Bakıda fəaliyyət göstərən “Madam Ruxa” gözəllik salonunda saçını boyadan müştəri alın nahiyəsinin kimyəvi maddə ilə yandırıldığını iddia edib.
Adını açıqlamayan şikayətçi sosial şəbəkədəki paylaşımında boyadan sonra tətbiq edilən məhlul nəticəsində dərisində ciddi yanıq izləri və qızartılar əmələ gəldiyini bildirib.
Şikayətçinin sözlərinə görə, iyunun 19-da saç boyatmaq üçün adıçəkilən salona müraciət edib. Boyama prosesi başa çatdıqdan sonra dəridəki boya izlərini təmizləmək məqsədilə xüsusi kimyəvi maddə tətbiq olunub.
"Həmin məhlulu vurduqları anda şiddətli yanma hissi keçirdim. Dedilər, bu “normaldır”. Amma nəticə budur: Alnımda ciddi yanıq, sulanan yaralar və qızartılar".
Şikayətçi qeyd edir ki, üzərində boya izi olmayan nahiyəyə də həmin məhlulun tətbiqi əməkdaşın səhlənkarlığından irəli gəlib:
“Alnımda ümumiyyətlə, boya yox idi. Salonun əməkdaşı diqqətsizliyi və məsuliyyətsizliyi nəticəsində maddəni bütün alına yaydı”.
Zərərçəkən bildirir ki, salon əməkdaşları baş verənlərə görə ondan üzr istəməyib:
"Heç kim üzr istəmədi, heç nə olmamış kimi ödəniş alındı – sanki bu normal bir hal imiş. Rəhbərliyə yazdım. Cavabda isə bütün məsuliyyəti mənim üstümə atdılar – guya “allergiyam varmış”. Üstəlik mən zərərin qarşısını almaq üçün saç boyamasına 50 manat ödəmişəm.Əczaxanadan 26 manata krem almışam – amma heç bir effekt vermədi, dəriyə zərər artıq baş vermişdi.Bu cür səhlənkarlıq və peşəkarlıqdan uzaq yanaşma müştəriyə hörmətsizlikdir. Heç kim belə münasibətə layiq deyil. Mən bu paylaşmanı edirəm ki, başqaları da xəbərdar olsun və sağlamlığını belə yerlərdə riskə atmasın.
Müştəri məmnuniyyəti – sıfır
Peşəkarlıq – sıfır
Empatiya – sıfır
Məsuliyyətsizlik – 100%"
Məsələ ilə bağlı "Madam Ruxa" gözəllik salonu ilə əlaqə saxladıq. Salonun əməkdaşı Rahib Xanıyev Bakupost.az-a açıqlamasında bildirib ki, hadisənin səbəbi şikayətçi xanımın dərisinin həssas olmasıdır:
"Biz gündə 5-6 müştərinin alnını lokum, yəni boya təmizləyicisi ilə silirik. Ola bilsin, xanımın dərisi həssas olub deyə qızartı yaranıb. Əgər bu vasitədən ilk dəfə istifadə etsəydik, deyərdim ki, bəli, problem ondan qaynaqlana bilər. Ancaq biz bu məhsuldan 4-5 ildir istifadə edirik və indiyə qədər belə hal yaşanmayıb. O qızartı müvəqqətidir, keçib gedəcək. Dib boya etdikdə istər-istəməz saçla alının birləşdiyi hissəyə boya dəyir və biz bu ləkəni orada saxlaya bilmərik. İllərdir lokumdan istifadə edirik, bu vasitə xüsusi olaraq dəriyə dəymiş boyanı təmizləmək üçündür. Bütün müştərilərdə bu üsulu tətbiq edirik. Görünür, xanım əsəbiləşib və şikayət edib."
Məsələ ilə bağlı salonun rəhbəri Ruhənə İmanova Bakupost.az -a açıqlamasında bildirib ki, salonda gündəlik yüzlərlə insan qəbul edilir və indiyədək belə hadisə baş verməyib :
"Heç bir xanıma heç nə olmadı, bir bu xanıma oldu? Yəni kraska silənlə insan nə dərəcədə yana bilər? Bəlkə o, gedib evdə yandırıb özünü, şəkil atıb? O insan güclü allergiyalı xanımdır. 1 həftə qabaq o xanım bizdə keratin etdirib. Keratin də kimyəvi tərkiblibir maddədir. Bundan heç bir allergiyası olmayıb bu insanın. Ondan 1 həftə sonra yenidən salona qayıdıb və başqa ustada saçını boyadıb. Alnına kraska dəyib, köməkçi də moykada alnını təmizləyib. Yəni bundan insan necə bu dərəcədə yana bilər? Yaxşı, səpə bilər, nəsə olar, amma yanıq dərəcəsinə gəlib çata bilməz. Xanımın alnı salonda qızarmışdı, biz də Boroplus krem verdik, 100 dəfə üzr istədik ki, bəs sizin allergiyanız var idisə, bizə niyə bildirmirdiniz bunu? Burda günahkar bizik?? Nəyə görə üzr istəməliyik? Üzr istəməliyik ki, bağışla, allergiyan var? 18 yaşında köməkçilərdir, dövlətin məktəbindən göndəriblər ki, praktika keçsin. Mən haqsız müştəriyə görə salonda kimisə ittiham edə bilmərəm. Ürəyi istədiyi qədər polislərə, saytlara şikayət etsin. Heç mənim belə vecimin vecinə də deyil ki, məndən şikayət edir. Sənin xoşuna gəlmirdisə, 1-ci dəfə keratin edib, 2-ci dəfə niyə salona qayıtdın? Gəlməzdin də"
[center]
[/center]
Lalə,
BakuPost
