Azərbaycan Respublikası Milli Arxiv İdarəsi “Dövlət Arxivinin filiallarında aparılacaq əsaslı və cari təmir işlərinin” satın alınması üzrə 14.07.2025-ci ildə başladığı açıq tenderə yekun vurub. Müsabiqənin qalibi “VEST-LTD” Qapalı Səhmdar Cəmiyyəti seçilib və tərəflər arasında 779.849,51 manat məbləğində satınalma müqaviləsi bağlanılıb. Məlumat satınalmaların portalında 04.09.2025-ci ildə dərc edilib.
Müsabiqənin şərtlərinə görə “VEST-LTD” QSC ilin sonunadək Dövlət Arxivinin Sumqayıt və Gəncə filiallarında cari təmir işləri aparacaq.
Məlumat üçün bildirmək istərdik ki, Milli Arxiv İdarəsi bir mənbədən satınalma metodu tətbiq etməklə 01.04.2025-ci ildə Sumqayıt filialının arxiv binası üçün İqtisadiyyat Nazirliyi yanında Əmlak Məsələləri Dövlət Xidməti ilə 326,94 manat məbləğində icarə müqaviləsi bağlayıb. Bu müqavilənin başlanma tarixi 14.03.2025-ci il, bitmə tarixi 14.03.2028-ci ilə müəyyən edilib. Dövlət satınalmalarının portalına yerləşdirilmiş bu məlumatdan da görsəndiyi kimi Milli Arxiv İdarəsi Sumqayıt filialının arxiv binası üçün Əmlak Məsələləri Dövlət Xidməti ilə üç illik icarə müqaviləsi bağlayıb və buna cəmi 326,94 manat ödəyib. Amma təmirinə yüz minlərlə dövlət vəsaiti xərcləyir.
Bundan əlavə Milli Arxiv İdarəsi 23.02.2023-cü ildə ”Azərbaycan Respublikasında arxiv işinin inkişafına dair 2020-2025-ci illər üçün Dövlət Proqramı”nın maliyyə təminatı ilə bağlı “Dövlət Arxivi Sumqayıt filialı üçün arxiv binasının tikintisi işləri”nin satın alınması üzrə “KONEKS CONSTRUCTİON” Məhdud Məsuliyyətli Cəmiyyəti ilə 9.242.698,69 manat məbləğində satınalma müqaviləsi bağlamışdır. Bu müqavilənin başlanma tarixi 21.02.2023-cü il, bitmə tarixi 21.02.2026-cı ilə müəyyən edilmişdir.
Göründüyü kimi Milli Arxiv İdarəsi Sumqayıt filialı üçün arxiv binasının tikintisi işlərinə 2023-cü ilin fevralında doqquz milyon manatdan çox vəsait ayırmışdır və 2026-cı ilin sonuna qədər arxiv filialının yeni binasının tikintisi başa çatdırılmalı idi. Amma Milli Arxiv İdarəsi 01.04.2025-ci ildə Əmlak Məsələləri Dövlət Xidməti ilə Sumqayıt filialının arxiv binası üçün üç illik icarə müqaviləsi bağlayıb. Bəs Sumqayıt filialının tikintisinə 2023-cü ildə ayrılmış doqquz milyon manat necə olub?
Qeyd edək ki, Milli Arxiv İdarəsi 05.12.2024-cü ildə də “VEST-LTD” Qapalı Səhmdar Cəmiyyəti ilə Bakı şəhəri Həsən Bəy Zərdab küçəsi, 593 ünvanında yerləşən Dövlət Arixvlərinin binasında aparılacaq əsaslı təmir işlərinin satın alınması üzrə 671.902,74 manat məbləğində satınalma müqaviləsi bağlamışdır.
Bundan əlavə Milli Arxiv İdarəsi 11.12.2023-cü ildə Dövlət Arxvlərinin inzibati binasında (Bakı şəhəri, Həsən Bəy Zərdabi küçəsi, 593 ünvanında yerləşən) aparılacaq cari təmir işlərinin satın alınması üzrə “FASTTECH” Məhdud Məsuliyyətli Cəmiyyəti ilə 256.835,6 manat məbləğində satınalma müqaviləsi bağlamışdır.
Milli Arxiv İdarəsi 17.07.2021-ci ildə isə Bakı şəhəri, Ziya Bünyadov prospekti, 3 və Həsən bəy Zərdabi küçəsi, 593 ünvanında yerləşən arxiv binalarının “Cari təmir işlərinin satın alınması” üzrə “VEST-LTD” Qapalı Səhmdar Cəmiyyəti ilə 164.982,67 manat məbləğində satınalma müqaviləsi bağlamışdır.
Göründüyü kimi Milli Arxiv İdarəsi son dörd ildə “VEST-LTD” Qapalı Səhmdar Cəmiyyəti ilə bir neçə satınalma müqaviləsi bağlamışdır.
Rəsmi, İqtisadiyyat Nazirliyi yanında Dövlət Vergi Xidmətinin reyestr məlumatlarına əsasən, “Vest-LTD” QSC 14 aprel 2010-cu ildə qeydiyyata alınıb. Nizamnamə kapitalı 2050 AZN olan şirkətin hüquqi ünvanı Bakı şəhəri Binəqədi rayonu, Cavad xan küçəsi, ev 51, mənzil 46-da yerləşir. QSC-nin qanuni təmsilçisi Verdəliyev Şahin Əlimərdan oğludur.
Amma qeyri rəsmi məlumatlara görə QSC məşhur iş adamı Ramazan Mirzəyevə məxsusdur. MMC-yə 2016-cı ilə qədər Ramazan Mirzəyevin qardaşı İbrahim Mirzəyev rəhbərlik edib. Mediada yer alan məlumatlara görə beş qardaş – Ramazan, Hüseyn, Əli, İbrahim və Qərib bir vaxtlar möhkəm ailə klanı təşkil edirdilər. Ailə biznesinin əsasını bir çox illər bundan əvvəl böyük və daha təcrübəli qardaş olan Ramazan qoyub. Lakin sonradan onların arasında pul üstündə münaqişə yaranıb. Amma buna baxmayaraq Ramazan Mirzəyevə məxsus, lakin heç birində rəsmi adı olmayan onlarla şirkətlər mövcuddur ki, bu gün Bakı Şəhər İcra Hakimiyyəti və ona tabeli Bakı Şəhər Əsaslı Tikinti və Təmir” MMC , Mənzil Kommunal Təsrrüfat İstehsalat Birlikləri bütün təmir tikinti işlərini o şirkətlərə həvale edir. Milli Arxiv İdarəsinin yüzminlərlə müqavilə bağladığı “VEST-LTD” Qapalı Səhmdar Cəmiyyəti və “KONEKS CONSTRUCTİON” Məhdud Məsuliyyətli Cəmiyyəti də Ramazan Mirzəyevə məxsus olan şirkətlərə daxil olduğu iddia edilir.
Qeyd edək ki, Milli Arxiv İdarəsinin rəisi Əsgər Rəsulovdu. Azərbaycan Respublikası Prezidentinin 2018-ci il 31 iyul tarixli, 369 nömrəli Sərəncamı ilə Milli Arxiv İdarəsinin rəisi təyin edilmişdir. Daha əvvəl isə Milli Arxiv İdarəsi rəisinin müavini vəzifəsində işləmişdir.
Aktualinfo.org
