“Kollektiv Təhlükəsizlik Müqaviləsi Təşkilatının tabeliyindəki ordunun nə zamansa Qazaxıstandan çıxcağını gözləyirəm. Amma Qazaxıstan prezidenti Tokayevin elan etdiyi kimi, 10 gün müddətində ordunun ölkədən tam çıxacağına inanmıram. Əvvəla, Kollektiv Təhlükəsizlik Müqaviləsi Təşkilatı adlanan qurum adından Qazaxıstana daxil olan ordunun 90 faizindən çoxu ruslardan ibarətdir. Digər tərəfdən, Qazaxıstan prezidentinin bəyanatından sonra Rusiya prezidentinin, eləcə də Rusiya müdafiə nazirinin bəyanatını eşitdik. Bu bəyanatlarda müddət göstərilmir. Sadəcə, “Qazaxıstanda vəziyyət normallaşandan sonra”,- ifadəsinə rast gəlinir və bu, qeyri-müəyyən ifadədir”.
Teref.az xəbər verir ki, bu sözləri Reyting.az-ın Kollektiv Təhlükəsizlik Müqaviləsi Təşkilatı (KTMT) adı altında Rusiya ordusunun yaxın 2 həftə ərzində Qazaxıstandan çıxıb-çıxmayacağı ilə bağlı sualına cavabında analitik Oqtay Qasımov deyib.
O. Qasımov bildirib ki, prezident Tokayevin qeyd etdiyi müddətdə KTMT ordusunun Qazaxıstandan çıxacağı inandırıcı deyil. Onun qənaətincə, mümkündür ki, bu, bir neçə aydan sonra baş versin: “Bu da qazax cəmiyyəti və hakimiyyətinin münasibətindən asılı olacaq. Amma təcrübəyə baxdıqda görürük ki, Rusiyanın daxil olduğu ölkədən tezliklə və öz xoşu ilə çıxmasına rast gəlinmir”.
Analitik ehtimal edir ki, Tokayevin “iki gündən sonra KTMT qüvvələri Qazaxıstanı tərk etməyə başlayacaq və bu proses 10 günə tamamlanacaq”,- açıqlaması daha çox cəmiyyəti sakitləşdirmək məqsədi güdür: “Mümkündür ki, KTMT-dən olan daha az qüvvələrə malik Ermənistan, Qırğızıstan və Tacikistan ordusu Qazaxıstandan çıxacaq. Amma Rusiyadan gələn və sayı 2500 civarında olan hava-desant qüvvələrinin dərhal ölkəni tərk edəcəyini düşünmürəm. Üstəlik, burada KTMT “sülhməramlılarına” rəhbərlik edən şəxs Rusiya Müdafiə Nazirliyinin hərbi-hava desant qüvvələrinin komandanıdır. Bu da müəyyən sual doğuracaq məqamdır”.
O. Qasımov əlavə edib ki, Rusiya qüvvələrinin Qazaxıstanı yaxın zamanlarda tərk edəcəyini düşünmürəm. O, bunu Tokayevin məlum açıqlamasından sonra Moskvadan verilən bəyanatlarla əsaslandırır.
