"Tək qadınam, hər şey üstümdədir. Çox istəyərdim bağım olsun, amma baxa bilmirəm. Bunun üçün kişi olmalıdır. Təklik məni bezdirmir, qızımla yaşayıram".
Bu sözləri Xalq artisti Məleykə Əsədova "Bağ mövsümü" verilişində deyib. Aktrisa ikinci dəfə ailə qurub-qurmayacağı ilə bağlı sualları cavablandırıb. Əsədova bildirib ki, qızı Gülərə görə heç vaxt bunu etməyəcək:
"Hərdən deyirsən "kişi kimi qadın". Qadınam, amma kişi qüdrətli qadınam. Kişilərin xətrinə dəyməsin, qadınlarımız daha qeyrətlidir. Əvvəlki zamanla müqayisədə, əsl kişilərin sayı indi azalıb.
Bütün həyatımı övladıma həsr etmişəm. Şükür buna, qızım xoşbəxt olsun, bəsimdir. Heç düşünmürəm ki, ikinci dəfə ailə qurum. Evimdə qız böyüdürəm. Evimə heç qohum olan kişi də gələ bilməz. Gələndə, gərək mən evdə olum".
