Dövlət Təhlükəsizliyi Xidməti Dövlət Gömrük Komitəsində yüksək vəzifəli şəxslər barəsində cinayət işini davam etdirir.
Bu çərçivədə tanınmış broker Əbülfəz Məlikov həbs edilib. O, dövlət büdcəsinə milyonlarla manat vergi və gömrük ödəmələrindən yayınmaqda və vəzifə saxtakarlıqlarında ittiham olunur. Səbail Rayon Məhkəməsində onun barəsində verilən təqdimata baxılıb və barəsində həbs qətimkan tədbiri seçilib. cebhe.info-ya açıqlamasında iqtisadçı Natiq Cəfərli deyib ki, cinayət işi çərçivəsində Səfər Mehdiyev də həbs edilə bilər:
"Gömrükdə həbslər, təmizləmə əməliyyatı çox güman ki, davam edəcək. Hətta Gömrük Komitəsinin sədrinə qədər də məsələ uzana bilər. Amma problemin kökü yerindəcə qalacaqsa, əvvəlki qaydada idarəetmə davam edəcəksə, başqa brokerlər, başqa Səfər Mehdiyevlər yaranacaq. Yəni problem bu sistemin özündədir. Gömrük sistemi müasir tələblərə də, gömrük fəlsəfəsinə də cavab vermir. Əgər qanunvericilik, gömrük rüsumları, oyun qaydaları dəyişməsə, növbəti mərhələdə təzə brokerlər yaranacaq, təzə Səfər Mehdiyevlər meydana çıxacaq. Ona görə də ilkin olaraq, Gömrük Komitəsinin fəaliyyət istiqamətləri dəyişdirilməlidir. Gömrük Komitəsinin fəaliyyətini tənzimləyən yeni qanunvericilik aktlarına, Gömrük Məcəlləsinə ehtiyac var. Bütün bunlar Gömrük Sisteminin şəffaflaşmasına xidmət etməlidir. Gömrük Komitəsinin ayrıca, müstəqil qurum kimi qalması da məntiqli deyil".
P.S. İşlədiyi müddət ərzində gömrük generalı Vüsal Novruzov da taladığı 6 milyard manat pulu könüllü olaraq geri qaytarmasa idi həbs oluna bilərdi. İndi növbə S.Mehdiyevdə və Əbülfəz Məlikovdadır.
