“Sərhəddə baş verən təxribat əsas diqqəti Rusiyanın üzərinə yönəldir. Avropa İttifaqı missiyasının nəticəsizliyi bir daha ortaya çıxdı. Toqquşma Paşinyanın Moskva səfərindən sonra baş verdi. Belə görünür ki, Nikol rusların istəyinin əleyhinə olaraq Qərb masasından qalxmaq istəmir və Moskva Paşinyanın da bundan əvvəlki təxribatda işarə verdiyi “beşinci kolon” üzərindən toqquşma yaradır”.
Globalinfo.az xəbər verir ki, bunu siyasi-şərhçi Asif Nərimanlı deyib.
Onun sözlərinə görə, iki məqam bu təxribatın Ermənistan hakimiyyətinin plana uyğun törətdiyi versiyasını önə çıxarır:
“Birincisi, Nikol bu dəfə “beşinci kolon”u yox, Bakını ittiham etdi.
İkincisi, Vaşinqtonda anlaşmayan tərəflər İrəvanın marağında olmadığı Brüssel və Moskva görüşünə hazırlaşır.
Ermənistan bu iki görüşü problem olaraq görür. Bunu Vaşinqtonda razılaşdırılmayan məqamlardan da görmək mümkündür. Sərhəd məsələsində İrəvan “29,8 min kvadratkilometr ərazi”ni saxlamaq istəyir; Qarabağ məsələsində separatizmin qalmasına çalışır”.
A.Nərimanlı deyib ki, Paşinyan Fransanın əsas moderatoru olacağı Kişinyov görüşündə bu məsələlər üzərindən qazanclı çıxmağa hazırlaşır, lakin bundan öncə keçiriləcək iki görüş onun planına uyğun gəlmir:
“Brüsseldə liderlər görüşəcək və Qarabağın Azərbaycanın daxili məsələsi olduğuna dair əvvəlki razılaşmalar yenidən aktuallaşacaq;
– Moskvada XİN rəhbərlərinin görüşündə üçtərəfli razılaşmalar müzakirə olunacaq, xüsusilə sərhədin hansı xəritələr üzərindən delimitasiya olunması ön plana çıxa bilər: Paşinyan “8 kəndə qarşılıq erməni kəndləri” iddiasını gündəmə gətirsə də, İrəvanın əsas istəyi “güzgü prinsipi”nin tətbiq edilməsi – orduların sərhəddə əvvəlki xətlərə çəkilməsidir;
Hər iki görüşdə İrəvanı çətinlik gözləyir. Və Bakı Kişinyov masasına əlini gücləndirmiş şəkildə əyləşə bilər.
Ermənistan sərhəd hücumu ilə Brüssel və Moskva danışıqlarının gündəliyini dəyişmək istəyir, Fransanın olacağı masaya qədər prosesi pozmağa çalışır və mümkündür ki, təxribatlar davam edəcək”.
Zaira Akifqızı
Globalinfo.az
