana cavabı vaxtında, düzgün verilmiş reaksiyadır:
“Xarici İşlər Nazirliyininin mətbuat katibi Leyla Abdullayevanın açıqlamasında çox konkret olaraq qeyd edilir ki, İran qanunsuz iqtisadi fəaliyyətlə və narkoticarətlə məşğul olur. Azərbaycan Qafan-Gorus yoluna nəzarəti gücləndirməklə həmin narkoticarətin qarşısını aldı.
İran ideoloji dövlətdir və islam inqilabı doktrinasını müsəlman ölkələrinə yaymağa çalışır. Nəticədə, qonşu dövlətlərlə münasibətlərində gərginlik yaşanır. İran Azərbaycan, Türkiyə, Əfaqınstan, Pakistan, İraq və Ərəbistan yarımadasındakı müsəlman ölkələri ilə gərgin münasibətindədir.
Ancaq xristian ölkələri ilə münasibətləri normaldır. Bunlar islamı ixrac etmək adı altında fars rejimini ətraf regiona yaymaqla məşğuldur. Bu rejimin başında dayananalar 40 ildir İran xalqına bədbəxtlik gətiriblər”.
Ekspert bildirdi ki, İranın maraqlarına görə, Azərbaycan İsraillə ikitərəfli diplomatik qurmamaq qərarını dəyişməlidir. Tezliklə İsraildə Azərbaycan səfirliyi açılmalıdır.
