ABŞ-də Donald Tramp administrasiyasının cinayətkar təşkilat kimi qiymətləndirdiyi və fəaliyyətinə xitam verdiyi USAID - Beynəlxalq İnkişaf Agentliyi ilə bağlı yeni təfərrüatlar, qalmaqallı məqamlar üzə çıxır. Belə ki, qurum müxtəlif ölkələrdə fərqli adlar altında fəaliyyət göstərib, yerli təşkilatları maliyyələşdirərək onlar vasitəsilə qeyri-qanuni fəaliyyətlərlə məşğul olub.
USAID artıq dünyanın 100-dən çox ölkəsində fəaliyyət göstərən və illik büdcəsi 50-60 milyard dollar olan şəbəkəyə çevrilib. Onun maliyyəsi ilə Azərbaycana qarşı da səsləndirilən iddialar saysız-hesabsızdır. Bu fəaliyyət daha çox separatizm və Ermənistanın daxilindəki revanşist qüvvələrin təşviqinə yönəlib.
Ötən ilin dekabrında Prezident İlham Əliyev “Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova müsahibəsindən çox keçməmiş Tramp administrasiyası USAID-in qadağan olunması barədə qərar qəbul edir. Dövlət başçısı həmin müsahibəsində vurğulamışdı ki, Azərbaycan mediası heç bir xarici mənbədən hətta bir faiz belə maliyyələşə bilməz.
USAID-in fəaliyyətinin əsas istiqamətlərindən biri müstəqil siyasət yürüdən ölkələrdə “beşinci kolon”lar formalaşdırmaq və onları maliyyələşdirmək olub. Necə deyərlər, bu sırada ən öndə gedənlərdən biri olub.
USAID-ə qarşı mübarizənin önündə gedənlərdən olan ABŞ Hökumətinin Səmərəliliyinin Artırılması İdarəsinin rəhbəri, “Tesla”, “SpaceX” şirkətlərinin və “X” sosial şəbəkəsinin sahibi İlon Mask ona qarşı ağır ittihamlar səsləndirib, bu təşkilatı hətta bioloji silah istehsalının maliyyələşdirilməsində ittiham edib. Maskın “X” hesabında bu mövzuda bir neçə paylaşım var. O, bütün bunlara görə USAID-i cinayətkar təşkilat adlandırır.
Beləliklə, təşkilatın cinayətkar əməllərinin ABŞ-də belə etiraf olunması özündə mühüm məqamlara işıq salmaqla yanaşı, artıq onun fəaliyyətinin sona çatdığını təsdiqləyir. USAID-in bir sıra ölkələrdə inqilablara sponsorluq etməsi, bir çox beynəlxalq media qruplarına böyük maliyyə dəstəyi verməklə müstəqil siyasət yürüdən dövlətlər barədə “müstəqil araşdırmalar” sifariş verməsi və beynəlxalq dezinformasiya kampaniyaları təşkil etməsi, ermənipərəst mövqeyi artıq təsdiqini tapmış faktlardır.
Gözləmək olar ki, Qərbin xarici ölkələrdə həyata keçirdiyi “rəngli inqilablar”ın əsas maliyyə qaynağı olan USAID barəsində cinayət işləri bir sıra qalmaqallı məqamları üzə çıxaracaq.
Yeri gəlmişkən, Azərbaycan rəhbərliyi hələ illər öncə USAID-in fəaliyyətindəki arzuolunmaz nüansları həm təşkilatın, həm də ABŞ rəhbərliyinin diqqətinə çatdırsa da, bu narahatlıqlara ciddi yanaşılmadı. İndi baş verənlər də Azərbaycanın haqlı olduğunu göstərdi. Gürcüstan və digər ölkələr də oxşar narahatlıqlarını ifadə edib. ABŞ-də hakimiyyətə gələn yeni komanda da USAID-in fəaliyyətini faktiki olaraq dayandırdı.
USAID-in fəaliyyət göstərdiyi regionlarda, xüsusilə də MDB məkanında müəyyən siyasi proseslərə təsir göstərdiyi iddia edilir. Təşkilat Ukraynada “narıncı”, Gürcüstanda “məxməri”, Qırğızıstanda isə “zanbaq” inqilablarının ssenarilərində rol oynayıb. Və bu işdə keçmiş ABŞ dövlət katibinin siyasi məsələlər üzrə müavini Viktoriya Nuland xüsusi rol oynayıb.
O Nuland ki, Ukraynada “Maydan hərəkatı” zamanı mitinqçilərə özü şəxsən yemək paylayırdı. ABŞ Dövlət Departamenti Azərbaycana qarşı qərəzli mövqe nümayiş etdirdi və bütün bu işləri Viktoriya Nuland tərəfindən qurulmuş şəbəkə idarə edirdi. İndi isə bəlli olur ki, USAID-in dünya mediasında Azərbaycana qarşı gedən kampaniyada xüsusi rolu var imiş. Məsələn, “Politico” və “BBC” USAID tərəfindən ciddi maliyyə dəstəyi alırmış. İndi aydın olur ki, niyə Britaniyanın yayım şirkəti olan BBC hazırda Bakıda həbsdə olan erməni separatçı Ruben Vardanyanı dəstəkləyirdi və hətta onu “Hard Talk” verilişinə dəvət etmişdi.
Konkret olaraq, “Politico” qəzeti ilə bağlı maraqlı məlumatlar yayılıb. Bu faktı isə ABŞ Prezidenti özü açıqlayıb. Tramp bildirib ki, ABŞ Demokrat Partiyası haqqında müsbət məqalələrə görə USAID-dən 8 milyon dollar alıb. "Görünür, USAID və digər agentliklərdə milyardlarla dollar oğurlanıb, bunların böyük hissəsi demokratlar haqqında gözəl hekayələr yaratmaq üçün saxta mediaya "rüşvət" verilib. Görünür, “Politico” 8 milyon dollar alıb", - o, “Truth Social”da yazıb.
Prezident əlavə edib ki, bu, tarixdə ən böyük qalmaqal ola bilər və demokratlar bundan qaça bilməyəcəklər.
Qeyd edək ki, ABŞ Hökumətinin Səmərəliliyinin Artırılması İdarəsinin rəhbəri, iş adamı İlon Mask daha əvvəl bildirmişdi ki, ABŞ-nin icra hakimiyyəti orqanları “Politico”, “The New York Times” qəzetlərinə və “Associated Press” informasiya agentliyinə abunəliyin ödənişini dayandırır.
Ağ Evin mətbuat katibi Kerolayn Livitt ötən gün bildirib ki, ABŞ hökuməti “Politico”ya illik dəyəri təxminən 8 milyon dollar olan abunəliyi ləğv edəcək. O qeyd edib ki, əslində, “Politico” Amerika vergi ödəyicilərinin hesabına subsidiyalaşdırılıb və Maskın komandası artıq qəzetə ödənişlərin ləğvi istiqamətində işə başlayıb. İndi Maskın rəhbərlik etdiyi idarə ABŞ federal orqanlarının digər KİV-lərə abunəlik xərclərinin yoxlanılmasına başlayıb.
USAID-in rəhbəri Samanta Poverin isə Ruben Vardanyandan 1 milyon ABŞ dolları məbləğində “mükafat” (əslində isə rüşvət) aldığı bəllidir. Co Bayden, Antoni Blinken, Bob Menendez, Adam Şiff və digərləri bu mafiya ilə əlaqəlidir. İndi isə bu əlaqələr ifşa olunur.
Beləliklə, yardım adı altında ayrı-ayrı ölkələrin daxili işlərinə fəal şəkildə müdaxilə edən, qeyri-sabit, çevriliş və xaos üçün münbit şərait yaratmağa çalışan USAID-lə bağlı həqiqətlər üzə çıxır. Araşdırma da birbaşa Birləşmiş Ştatlardan başlayır.(Report)
