ABŞ Prezidenti Donald Tramp İranla müharibə zamanı “əsl üzlərini göstərən” müttəfiqlər kimi xarakterizə etdiyi Avropa ölkələrini tənqid edib.

“Qafqazinfo” xəbər verir ki, o bu haqda “Truth Social” sosial media platformasında yazıb.

“Onlar İsraili sevsələr də, sevməsələr də, ABŞ-nin böyük müttəfiqi olduqlarını sübut etdilər. Onlar cəsur, qətiyyətli, sadiq və ağıllıdırlar. Münaqişə və stress zamanı əsl üzlərini göstərən digərlərindən fərqli olaraq, İsrail çox çalışır və qalib gəlməyi bilir” , - Tramp qeyd edib.

İtaliyanın Baş naziri Corciya Meloninin yaxın həftələrdə Azərbaycana rəsmi səfəri planlaşdırılır.

“Qafqazinfo” “Euronews”a istinadla xəbər verir ki, səfərin əsas müzakirə mövzusu enerji sahəsində əməkdaşlığın genişləndirilməsi olacaq.

Qeyd olunub ki, xüsusilə Azərbaycan təbii qazının Trans-Adriatik boru kəməri (TAP) vasitəsilə İtaliyaya nəqlinin artırılması imkanları görüşün ən vacib hissəsini təşkil edəcək.

“Sabah”ı təbrik edirəm. Onlara uğurlar arzulayıram. Hər iki komandanın azarkeşlərinə təşəkkür edirəm. Yaxşı futbol atmosferi var idi.

Əvvəlki oyunlar daha bolqollu olmuşdu. Bu gün də yaxşı mübarizə oldu, sonluqlar çatmadı. Daha yaxşı oynamalıydıq, daha yaxşı oynaya bilərdik. Əfsuslar olsun ki, bunu bacarmadıq. “Sabah” qalibiyyəti haqq etdi. Qarşıda sıx qrafikimiz var. Pozitiv notlarla irəliyə baxmalıyıq. Komandanın əvvəlki istəyini, oyun intizamını geri qaytarmalıyıq. Bəzi oyunçuların performansında çatışmazlıqlar var idi. Məşqlər pis getmir. “Sabah” və bizə uğurlar arzulayıram”.

“Qafqazinfo” xəbər verir ki, bu sözləri “Qarabağ”ın baş məşqçisi Qurban Qurbanov Misli Premyer Liqasının 28-ci turunun “Sabah”la (0:1) görüşündən sonra keçirilmiş mətbuat konfransında deyib.

O, jurnalistlərin suallarını da cavablandırıb:

- Bəzi futbolçularda meydanda sürüşürdü, Kadi, Zubir, Kevin Medina. Nə ilə bağlı idi?

- Onlara deməmişdim sürüşəsiniz (gülür). Bəlkə onlar olan yer sürüşkən idi. Daha möhkəm dayanmaq lazımdır.

- Elvin, Abbas, Sami, bu futbolçular ikinci komandaya göndərilib. Növbəti oyun üçün rəqibləri analiz edirsiniz . Bu qədər yüklənmənin fonunda bezdiyin, yorulduğunuz an olur? Özünüzü necə hiss edirsiniz?

- Məşqçi olaraq yorulmağı düşünməli deyiləm. Bəli, bir az çatışmazlıqlar, gərginliklər var. Səbəb olaraq demək istəmirəm. ÇL-də yaxşı nəticələr oldu. Yenidən çempionata toparlana bilmədilər, öz tempimizi geri qaytara bilmədik. Burada bəzi səbəblər, sıx qrafik var. Sanki daha çox bir yerdə məşq etməyimizə ehtiyac var idi. Amma neçə ay idi 3-4 gündən bir oyuna çıxırdıq. Oyun keyfiyyətimiz əvvəlki kimi deyildi. Bu, səbəb deyil, bizə mane olan tərəflərdən biridir. İllər boyu bu cür oynamışıq. “Sabah” daha aktivdir, kompleks olaraq daha hazırlıqlıdırlar. Çempionatda get-gedə hamı bir-birini tanıyır. Bir komandaya qarşı bir neçə oyun keçirdikdə, ona qarşı daha inamlı olursan. Çempionatda komandalar öz qabiliyyətlərini yaxşılaşdırılar, biz çempionata istədiyimiz kimi hazır ola bilmədik. Sanki fikir ÇL-ə köklənmişdi. Hər iki cəbhədə öz oyunumuzu qoruyub-saxlaya bilmədik. Görünən odur ki, mən yox, kollektivdə psixoloji olaraq yorğunluq var. Normal haldır. Dünya təcrübəsində də var. Bir məşqçi olaraq, önə pozitiv baxmalıyıq. Çatışmazlıqları aradan qaldırmalıyıq.

- Elvin Cəfərquliyevi bağışlamaq olar?

- Hələ ki bilmirəm. Bu günə kimi bağışlaya-bağışlaya kimi gəlmişik. Özümüz də bu yolu keçmişik, özümüz də futbolçu kimi səhv etmişik, cərimələnmişik. Bundan nəticə çıxarmışıq. Oyunçular ayrı-ayrılıqda bu cür rəqiblərə qarşı, belə yükün altına girməyi düşünmürlər ki, bizi qarşıda hansı vacib oyunlar gözləyir. Məğlubiyyətdən sonra sənin yaşam tərzin necədir? Çox detallar var. İlk hal deyil, bəzi oyunçuları cərimələmişik. Qarşıdakı gedişata baxacağıq. Çox futbolçunu bu günə qədər bağışlamışıq.

- Elvin Cəfərquliyev demişdi ki, düzəlməsən, səni komandadan göndərəcəyəm. İndi də əvəzedici heyətə göndərəcəksiniz. Onun problemi nədir? Nəyə görə bu dəfə belə qərar verdiniz?

- Sevindirici tərəfi odur ki, nə var onu danışıb, onu deyib. Söhbətimiz olmağı, filan.. İstənilən futbolçunun arxasındayam. Bu günə qədər olmayıb ki, hansısa futbolçunun inkişafını düşünməyim, yaşam tərzini, gələcəyini düşünməyim. Ən zəif oynayan futbolçunu belə, gələcəyini düşünmüşəm, söhbətləşmişəm. Səbəb olaraq bunu ortaya atmıram. İnsanların müəyyən yaş vaxtı olur, onda futbolçu daha möhkəm, xarakterli olmalıdır. Elvin üçün orada oturma, burada otur, o çağırsın-bu çağırsın... ÇL-də turun oyunçusu oldu. Futbolçulara hər zaman deyirəm, bir oyun o demək deyil ki, missiyan tamamlandı. Bu, “Qarabağ” klubudur. 1-2 oyun udursan, bir xal sənə mane olur. O demək deyil ki, ÇL-də 3 oyun yaxşı oynamışam, vacib matçda intizamsızlıq edim. Bağışlanmağa gəldikdə, proses davam edir. Digər klublar məni düzgün başa düşsün, bəlkə hansısa klubda nəyəsə göz yummaq olar. Amma klubun adı “Qarabağ”dırsa, buna göz yuma bilmərik. Cəzalar klubdaxili bir şeydir. Futbol elə oyundur ki, burada stabil olmaq lazımdır. Futbolçularımın əziyyətini yerə vura bilmərəm. Daim özlərinə də bu haqda danışmışam, iclaslarda bildirmişəm. Narahat olduğum nədir? ÇL-dəki uğurları düşünərək, çempionatı belə yola verməli deyilik. Bu gün mən oyundan razı qalmadım. Uduzduğumuz əvvəlki matçdan razı qalmışdım. Bugünkü oyun üçün 4-5 məşq birlikdə etmişdik. Bəlkə, oyunçularımı daha da incələməliyəm, yaşam tərzini, ya hərtərəfli..

- Sami Mmae “Dinamo”ya geri qayıdıb?

- Onu əvəzedici heyətə göndərmişdik. Klubu ilə razılığa gəliblər. Zaqrebə hələ qayıda bilməz. Razılığa gəldik ki, bizim əvəzedici heyətdə məşq etməyə də bilər. Qarşılıqlı imza atılıb ki bir-birimizə etirazımız yoxdur.

- “Qarabağ”ın “Sabah”la kubok oyunundan nə gözləyirsiniz?

- Hansısa dəyişikliklər, böyük ehtimalla, olacaq. Çox hazırlıqlı komandaya qarşı oynayacağıq. Nələrisə dəyişəcəyik. Sona qədər mübarizə aparacağıq.

- “Qarabağ”ın çempionluğu əldən verməsi azarkeşlərin etirazına səbəb olub. Əsasən də sosial şəbəkələrdə...

- Hansısa etirazı eşitmədim. Əksinə, 89-90-cı dəqiqələri azarkeşlərin hamısı...Sosial şəbəkələrdə kimlər yazır bilinmir. Bizim azarkeşlərimiz xeyli saydadır, stadiona gələn və gəlməyən də var. Daim bizim yanımızda olan azarkeşlərimiz var. Mənə neqativ bir şey gəlib çatmayıb. Azarkeşlərimiz böyük təcrübəyə sahibdirlər. Onların baxış bucağı fərqlidir. Onlar bilirlər ki, 3-4 il uğur varsa, sonra hansısa dəyişiklik ola bilər. Etiraz varsa da, bu da normaldır. Hansısa fikir bildirmək niyyətində deyiləm. Hamısı özümüzünkülərdir.

- Bir neçə gün əvvəl doğum gününüz oldu. Özünüzə nə arzu etdiniz?

- Doğum gününə görə özümə nə isə arzu etmirəm. Allahıma şükür etmişəm ki, dünyaya gəlmişəm, yaşayıram. Sağlamlıq arzulayıram həmişə.

İran İslam İnqilabı Keşikçiləri Korpusu (SEPAH) ABŞ-ın dəniz blokadasını qaldırmamasına cavab olaraq strateji Hörmüz boğazının tamamilə bağlandığını bəyan edib.

“Qafqazinfo” “Tasnim” agentliyinə istinadən xəbər verir ki, mülki gəmilərin “Larak dəhlizi”ndən keçidinə dair qısa müddətli icazə ləğv edilib.

SEPAH-ın bəyanatında bildirilir ki, ABŞ atəşkəs öhdəliklərini pozaraq İran limanlarının mühasirəsini saxladığı üçün bu gün axşamdan etibarən boğazdan bütün hərəkətlər dayandırılır.

SEPAH-ın hərbi dəniz qüvvələri Fars körfəzi və Oman dənizindəki bütün gəmi sahiblərinə sərt xəbərdarlıq göndərib. Bildirilib ki, Hörmüz boğazına yaxınlaşan istənilən gəmi “düşmənlə əməkdaşlıq” edən tərəf kimi qiymətləndiriləcək və dərhal hədəfə alınacaq. Qurum həmçinin vurğulayıb ki, ABŞ Prezidenti Donald Trampın regiondakı vəziyyətlə bağlı açıqlamalarına etibar edilməməlidir və məlumatlar yalnız rəsmi hərbi kanallar vasitəsilə izlənilməlidir.

Xatırladaq ki, regiondakı gərginlik fevralın 28-də ABŞ və İsrailin İrana qarşı genişmiqyaslı hərbi əməliyyatlara başlaması ilə yeni müstəviyə keçib. Həmin əməliyyatlar nəticəsində İranın Ali rəhbəri Əli Xamenei və bir sıra yüksəkvəzifəli şəxslər həyatını itirib.

Buna cavab olaraq Tehran təkcə İsrailə deyil, həm də ABŞ-ın hərbi bazalarının yerləşdiyi Səudiyyə Ərəbistanı, BƏƏ, Qətər, Bəhreyn, Küveyt və Kiprdəki hədəflərə raket zərbələri endirib. Aprelin 11-də İslamabadda keçirilən diplomatik danışıqlar isə tərəflər arasındakı dərin fikir ayrılıqları səbəbindən nəticəsiz qalıb.

ABŞ-nin Alyaska ştatının Ankoric şəhərində ayı hərbçilərə hücum edib.

“Qafqazinfo” xəbər verir ki, bu barədə “Associated Press” (AP) nəşri məlumat yayıb.

Hadisə hərbi qulluqçuların təlimləri zamanı baş verib.

Hücuma məruz qalan əsgərlər xəsarət alıblar, lakin onların vəziyyəti barədə məlumat verilmir. Hərbçilərin vəhşi heyvandan müdafiə olunarkən gözyaşardıcı qazdan istifadə etdikləri bildirilir.

ABŞ Dövlət Departamentinin rəsmiləri Havana şəhərində Kuba rəsmiləri ilə, o cümlədən Raul Gilyermo Rodriges Kastro ilə görüş keçiriblər.

“Qafqazinfo” xəbər verir ki, bu barədə “Axios” öz mənbələrinə istinadən məlumat yayıb.

Bildirilib ki, görüşdə əsas məqsəd Kubada demokratik və iqtisadi azadlıqların təşviqi, eləcə də, bu istiqamətdə addımların atılmayacaı təqdirdə yarana biləcək risklərin diqqətə çatdırılması olub.

ABŞ nümayəndə heyəti ölkədə internet xidmətlərinin yaxşılaşdırılması üçün “Starlink” sisteminin tətbiqini təklif edib.

Bu təmaslar son illər üçün mühüm diplomatik hadisə kimi qiymətləndirilir. Qeyd olunur ki, ABŞ hökumətinə məxsus təyyarə Barak Obama dövründə baş tutan yaxınlaşma səylərindən sonra ilk dəfə Kubaya eniş edib.

Hazırkı mərhələdə Kuba ciddi iqtisadi çətinliklərlə üz-üzədir. ABŞ Prezidenti Donald Tramp və Dövlət katibi Marko Rubio isə əvvəlki administrasiyalara nisbətən daha sərt mövqe nümayiş etdirirlər.

Mənbənin sözlərinə görə, ABŞ tərəfi Kuba rəhbərliyinə ölkə iqtisadiyyatının sürətlə zəiflədiyini və vəziyyətin daha da pisləşmədən islahatlar üçün məhdud zaman pəncərəsinin qaldığını bildirib.

Görüşlərdə uzunmüddətli ABŞ tələbləri də gündəmə gətirilib. Bunlara 1959-cu il Kuba inqilabından sonra müsadirə edilmiş əmlaklara görə kompensasiyanın ödənilməsi, siyasi məhbusların azad edilməsi və daha geniş siyasi azadlıqların təmin olunması daxildir.

Eyni zamanda, ABŞ rəsmiləri Kubada xarici kəşfiyyat və hərbi strukturların fəaliyyətindən narahat olduqlarını da ifadə ediblər.

ABŞ tərəfi açıq təhdidlər səsləndirməsə də, Vaşinqtonun adanın milli təhlükəsizlik baxımından riskə çevrilməsinə imkan verməyəcəyi vurğulanıb. ABŞ rəsmisi bildirib ki, Prezident Tramp mümkün olduqda diplomatik həll yollarına üstünlük versə də, zərurət yaranarsa, daha sərt addımlar istisna edilmir.

İran Xarici İşlər Nazirliyinin sözçüsü İsmayıl Bəqayi ABŞ Prezidenti Donald Trampın İranın zənginləşdirilmiş uranının ABŞ-yə daşınacağı ilə bağlı iddialarını təkzib edib.

“Qafqazinfo”nun məlumatına görə, Bəqayi televiziya proqramında çıxışı zamanı bildirib ki, bu məsələ nə gündəmdədir, nə də danışıqların bir hissəsidir.

Onun sözlərinə görə, İran üçün zənginləşdirilmiş uran strateji əhəmiyyət daşıyır və ölkədən çıxarılması mümkün deyil.

“İranın zənginləşdirilmiş uranı heç bir halda başqa yerə daşınmayacaq”, - deyə o vurğulayıb.

Sözçü əlavə edib ki, aparılan danışıqlarda uranın xaricə çıxarılması məsələsi, ümumiyyətlə, müzakirə olunmur və Tehran bunu heç vaxt seçim kimi nəzərdən keçirməyib.

Qeyd edək ki, Donald Tramp daha əvvəl İranın “hər şeydə razılığa gəldiyini” və zənginləşdirilmiş uranın çıxarılması məsələsində ABŞ ilə əməkdaşlıq edəcəyini iddia etmişdi. O bildirmişdi ki, razılaşma əldə olunacağı təqdirdə ABŞ tərəfi iranlılarla birlikdə uranı götürərək ölkədən çıxaracaq.

NATO-nun kəşfiyyat təyyarəsi Ukrayna sərhədləri yaxınlığında təxminən iki saat müşahidə aparıb.

“Qafqazinfo” xəbər verir ki, bu barədə məlumatı “RİA Novosti” yayıb.

Bildirilib ki, bu, uçuş məlumatlarının təhlilindən sonra məlum olub: “Boeing E-3A Sentry” təyyarəsi Türkiyənin Konya şəhərindən havaya qalxıb. Təyyarə Türkiyənin Qara dəniz sahili boyunca və Bolqarıstan ərazisi üzərindən keçib. Rumıniyanın hava məkanına daxil olduqdan sonra o, Ukrayna ilə sərhədin bilavasitə yaxınlığında dairəvi manevrlər etməyə başlayıb”.

Təyyarə iki saat kəşfiyyat missiyası həyata keçirdikdən sonra ərazini tərk edib və Bolqarıstanın hava məkanına qayıdıb.

Avropada aviasiya sektoru ciddi yanacaq böhranı ilə üz-üzədir.

“Qafqazinfo” xəbər verir ki, Beynəlxalq Enerji Agentliyinin (BEA) baş direktoru Fatih Birol qitədə təyyarə yanacağı ehtiyatlarının təxminən altı həftəlik qaldığını açıqlayıb.

Birolun sözlərinə görə, əgər Hörmüz boğazı bağlı qalarsa, uçuşların ləğvi çox qısa müddətdə başlaya bilər və bu, yay mövsümündə kütləvi nəqliyyat problemlərinə səbəb olacaq.

O, vəziyyətin qlobal iqtisadiyyat üçün ciddi risklər yaratdığını vurğulayıb: “Bu, indiyə qədər qarşılaşdığımız ən böyük enerji böhranlarından biri ola bilər”.

Böhranın əsas səbəbi kimi Yaxın Şərqdə, xüsusilə İran ətrafında artan gərginlik və strateji dəniz marşrutlarının pozulması göstərilir. Bu isə qlobal neft tədarükündə ciddi fasilələrə və qiymətlərin sürətlə artmasına gətirib çıxarıb.

Yanacaq qiymətlərindəki kəskin artım artıq böyük aviaşirkətlərin maliyyə göstəricilərinə təsir etməyə başlayıb.

“easyJet” mart ayının sonuna qədər olan altı aylıq dövrdə 540-560 milyon funt-sterlinq həcmində zərər gözlədiyini açıqlayıb. Şirkət təkcə son ayda yanacağa əlavə 25 milyon funt xərclədiyini bildirib.

“Ryanair”in baş direktoru Maykl O'Liri uçuşların 10 faiz azaldılmasının nəzərdən keçirildiyini, yanacaq təchizatının isə yalnız may ayının ortalarına qədər təmin oluna biləcəyini deyib.

SAS artan xərclər səbəbindən bu ay 1000-dən çox reysi ləğv edib.

“British Airways” isə hazırda fəaliyyətini davam etdirsə də, mümkün böhranla bağlı hökumətlə təcili tədbirləri müzakirə etdiyini açıqlayıb.

Bildirilir ki, Hörmüz boğazında vəziyyət dəyişməz qalarsa, təkcə yanacaq çatışmazlığı deyil, həm də aviabiletlərin qiymətində ciddi artım qaçılmaz olacaq.

Aviaşirkət nümayəndələrinin proqnozlarına görə, mart ayında ikiqat artan yanacaq xərcləri Pasxa bayramı sonrası və yay turizm mövsümündə sərnişinlər üçün daha baha biletlərlə nəticələnəcək.

Fatih Birol əlavə edib ki, böhran ilkin mərhələdə Yaponiya, Cənubi Koreya, Hindistan və Çin kimi Asiya ölkələrinə təsir edəcək. Neft tədarükü bərpa olunmazsa, daha sonra Avropa və ABŞ da ciddi təsirlərlə üzləşə bilər.