"Raduasiya fizikadır, o, heç bir statusa və ya poqona baxmır"
Rusiya öz qoşunlarını Çernobıl AES- dən çıxarır.
Moderator.az xəbər verir ki, bu barədə martın 30- da brifinq zamanı Pentaqonun nümayəndəsi bəyan edib. Məlumatı "Frans- Press" agentliyi yayıb.
Məmurun verdiyi məlumata görə, Rusiya qoşunları Çernobıl AES- dən Belarus tərəfə istiqamət götürüb.
Bu arada Belarusun Qomel şəhərindəki radiasiya təbabəti və insan ekologiyası mərkəzinə radiasiya şüalanmasına şübhəli bilinən rusiyalı hərbi qulluqçular gətirilib.
Bu barədə Çernobıl turoperatorları Assosiasiyasının rəhbəri Yaroslav Yemelyanenko məlumat verib.
"Qomeldə Respublika elmi- praktiki radiasiya təbabəti və insan ekologiyası mərkəzinə yeddi PAZ maşını gəlib. Fotoşəkillərdən göründüyü kimi, maşınlarda insanlar var. Qeyd edək ki, bu mərkəzə müntəzəm olaraq rusiyalı əsgərləri gətirirlər", Yemelyanenko Belarus "Telegram- kanal"ın məlumatından iqtibas gətirib.
Assosiasiya rəhbəri vurğulayıb ki, "yadlaşma zonası"nda müəyyən qaydalar mövcuddur və Rusiya hərbi qulluqçuları çox güman ki, bu qaydaları müntəzəm olaraq pozub.
Yemelyanenkonun sözlərinə görə, yadlaşma zonasında olmaq Rusiya hərbi qulluqçularının sağlamlığına son dərəcə neqativ təsir göstərib.
"Ona görə ki, radiasiya fizikadır, o, heç bir status və ya poqona baxmır. Komandanlıqda və ya əsgərlərdə azacıq intellekt olsaydı, belə nəticələrdən qaçmaq mümkün olardı", - Yemelyanenko yazıb.
Çernobıl AES əməkdaşlarının verdiyi məlumata görə, rusiyalı hərbçilər ağır zirehli texnika ilə təhlükəli zonada yerləşən "Kürən meşə" adlanan massivdən keçərək özlərini riskə məruz qoyub. Şahidlərin sözlərinə görə, rusiyalılar radioaktiv toz buludlarını havaya sovurub, bundan sonra təhlükəsizlik sensorları radiasiyanın normadan artıq olduğunu göstərib.
Çernobıl AES- in əməkdaşları iddia edir ki, hərbçilər təhlükəli zonada radiasiya, kimyəvi və bioloji müdafiə geyimlərində olmadığından özlərini radiasıya şüalanması riskinə məruz qoyub.
"Bu, əsgərlər üçün özünəqəsd idi, çünki onların udduqları radioaktiv toz orqanizmdə şüa xəstəliyi törədə bilər. Hərbi maşınların böyük karvanı bizim obyektin birbaşa arxasındakı yoldan keçib və bu yol "Kürən meşə"nin yaxınlığından keçir", - həmsöhbətlər qeyd edib.
Xatırladaq ki, fevralın 24- də Rusiyanın Ukraynaya hərbi müdaxiləsinin ilk günü rusiyalı hərbçilər Kiyev vilayətindəki Çernobıl AES- i zəbt edib və personalını girov götürüb. O zaman Ukrayna Milli Akademiyasında bəyan edilib ki, rusiyalı hərbçilər radiasiya şəraitini pisləşdirib və yaxınlıqda yerləşən yaşayış məntəqələrini radiasiya təsirinə məruz qoyub.
