Yaxın zamanlarda "taxıl sazişi” ilə bağlı anlaşma əldə ediləcək”.
İfadetv.com bildirir ki, bunu Qaynarinfo-ya açıqlamasında bunu politoloq Natiq Miri Türkiyə prezidenti Ərdoğanla Rusiya prezidenti Putin arasında baş tutan görüşü şərh edərkən deyib.
"BMT ilə Türkiyənin birgə hazırladığı yeni saziş layihəsi mövcuddur. Burada da Rusiyanın şərtləri qismən nəzərə alınıb. Xüsusilə də Rusiyanın "Selxozbank”ının beynəlxalq pulköçürmə sistemi olan SWİT sisteminə yenidən qaytarılması məsələsi öz əksini tapıb. Rusiyanın bəzi kənd təsərrüfatı məhsullarının maneəsiz olaraq bazara çıxarılmasına qoyulan embarqonun aradan qaldırılması və idxal-ixrac prosesində iştirak edən gəmilərin sığorta lisenziyası ilə bağlı şərtlər də yeni layihədə nəzərə alınıb”, deyə Natiq Miri bildirib.
Politoloq qeyd edib ki, Türkiyə istəyinə nail olacaq:
"Çünki Rusiyanın da buna ehtiyacı var. Burada tək Ukrayna taxılının dünya bazarına çıxarılması məsələsi müzakirə predmeti deyil. Eyni zamanda, Rusiya taxılının Afrikaya satışı məsələsi də gündəmdədir ki, bununla bağlı Türkiyə konkret plan hazırlayıb. Bundan sonra Rusiya taxılı Türkiyəyə göndəriləcək, buradakı dəyirmanlarda una çevriləndən sonra, Afrikaya daşınma xərclərini Qətər həyata keçirəcək. Ötən dəfə Qərb üzərinə götürdüyü bəzi öhdəlikləri yerinə yetirməyib. Rusiya da birtərəfli qaydada sazişdən çıxıb”.
Qeyd edək ki, dünən Türkiyə prezidenti Rəcəb Tayyib Ərdoğanın Soçiyə səfəri fonunda Rusiya prezidenti Vladimir Putinlə görüşü olub. Görüşdə bir sıra məsələlər müzakirə edilsə də, əsas məqam "taxıl sazişi”ilə bağlı olub.
