Ermənistanın siyasi hakimiyyəti ilə Qarabağdakı separatçı qurum arasında gərginlik artır. Bu məsələdə əsas rol oynayan şəxslərdən biri də Rusiyadan Qarabağa göndərilmiş milyarder Ruben Vardanyandır.
DİA.AZ-ın məlumatına görə, Demokratik İslahatlar Partiyasının sədri, Milli Məclisin deputatı Asim Mollazadə Reyting.az-a deyib ki, Ruben Vardanyanı Qarabağdakı erməni icmasında xaos yaratmaq üçün xüsusi hazırlayırlar: “Bundan sonrakı əsas plan İrəvana keçmək və Nikol Paşinyan hökumətini devirməkdir. Baş nazir Paşinyan və ətrafı isə bundan həm təşviş keçirir, həm də Vardanyan amilini zərərləşdirmək istəyir”.
Mollazadə xatırladıb ki, 1999-cu ildə Azərbaycan və Ermənistan arasında mümkün sülh danışıqları fonunda Ohanyan Ermənistan parlamentinə daxil olaraq erməni siyasəti üçün vacib sayılan fiqurlara sui-qəsd təşkil edib. Mollazadə bildirib ki, o zaman sülh istiqamətində müəyyən addımlar atılmışdı:
“Ermənistan parlamentinin gülləbaran edilməsində məqsəd sülhün qarşısını almaq idi. İndi Vardanyanın da əsas məqsədi mümkün Ermənistan-Azərbaycan sülhünün qarşısını almaq, Qarabağ ermənilərini daha ağır vəziyyətə salmaq və bu fonda İrəvana gələrək onun üçün yaradılan partiyada oturmaq, İrəvandakı radikal qruplarla birləşərək Paşinyan hakimiyyətini devirməkdir”.
Vardanyan planının perspektivinə gəlincə, Mollazadə diqqətə çatdırıb ki, 44 günlük savaşda məğlub olmasına baxmayaraq Ermənistan əhalisinin əksəriyyəti seçkilərdə Paşinyana səs verib, çünki o, sülh istəyirdi: “Yəni erməni xalqı keçmiş hakimiyyət nümayəndələrini, oliqarxları dəstəkləmirdi. İndi Vardanyanın arxasında xaricdə olan erməni diasporu, eləcə də regionumuzda sülhün yaranmasına qarşı olan dövlətlər dayanıb. Vardanyan özü isə çirkli pulların yuyulmasına paralel olaraq müəyyən şəbəkələrlə əlaqədədir. Onların məqsədi regionda müharibəni canlandırmaq, qarşılıqlı nifrəti artırmaq, ermənilərdə Türkiyə və Azərbaycana qarşı yenidən mənfi münasibət yaratmaqdır. Eyni zamanda Ermənistanda hakimiyyəti götürməkdir. Amma erməni seçicisi hələlik Paşinyan hökumətinə etimad nümayiş etdirir”.
