Bir qrup tələbə redaksiyamıza müraciət edərək Azərbaycan Dövlət Bədən Tərbiyəsi və İdman Akademiyasında təqaüd sistemində ədalətsizlik və şəffaflığın pozulduğunu bildiriblər.

Tribunainfo.az-a şikayət edən tələbələrin sözlərinə görə, dövlət sifarişi əsasında, yəni ödənişsiz əsaslarla təhsil alan tələbələr semestri kəsirsiz və 71 baldan yuxarı orta göstərici ilə başa vursalar da, onlara təqaüd verilməyib.

Halbuki, digər universitetlərdə bu meyar əsasında tələbələr avtomatik olaraq dövlət təqaüdü alırlar.

Onların iddialarına görə, son semestrlərdə təqaüd almaq üçün qoyulan bal həddi əsassız şəkildə qaldırılıb, nəticədə bir çox tələbə haqsız yerə təqaüdsüz qalıb.

Həmçinin köçürülən təqaüd vəsaitlərinin hara və kimin cibinə axdığı ilə bağlı şəffaf məlumat təqdim olunmur.

Məsələ ilə bağlı Elm və Təhsil Nazirliyindən və İdman Akademiyasından sorğularımıza cavab verilib:

Akademiyada təqaüd alma qaydaları hansı meyarlara əsasən müəyyən edilir?

Cavab: Akademiyada tələbələrin təqaüd alma qaydaları Azərbaycan Respublikası Nazirlər Kabinetinin 2016-cı il 5 fevral tarixli 38 nömrəli qərarı ilə təsdiq edilmiş “Doktorantlara, ali təhsil, orta ixtisas və peşə təhsili müəssisələrinin, həmçinin Azərbaycan Milli Elmlər Akademiyasının magistratura səviyyəsinin tələbələrinə təqaüdlərin təyin olunması və ödənilməsi QAYDASI”nın müddəaları ilə müəyyən olunur:
2.4-1. Ali təhsil müəssisələrində təqaüd yerlərinin sayı “Ali təhsil müəssisələrində təqaüd sisteminin təkmilləşdirilməsi ilə bağlı əlavə tədbirlər barədə” Azərbaycan Respublikası Prezidentinin 2019-cu il 14 fevral tarixli 960 nömrəli Sərəncamının 1-ci hissəsində göstərilən səviyyədə müəyyənləşdirilir.
Hər tədris ili üçün təqaüd yerlərinin ümumi sayı dövlət sifarişi və dövlət hesabına əyani və qiyabi təhsilalma formasında təhsilalanların sayının və əlavə təqaüd yerlərinin sayının cəmindən ibarətdir. Əlavə təqaüd yerlərinin ali təhsil müəssisələri arasında bölgüsü hər bir ali təhsil müəssisəsinə qəbul olunmuş təhsilalanların sayının bütün ali təhsil müəssisələrinə qəbul olunmuş təhsilalanların ümumi sayında xüsusi çəkisinə uyğun olaraq Azərbaycan Respublikasının Elm və Təhsil Nazirliyi tərəfindən müəyyən edilir. Ali təhsil müəssisəsində əlavə təqaüd yerlərinin ixtisaslar üzrə bölgüsü hər bir ixtisas üzrə ödənişli əsaslarla qəbul olunmuş təhsilalanların sayının həmin ali təhsil müəssisəsinə ödənişli əsaslarla qəbul olunmuş təhsilalanların ümumi sayında xüsusi çəkisinə uyğun aparılır.
2.5. Ali təhsil və orta ixtisas təhsili müəssisələrinə, həmçinin Azərbaycan Milli Elmlər Akademiyasının magistratura səviyyəsinə hər bir ixtisas üzrə təqaüdlərin sayı nəzərə alınmaqla, imtahan sessiyasının nəticələrinə əsasən ÜOMG-yə görə ən yüksəkdən başlayan sıralamaya uyğun növbəti semestrdə təqaüd alacaq tələbələrin siyahısı müəyyən edilir. Cari və aralıq qiymətləndirmənin ümumi nəticələrinə, habelə aralıq qiymətləndirmənin nəticəsinə görə, eləcə də üzrsüz səbəbdən imtahanda iştirak etmədiyinə görə akademik borcu yaranmış və akademik borcu yaranan semestrdə imtahan sessiyasından sonra növbəti semestr başlayanadək həmin fənni (fənləri) dinləmədən imtahan verərək və ya yay semestrində dinləyərək müvəffəq qiymət almış tələbə növbəti semestrdə təqaüd almaq hüququ olan tələbələrin siyahısına daxil edilmir. Eyni tədris ili üzrə eyni ixtisasda təqaüd alacaq tələbələrin siyahısı müəyyənləşdirilərkən tədris dili nəzərə alınmır.

Əvvəllər 71+ ortalama ilə təqaüd verilirdisə, bu göstəricinin artırılması nəyə əsaslanır?

Cavab: Azərbaycan Respublikası Nazirlər Kabineti “Doktorantlara, ali təhsil, orta ixtisas və peşə təhsili müəssisələrinin, həmçinin Azərbaycan Milli Elmlər Akademiyasının magistratura səviyyəsinin tələbələrinə təqaüdlərin təyin olunması və ödənilməsi QAYDASI”nın 2.5-ci bəndinə əsasən, təqaüd alacaq tələbələrin siyahısı artıq sabit orta göstəriciyə görə deyil, imtahan sessiyasının nəticələrinə əsasən ÜOMG-yə görə ən yüksəkdən başlayan sıralamaya uyğun müəyyən edilir. Yəni, təqaüd yerləri məhdud sayda olduğu üçün tələbələr arasında reytinq prinsipi tətbiq olunur və yalnız ən yüksək nəticə göstərənlər təqaüd almaq hüququ qazanırlar.

İdman Akademiyasından Qoşqar Cəfərova 3 sual ünvanlasaq da 3 cavab ala bilmədik. Verdikləri cavab dolayı və əsassız olduğuna görə, Elm və Təhsil Nazirliyi, İctimaiyyətlə əlaqələr və kommunikasiya şöbəsinə suallar ünvanladıq.

Təqaüd siyasətinin yenidən nəzərdən keçirilməsi və tələbələrin narazılığının aradan qaldırılması planlaşdırılırmı?

Nazirlik yaxın vaxtlarda İdman Akademiyasının təqaüd siyasətini yenidən nəzərdən keçirməyi planlaşdıracaqmı?

Təqaüd vəsaitlərinin şəffaf bölüşdürülməsi və köçürülməsi mexanizmi necə həyata keçirilir? Bu prosesdə daxili audit və ya nəzarət tədbirləri varmı?

Əvvəllər qüvvədə olan 71 bal meyarının qaldırılması barədə qərar nə vaxt və kim tərəfindən qəbul edilib?

Cavab: Bildiririk ki, sorğunuzla bağlı Azərbaycan Dövlət Bədən Tərbiyəsi və İdman Akademiyasının mətbuat xidmətinə müraciət etməyiniz məqsədəuğyundur.

Sual: Universitetlərdəki qanunsuzluqlar barədə ölçü götürmək kimi səlahiyyətini yoxdurmu?

Cavab: Məlumat üçün bildiririk ki, bütün TM-lərdə təqaüdlər Azərbaycan Respublikası Nazirlər Kabinetinin 2016-cı il 5 fevral tarixli 38 nömrəli Qərarı ilə təsdiq edilmiş “Doktorantlara, ali təhsil, orta ixtisas və peşə təhsili müəssisələrinin tələbələrinə təqaüdlərin təyin olunması və ödənilməsi Qaydası”na uyğun olaraq təyin edilir.

Tribunainfo.az
Dəniz Pənahova

Bir neçə ay əvvəl Hurriyyet.az saytında “MTN GENERALINDAN MƏHKƏMƏ QƏRARINA HÖRMƏTSİZLİK - Mövlan Şıxəliyev vətəndaşa ödəməli olduğu 127 000 dolları vermir” sərlövhəli yazı dərc etmişdik.

Vətəndaş Əliyev Ələddin Hüseyn oğlunun müraciəti əsasında hazırlanan yazıda, şikayətçi, keçmiş MTN generalı Mövlan Şıxəliyevin ona borclu olduğu 127 min dolları ödəmədiyini bildirirdi. Ə.Əliyevin sözlərinə görə, generalın ona borclu olduğu haqda əlində rəsmi məhkəmə qərarı olsa da, illərdir M.Şıxəliyevdən pulunu ala bilmir.

Ən maraqlısı isə odur ki, Ə.Əliyev məsələ ilə bağlı Ədliyyə naziri Fərid Əhmədovun qəbulunda olan zaman nazir şikayətinin təmin olunacağına söz versə də, Rəfayıl adlı icraçı məhkəmə qərarına qarşı hörmətsizlik nümayiş etdirir və vətəndaşa dəyən zərərin ödənilməsini təmin etmir.

Sual oluna bilər ki, bir neçə ay əvvəl “Hürriyyət”in redaksiyasına daxil olan şikayət məktubunu yenidən gündəmə gətirməkdə məqsədimiz nədir?! Əlbəttə, bu, heç də səbəbsiz deyil. Əslində, son aylarda eyni məzmunlu şikayətlərin sayı onlarladır. Sadəcə, qeyd etdiyimiz məsələdə hər kəsin yaxşı tanıdığı Mövlan Şıxəliyevin adı keçdiyi üçün bu faktı xatırlatmağı lazım bildik.

Haşiyə olaraq onu da dəyərli oxucuların diqqətinə çatdıraq ki, aradan təxminən 5 ay keçsə də, M.Şıxəliyev vətəndaş Əliyev Ələddin Hüseyn oğluna dəyən zərəri hələ də qarşılamayıb. Çünki aidiyyəti icra qurumu şikayətçinin 127 min dollarının ödənilməsində maraqlı deyil, əksinə, keçmiş MTN generalı aşkar şəkildə müdafiə olunur.

Yuxarıdada qeyd etdiyimiz kimi, bu faktı xatırlatmağımız heç də təsadüfi deyil. Söhbət ondan gedir ki, bugünlərdə “Hürriyyət” qəzetinin, eləcə də eyniadlı Hurriyyet.az saytının və “Hurriyyet TV”-nin baş redaktoru Vüqar Məmmədovun (Tofiqoğlu) artıq 15-ci ildir idarə etdiyi şəxsi avtomobilinə Bakı Şəhər Probasiya İdarəsi tərəfindən həbs qoyulub. Bu, Sabunçu Rayon Məhkəməsinin hakimi Samirə Məmmədlinin sədrliyi ilə keçirilən məhkəmə prosesində cavabdeh şəxs qismində çıxış edən V.Məmmədovun qanunsuz olaraq 2 min manat həcmində cərimələnməsi ilə bağlıdır. Hansı ki, baş redaktor həm məhkəmənin bu ədalətsiz qərarına etiraz etdiyi, həm də sözügedən vəsaiti ödəmək imkanı olmadığı üçün indi belə bir reallıqla qarşılaşıb.

Doğrudur, ortada məhkəmə hökmü olduğundan Bakı şəhər Probasiya İdarəsinin bu qərarı anlaşılandır. Amma necə olur ki, aylardır, hətta illərdir icra sistemi keçmiş MTN generalı Mövlan Şıxəliyevin vətəndaşa borclu olduğu 127 min dollar vəsaitin ödənilməsini təmin etmir, amma baş redaktorun avtomobilinin üzərinə qısa müddət ərzində həbs qoyulur?! Buradan belə aydın olmurmu ki, İcra və Probasiya şöbələri yalnız sifarişli qərarları icra edir, sadə insanlara, kasıb təbəqəyə dəyən zərərin ödənilməsi onların maraq dairəsində deyil?!

Görünür, elə bu səbəbdən də məhkəmə qərarının mürəkkəbi qurumamış, əsassız olaraq 2 min manat cərimə olunan Vüqar Məmmədovun avtomobilinə həbs qoyulub!

Hurriyyet.az

Xalq yazıçısı Elçin Əfəndiyevin dəfn mərasimində Azərbaycan Yazıçılar Birliyinin (AYB) sədri Anarın necə tənhalıq içində olduğu açıq görünürdü. Özünü saysız-hesabsız yazıçı ordusu ilə əhatələməsinə baxmayaraq, sosial şəbəkələrdə yayılan fotolarda bu tənhalıq bariz hiss olunurdu.

Patriarx sonuncu yaxın dostunu itirməklə, ömrünü həsr etdiyi ədəbiyyat ağacının “son yarpaq” duyğularını yaşadı.
Sovet imperiyasının qurumaqda olan ədəbiyyat ağacının çürük budağında qızılımtıl son yarpaq kimi qalan Anar, Fəxri xiyabana aparan yolda əbədiyyət rüzgarının həyəcanını duymalı oldu. Onun yaratdığı yeni ədəbi nəsillər isə çürüyən çinarın ətrafında bir dövrün vida nəğməsini pıçıldayırdı.
AYB: Elitadan marginallara
Son 38 ildə – Anarın rəhbərliyi dövründə AYB bir neçə mərhələ yaşadı. Sovet dönəmində kommunist partiyasına yaxın elitar ziyalıların ittifaqı olan qurum, müstəqillik dövründə müxtəlif yönlü insanların – sosial şəbəkə yazarlarının, hətta yazıçı olmayan şəxslərin də daxil olduğu, dövlət tərəfindən qismən maliyyələşən geniş bir qrupa çevrildi.
Bu gün AYB üzvləri Prezident Administrasiyasından Milli Məclisə, nazirliklərdən universitetlərə, biznes strukturlarından mətbuat orqanlarına qədər müxtəlif sahələrdə təmsil olunurlar. Onları birləşdirən əsas cazibə mərkəzi isə hələ də Anarın şəxsiyyətidir.
“Ədəbiyyat inkubatoru”
Sovet dövründə ədəbi diskussiyaların keçirildiyi Natəvan klubunun siması dəyişdi. Əvvəllər gənclər ustad sənətkarlardan öyrənirdisə, indi “sosial şəbəkə dahilərinin” toplaşdığı dəyirmi masalar təşkil olunur. Bu prosesi obrazlı şəkildə “ədəbiyyat inkubatoru” adlandırmaq olar.
Uzun illərdir AYB aparatına rəhbərlik edən Rauf Aslanov bu sistemin əsas icraçılarındandır. Yazıçılıqla əlaqəsi olmasa da, Anarın dəstəyi ilə quruma gətirildi və qısa müddətdə ən təsirli fiqurlardan birinə çevrildi.
2008-ci ildə yaradılan “Prezident təqaüdləri fondu” ilə AYB-nin “inkubator” mexanizmi daha da gücləndi. Təqaüdlər və layihələr vasitəsilə həm qocaman, həm də gənc ədiblər Anarın və Aslanovun təsdiqindən keçməli oldular.
Yeni dövrün tələbləri
AYB-də formalaşan bu sistemdə istedadı artıq “ilham pəriləri” deyil, rəhbərlik müəyyənləşdirirdi. Bəziləri buna qarşı çıxsa da, əksəriyyət qurumun cazibəsindən və dövlət dəstəyindən imtina edə bilmədi.
Tarixi paralel də diqqətəlayiqdir: 1938-ci ildə Hüseyn Cavid və onlarla yazıçı “xalq düşməni” damğası ilə məhv edildi, sonrakı illərdə isə “xalq yazıçıları və şairləri” epoxası başladı. İndi isə Rəsul Rza ilə başlayan həmin epoxanın oğlu Anarın dövrü ilə başa çatmaq üzrə olduğu görünür.
Gələcək mübarizə
Anar sonrası dövrün necə olacağı ilə bağlı AYB-də ciddi gərginlik hiss olunur. Rauf Aslanovun ətrafında toplaşan qrup nüfuzlu və imkanlı şəxsləri quruma cəlb etməyə çalışır. Bu sırada deputat Cavanşir Feyziyevin adı hallanır. Həmçinin Elxan Zal Qaraxanlının yaratdığı Mahmud Kaşqari Fondunun bu dairələrdə alətə çevrilməsi ilə bağlı iddialar dolaşır.
Bədii Tərcümə Mərkəzi və digər strukturlar da Aslanov qrupunun nəzarətindədir. Lakin son vaxtlar onların təşvişə düşməsi diqqətdən yayınmır. Xüsusən də ADA rəhbəri, ölkə diplomatiyasının ağsaqqalı akademik Hafiz Paşayevin AYB-nin boykot etdiyi bir tədbirdə sona qədər iştirak etməsi qurum daxilindəki parçalanmaları daha da qabarıq göstərdi. Burada sual yaranır: Anarın rəhbərlik etdiyi qurumun Paşayevlərə qarşı nifrəti haradan qaynaqlanır?
Nəticə
AYB bu gün hələ də Anarın nüfuzuna söykənir. Lakin yeni dövrün çağırışları qarşısında qurumun gələcəyi qeyri-müəyyən görünür. Anarın kölgəsi aradan çəkildikdən sonra AYB-ni hansı qüvvələrin idarə edəcəyi və bu “ədəbiyyat inkubatorunun” taleyi necə olacağı hələ də açıq sualdır.(“Azərbaycan Reallığı”)
Yazıda adı çəkilən bütün şəxslərin mövqeyini işıqlandırmağa açıqdır.

Masazır qəsəbəsində, qəbiristanlıq yaxınlığında yerləşən gölün qurudularaq hissə-hissə satılması barədə redaksiyamıza məlumatlar daxil olub. İddialara görə, “Makler Əli” ləqəbi ilə tanınan şəxs bu ərazidə qeyri-rəsmi satışlar həyata keçirir və bu fəaliyyətin arxasında müəyyən təsirli şəxslərin dayandığı ehtimal olunur.

Abidin Fərzəliyevin adından istifadə edən bu şəxslər İcra başçısınında işgüzar nüfuzuna xələl gətirir. Beləki, ərazidə sakinlərə satılan evlərin qanunsuz olduğu müəyyən edilib. Məsələ ilə bağlı əraziyyə dəvət edilən jurnalistə qarşı təzyiqlər ilk öncə başçının adından daha sonra bizim mətbuat xidmətimizlə danışın cümlələri ilə yekunlaşıb. Lakin sakinlər sual edir: "gölün ərazisi qurudaraq tikinti aparan şəxslər niyə onların sənədlərini vermir...?"

Maraqlı məqam odur ki, adıçəkilən şəxs özünün mətbuat xidməti olduğun bildirib. Jurnalist fəaliyyətinə müdaxilə etmək və təzyiq göstərmək kimi əmələrindən geri qalmayan "Makler" Əli mətbuat ximəti ilə həmkarımızı telefon ünsiyyətinə çıxarıb. Bildirilir ki, Makler Əlinin təqdim etdiyi şəxs, jurnalstə Media Agentliyinin adından hətta jurnalistin peşə faliyyətini sorğulamış onun "mətbuat xidməti rəhbəri" olduğun deyərək çəkilişə ixtiyarının olmadığını bildirmişdir. Bu isə haqlı suallar doğurur: makler fəaliyyətinin qanunsuz olduğun bildiyi halda sənədsiz evlərin tikintisinə özünə yoldaş olaraq hələ bir mətbuat xidmətidə əməlinə calaq edib. Şəxs bizim fəaliyyətimizin qanunsuz olduğun deyir, müdafiə etdiyi şəxsin qanunsuz gölü qurudub satmasını isə qanuni adlandırır. Belə çıxır ki, göl ərazisi qurudulduqdan sonra Azərbaycan Respublikasının qanunları həmin əraziyə şamil edilmir. Ona görə də özünə Göyçaylı Əli deyən bu şəxsin havadarıda qanunsuz əməlin don geyindirmə cəhdləri ilə çırpındı...sadəcə buna çırpınmaq demək olar.

Şəhərsalma və Tikinti Məcəlləsinə görə:

İcra Hakimiyyətlərinin vəzifəsi nədir?

Masazır kimi sürətlə inkişaf edən qəsəbələrdə qeyri-rəsmi torpaq satışları və qanunsuz tikililər, həm ətraf mühitə, həm də sosial infrastrukturun planlı inkişafına ciddi təhlükə yaradır. Gölün qurudulması isə yalnız şəhərsalma deyil, həm də ekoloji qanunvericiliyin pozulması halıdır.

Hazırda məsələnin hüquqi qiymətləndirilməsi üçün aidiyyəti qurumların – Abşeron Rayon İcra Hakimiyyəti, Dövlət Şəhərsalma və Arxitektura Komitəsi, Əmlak Məsələləri Dövlət Xidməti və Ekologiya Nazirliyinin bu işə cəlb olunması və araşdırma aparması zəruridir.

Digər tərəfdən, qeyd olunan iddialar arasında yer alan “rəsmi şəxslərin adından istifadə” məsələsi də hüquqi qiymətləndirilməli haldır. Əgər bu məlumatlar təsdiqlənərsə, bu, həm Cinayət Məcəlləsinin, həm də inzibati hüquq pozuntularına dair normativlərin pozulması kimi qiymətləndirilə bilər.

Hal-hazırda məsələ ilə bağlı aidiyyəti hüquq-mühafizə orqanlarına müraciət olunacaq və ictimaiyyətə rəsmi məlumat təqdim ediləcəyini ümid edirik.

Qarşı tərəfin mövqeyini dərc etməyə hazırıq.

Bakunews.az

Keçmiş müavin Svetlana Hüseynovanın məhkəməyə verdiyi 38 müəllimdən bir neçəsi onun təzyiqlərindən və təxribatlarından şikayət edir.

Son günlər sosial şəbəkələrdə və mediada adı tez-tez hallanan 201 saylı tam orta məktəbdə deyəsən, nəhayət ki, əsl araqarışdıranlar aşkar olunub. Məktəbin sabiq direktor müavini Svetlana Hüseynovanın fəaliyyəti ətrafında yeni iddialar ortaya çıxıb. Məlumata görə, Hüseynova məktəbdə çaxnaşma yaratmaq məqsədilə bir sıra keçmiş əməkdaşları ilə birlikdə koordinasiyalı şəkildə hərəkət etməyə cəhd göstərib.
Svetlana Hüseynovadan öz keçmiş iş yoldaşları bildirir ki, son 18 ayda 214 dəfə məhkəmə iddiası qaldıran peşəkar böhtançı Svetlana Hüseynova hazırda keçmiş iş yoldaşlarını – 38 nəfər müəllimi təkrar-təkrar məhkəməyə verir. Məktəbin içində onun icraçıları olan Saleh Məmmədov, Kəmalə Mönsümova, Lalə Şəfəqətova və Aybəniz İbrahimova ilə mütəmadi əlaqə saxlayaraq məktəbdə sabitliyi pozmağa yönəlik addımlar atır.

Daxil olan səs yazılarında və sənədlərdə iddia olunur ki, bu şəxslər məktəb daxilində müxtəlif təxribat xarakterli fəaliyyətlər həyata keçirməyə cəhd ediblər. Səs yazılarından birində Teymur Həsənovun Saleh Məmmədova zəng edərək 102 Zəng Xidmətinə şikayət etməyi və yanlış məlumatlar verməyi tövsiyə etdiyi bildirilir. Digər səs yazılarında isə Svetlana Hüseynovanın Aybəniz İbrahimova və Kəmalə Mönsümova ilə əlaqə saxlayaraq məktəb daxilində qarışıqlıq yaratmağı tapşırdığı qeyd olunur.

Qeyd edilən üç müəllim – Saleh Məmmədov, Kəmalə Mönsümova və Lalə Şəfəqətova artıq əmək fəaliyyətinə xitam verilmiş şəxslərdir. Mənbələrin iddiasına görə, bu şəxslərin məktəb daxilində müxtəlif etika və peşə qaydalarına zidd davranışlara yol verdikləri qeyd olunur.

Hazırda məsələ ilə bağlı hüquq-mühafizə orqanlarının və Təhsil Nazirliyinin mövqeyi gözlənilir.

Məsələ ilə bağlı yazıda adları keçənlərin mövqeyini öyrənmək mümkün olmadı.(xalq.online)

Onlarında münasibətini dərc etməyə hazırıq.