İyunun 6-na keçən gecə Rusiya 407 zərbə pilotsuz uçuş aparatı (PUA), 6 ballistik raket və 38 qanadlı raketlə Ukraynaya kombinə olunmuş zərbələr endirib.
Bu barədə Ukrayna Silahlı Qüvvələrinin (SQ) Hərbi Hava Qüvvələri Komandanlığının rabitə şöbəsinin rəisi Yuri İqnat bildirib.
Onun sözlərinə görə, bu gecə Rusiya ballistika, hava və yer bazalı qanadlı raketlər, həmçinin çoxlu sayda zərbə PUA-ları və dron imitatorlarından istifadə edib.
“Ümumilikdə ruslar bu gün dövlətimizin ərazisində 407 zərbə PUA-sından istifadə edib. Həmçinin 6 ballistik raketin istifadəsi ilə bağlı məlumatlar var, eləcə də 38 qanadlı raket, onların əksəriyyəti məhv edilib”, - o deyib.
İqnat qeyd edib ki, hava hücumundan müdafiə qüvvələri 30-a qədər raket və 200-ə qədər PUA vurub.
Daha əvvəl xəbər verdiyimiz kimi, iyunun 6-na keçən gecə Rusiya Ukraynaya növbəti kütləvi zərbələr endirib. Hücum nəticəsində Kiyevdə atəş altında işləyən Dövlət Fövqəladə Hallar Xidmətinin 3 xilasedicisi ölüb, 40 nəfər yaralanıb.
Həmçinin Ternopol, Lutsk, Çerniqov, Kremençuk, Kiyev və Lvov vilayətlərinə də zərbələr endirilib.
