UTANIB YERƏ GİRƏSİ MƏNZƏRƏ
“Oğlumun cənazəsini Ukraynadan gətirmək üçün borca girdim, sələmə pul götürdüm. Heç bir dövlət orqanı bu işə yaxın durmadı”.
Bunu Bakupost.az -a Ukraynada döyüşlərdə həlak olan Elnur Həsənovun atası Elşən Həsənov deyib.
Bildirib ki, onun nəşinin gətirilməsi üçün müxtəlif aidiyyəti qurumlara müraciət etsə də, müsbət cavab ala bilməyib:
“Onun cənazəsinin gətirilməsi üçün Diasporla İş üzrə Dövlət Komitəsinə getdim, amma məni qəbul edən olmadı. Müdir orada yox idi, müavin də qəbul etmədi. Kor-peşman geri qayıtdım.
İcra hakimiyyətinin nümayəndələri ilə əlaqə saxladım, onlar da dedilər ki, bizlik bir iş deyil. Yazılı surətdə nazirliyə məktub göndərmişik, bizə cavab gəlməlidir.
Prezident Administrasiyasına kimi bütün qurumlar Elnurun Ukraynada həlak olduğundan xəbərdardır. Amma heç bir dövlət orqanı onun nəşinin Ukraynadan gətirilməsi işinə yaxın durmadı. Borca-xərcə girmişəm, sələmə pul götürmüşəm ki, oğlumun cənazəsini Vətənə gətizdirim. Orada qalsaydı, bizə ikiqat dağ olardı. Heç olmazsa, qəbri gözümüzün qabağında olsun. Ümid, təsəlli yerimiz bircə onun cənazəsinin Vətənə gəlib çıxmasıdır.
Hazırda oğlumun cənazəsi Polşa sərhədindədir. Polşadakı səfirliyimizdə onun sənədlərinin hazır olmasını gözləyirik. Dünən axşamdan demək olar ki, oradadır. Əgər bu gün hazır olsa, yəqin ki, sabah göndərərlər”.
Qeyd edək ki, Elnur Həsənov 1983-cü ildə Goranboy rayonun Qarasüleymanlı kəndində anadan olub. O, Vətən Müharibəsində könüllü iştirak edib. Soquvuşan, Füzuli, Qubadlı istiqamətində gedən döyüşlərdə olub. Sanitar köməkçisi kimi şəhidləri döyüş bölgəsindən çıxarmağa kömək edib.
Fəridə
Baku Post
