Məlum olduğu kimi ikinci Qarabağ müharibəsində müzəffər ordumuzun göstərdiyi şücaət nəticəsində azad edilmiş torpaqlarımızda infrastruktur layihələrin həyata keçirilməsi davam etməkdədir. Demək olar ki, torpaqlarımızda artıq böyük inkişafın təməlləri atılmışdır. Hazırda dövlətimizin qarşısında dayanan əsas vəzifə azad olunmuş ərazilərdə tikinti-quruculuq işlərinin həyata keçirilməsidir.
Artıq bir sıra istiqamətlərdə, xüsusən regionun enerji ilə təminatı, yol infrastrukturunun qurulması, dəmir yolu xətlərinin və hava limanlarının tikintisi sahəsində ciddi addımlar atılıb. Bu istiqamətdə Prezident İlham Əliyevin tapşırığına uyğun olaraq aidiyyəti dövlət qurumlarının rəhbər şəxslərindən ibarət heyət Şərqi Zəngəzura səfər etmiş, görülən işlərlə tanışlıqdan sonra aparılan yenidənqurma və bərpa işlərinin, infrastruktur layihələrinin icrasının dövlət başçımızın tapşırıqlarına uyğun olaraq yerinə yetirilməsi istiqamətində aidiyyəti qurumların rəhbərlərinə lazımi göstərişlər və tapşırıqlar verilmişdi.
Bəs aidiyyəti qurumların rəhbərləri ölkə başçısının göstəriş və tapşırıqlarını necə həyata keçirir?
Məlum olduğu kimi, bərpa prosesində qarşıda duran mühüm vəzifələrdən biri də işğaldan azad edilmiş ərazilərdə enerji infrastrukturunun qurulması və enerji təhlükəsizliyinin təmin edilməsi olub. Burada əsas məqsəd azad edilmiş torpaqlarımızda müasir standartlara cavab verən enerji sisteminin yaradılması və ölkənin ümumi enerji sisteminə inteqrasiya edilməsidir.
Təəssüflər olsun ki, üç mindən çox şəhidin qanı hesabına işğaldan azad edilmiş ərazilərdə şəxsi çirkin məqsədləri üçün çalışanlar da var. Bunu son vaxtlar sosial şəbəkələrdə və elektron mediada yayılan çoxsaylı təkzib olunmayan məlumatlar da sübut edir. İşğaldan azad edilmiş ərazilərin elektrik enerjisi ilə təchizatını həyata keçirən “Azərişıq” ASC-nin bir neçə vəzifəli şəxsinin adı bu kimi çirkin əməllərdə çəkilir.
İfadetv.com-un araşdırma qrupu bir müddət əvvəl elektron mediada yayılmış və “Azərişıq” ASC-nin adı hallanan rəsmiləri tərəfindən təkzib edilməyən bu məlumatların araşdırılıb hüquqi qiymət verilməsi məqsədi ilə aidiyyəti dövlət qurumlarına müracət edib. Araşdırma qrupu sözügedən təkzibolunmaz məlumatları bir daha diqqətinizə çatdırır:
“Azərişıq” Qarabağa işıq çəkən sahibkarın çırağını söndürüb
Vətən Müharibəsindən dərhal sonra, cəmi 37 günə Şuşaya işıq çəkməyi bacarmış, Zəngilanın Ağalı kəndinə və işğaldan azad edilmiş digər ərazilərimizin elektirikləşməsində müstəsna xidmətlər göstərmiş “Enerji Constraction” şirkətinin haqqı ödənməyib! Pulu verməyən isə “Azərişıq” prezidenti Vüqar Əhmədovun ən yaxın dostu Kamil Hüseynovdur. “Enerji Constraction”MMC-nin təsisçisi, Laçında doğulmuş Yusif Eldar oğlu Yusifli “Yeni Müsavat”a deyib ki, sevinc içində, var qüvvəsi ilə gördüyü işlərə görə ona və 250 işçisinə, mal-material, maşın-texnika sahiblərinə külli miqdarda – 5 milyon manatdan yuxarı pulu ödəməyiblər!!!
Sahibkarın sözlərinə görə 2020-ci ildə “Dost Group” MMC-ni təsis edib və işə başlayıb. Sonradan MMC-nin adını “Enerji Constraction”a dəyişib:
“Təsisçi olmaqla bərabər MMC-nin direktoru da olmuşam. Şahin Mollayev vasitəsi ilə Kamil Hüseynovla tanış oldum. Kamil Hüseynov özünü mənə “Azərişıq” sədrinin ən yaxın dostu olaraq tanıtdı. Mənimlə tanış olandan sonra Kamil Hüseynov dedi ki, “Azərişığ”ın rayonlarda, işğaldan azad edilmiş Qarabağda görəcəyi işlər var, həmin işləri görə bilərsən? Mən də tapşırılan işləri görə biləcəyimi dedim. İlk olaraq Şəmkirin Qapanlı, Bayramlı, Gədəbəyin Qasımlı, Əyrivəng kəndləri təqdim olundu. Kəndlərdə görüləcək işlərin smetasını çıxarıb Şahin Mollayevə, o da Kamil Hüseynova təqdim etdi. Bundan az sonra Kamil Hüseynovla görüşdük, iş həcmləri, smetaları bir daha təqdim etdim, görüləcək işlərin qiymətləri ilə razılaşdıq və işə başladıq. Mənə dedi ki, işə başlayandan sonra görülmüş işlərin smetasını təqdim edəcəksən, həmin görülən işlərin dəyərinin üzərinə 10 faiz qoyulmaqla sənə veriləcək.
Məsələn, işin maya dəyəri 100 min manat olacaqsa, onun üzərində 10 faiz qazanc veriləcək. Mən də işləri görməyə başladım. Zavoddan borca transformatorlar, dayaqlar götürdüm. Bu işləri görmək üçün böyük vəsait lazım idi. Ona görə də dost-tanışlardan borc aldım, mağazalara, bazardakı iş adamlarına gördüyümüz işləri göstərib lazım olan mal-materialları borca götürdüm.
İşləri görüb qurtarandan sonra “Azərişıq” nümayəndələri, yerli, regional “Azərişıq” idarələrinin rəisləri gəldilər. “Enerji Constraction”la “Azərişıq” arasında rəsmi müqavilə bağlandı, gördüyüm işlərin Forma 2-ni “Azərişıq”a təqdim etdim. Yerli şəbəkənin, regional şəbəkənin və “Azərişıq”ın rəhbər şəxsləri Forma 2-ləri və sənədləri qəbul etdilər. Bütün gördüyümüz işlərə baxış keçirib təhvil aldılar.
Sahibkar deyir ki, Ali Baş Komandan İlham Əliyevin rəhbərliyi altında Qarabağ azad edildikdən sonra “Azərişıq” rəhbərliyindən ona Şuşaya işıq çəkmək təklifi gəlib: “Qarabağın, Şuşamızın alınması hər kəs kimi bizi də sevindirir. Bu iş təklifi gələndə can-başla razılaşdıq. Bilirdik ki, ərazi minalanıb, ərazidə işləyəcək işçi briqadalarımıza, maşın-texnikalarımıza təhlükə var, bununla belə 1 gün fasilə vermədən işə başladıq. 2020-ci ilin dekabrında artıq işə sahədə start vermişdik.
Çox qısa müddətə Füzulidən Şuşaya yüksək gərginlikli elekrtik xəttləri çəkdik. Mən Qarabağda tapşırılan işləri gördüyüm müddətdə maliyyə məsələlərini Kamil Hüseynov öz üzərinə götürdü. O, özünü “Azərişıq” rəhbərinin ən yaxın dostu kimi təqdim etdiyindən, ona inamım vardı. Ödənişlər, müqavilələr Kamil Hüsyenovun rəhbərliyi altında həyata keçirildi”.
Sahibkar deyir ki, “Azərişıq” rəhbəri Vüqar Əhmədov onun gördüyü işlərə şəxsən diqqət göstərib, əraziyə gələrək görülən işlərin gedişatı ilə maraqlanıb: “Qarabağda işlədiyimiz müddətdə özü şəxsən gördüyümüz işlərlə maraqlanırdı, zəng edirdi, hər bir işçinin sıxıntısı, çətinlikləri ilə maraqlanırdı. Ödənişlərin vaxtında verilməsi tapşırıqları verirdi. Vüqar Əhmədovun tapşırığı əsasında işləri görüb “Azərişıq”a təhvil vermişik. Ödənişlər “Enerji Constraction”a gəlib, lakin Kamil Hüseynov görülən işlərin pulunu mənə ödəməyib. Halbuki, əlimdə görülən işlərin həcmləri, sənədlər var. Yalandan deyir ki, guya o, işləri görməmişik. Dəfələrlə yoxlanılıb, təsdiq olunub ki, işlər görülüb, yerli şəbəkələr müvafq yoxlamalar aparıb və görülən işləri təhvil alıblar.
Basdırdığımız dayaqlar sayılıb, çəkdiyimiz kabellərin hər bir metrəsi ölçülərək təhvil alınıb. Bütün görülən işlər sənədlərdə əksini tapıb. Bəzi işlər var ki, ödənişi ümumiyyətlə edilməyib. Kamil Hüseynova demişəm ki, vəsait, ödəniş lazımdır, çünki borc aldığım adamlar məni sıxır, evimə gəlir, məni narahat edirlər. Kamil Hüseynov da deyib ki, görülən işlərə görə hələ müqavilə bağlanmayıb, müqavilə bağlanandan sonra ödəniş olacaq. Sonradan öyrəndim ki, gördüyüm işlərə görə müqavilələr başqa firmalarla bağlanıb. Pul başqa firmalara köçürülüb və oradan da mənimsənilib”.
Sahibkar hesab edir ki, bu məsələlərdən Vüqar Əhmədovun məlumatı yoxdur, baş verənlər onun yaxın dostu Kamil Hüseyovun öz oyunudur: “Vüqar Əhmədov tapşırıq verib, iş mənə verilib, surətlə müqavilələr bağlanıb, işlərin tez bir zamanda görülməsi üçün əlindən gələni edib, ödənişlər də olunub. Lakin Kamil Hüseynov tərəfindən həmin ödənişlər mənə çatdırılmayıb, mənimsənilib”.
Sahibkar deyir ki, bəzi işlərin vaxtında görülməməsi Kamil Hüseynovun vaxtında ödəmələri etməməsi ilə bağlı olub: “2 aya görəcəyimiz iş 5 aya qədər uzanırdı. Çünki ödənişlər edilmirdi. İcarəyə götürdüyümüz maşın-texnikalar da boş dayanırdı. Amma məcbur qalıb ödənişləri özümüz edirdik. Hər dəfə də deyirdi ki, işlə, işləri gör, pulun verləcək. Mən də işləmişəm. 5 milyon manatdan yuxarı borc yaranıb. Bü gün mən “Enerji Constraction” təsisçisi olsam da, şikətin direktoru Kamil Hüseynovun öz adamıdır. Şirkətə yaxınlaşan işçilərə də deyirlər ki, pulu Yusifə – guya mənə ödəyiblər. Amma pulu harda, necə ödədiklərini deyən yoxdur. Mən də deyirəm ki, sənəd verin. Mənim ödənişlərimi ödəyin”.
Sahibkar deyir ki, Kamil Hüseynov 1 ildən artıqdır ki, onunla görüşməkdən yayınır: “Telefon zənglərimə də cavab vermir. Qəbuluna gedirəm, qəbul etmir. Mən üzərimə düşən işləri artıqlaması ilə görmüşəm. Ali Baş Komandanın rəhbərliyi altında, Qarabağda işlərin tez bir zamanda görülməsi üçün üzərimə düşən işləri vaxtında və vicdanla yerinə yetirmişəm. Hərbi hissələr, həyati vacib obyektlərin işıqlanması üçün əlindən gələni etmişəm.
37 günə Füzulidən Şuşa şəhərinə, Kəlbəcərin Alagöllər kəndinə elektrik çəkmişik, qarın hündürlüyü 2 metrə çatdığı bir vaxtda fasilə vermədən işə davam etmişik. Doğulduğum Laçına ilk işıq xəttini çəkmişəm. Zəngilanın Ağalı kəndinə işığı mən “Enerji Constraction” olaraq çəkmişəm. Bunu yerli şəbəkələr də, Qarabağ Regional Eneji İdarəsi də təsdiqləyir. İşləri görən mən olmuşam, amma ödənişlər başqa firmalara olub və pulu da oradan nağdlaşdırıb götürüblər. Ona görə də çox acınacaqlı duruma düşmüşəm. Vəd verirlər, ödənişlərimi vermirlər”.
Sahibkar deyir ki, 2023-cü ildə komissiya yaradılıb və guya komissiya gedib yenidən yerində araşdırma aparıb borcunu ödəyəcəklərini vəd ediblər: “Komissiya getdi, araşdırdı, qayıtdı gəldi. Mən bu işi mənasız sayırdım. Çünki mən bütün işləri bir-bir təhvil vermişəm. Yoxlayıb təhvil götürüblər. Təhvil götürdükləri işləri bir də saydılar, yoxladılar. Təklif etdim ki, gəlin, akt bağlayaq, imzalayaq. Dedilər ki, akt bağlaya bilməzlər, bunun üçün Kamil Hüseynov icazə verməlidir.
Heç bir üzləşmə aktı vermirlər, mənimlə hesablaşmırlar. Mənim vəziyyətim olduqca pisdir, borc, mal-material sahibləri qapıma gəlir, məndən şikayətlər edirlər. Ona görə də ölkə rəhbərliyinə, Ali Baş Komandana, “Azərişıq” rəhbəri Vüqar Əhmədova müraciət edirəm: Sizlərin xoş niyyətinizdən, güvəncinizdən istifadə edib ətrafınızdakı insanlar yalan danışır, bizim kimi iş adamlarının, Qarabağda əziyyət çəkənlərin haqqına girirlər. Mənim Qarabağda 250 nəfərə yaxın işçim işləyib. Onlardan 30 nəfərə yaxını Vətən Müharibəsinin iştirakçıları olub. Hamımızın haqqını girdilər, pulumuzu vermədilər”.
Sahibkar deyir ki, Şuşaya işıq çəkilməsi ilə bağlı dövlət televiziyası qısametrajlı sənədli film çəkib və efirə verib. Vüqar Əhmədovdan xahiş edir ki, ən yaxın dostu Kamil Hüseynovun onu aldatmasının qarşısını alsın: “Kamil Hüseynov pulları mənimsəyib. Yalandan deyir ki, bizim Yusifə borcumuz yoxdur. Mən ortaya sənəd qoyuram. Onlar isə boş sözlərdən başqa heç nə qoya bilmirlər. Çünki mənə çatacaq pullar Kamil Hüseynov tərəfindən mənimsənilib. Xahiş edirəm ki, Vüqar Əhmədov bu məsələyə son qoysun, mənə çatacaq pulların ödənməsini təmin etsin”.
AzToday.az sahibkar Yusif Yusiflinin bu açıqlamaları ətrafında araşdırma aparıb.
Dövlət Vergi Xidmətinin kommersiya qurumunun hüquqi şəxslərin dövlət reyestrinə daxil edilmiş məlumatlarında “ENERJI CONSTRUCTION” Qapalı Səhmdar Cəmiyyətinin Bakı şəhəri Lokal Gəlirlər Baş İdarəsində 13.01.2020-ci il tarixdə dövlət qeydiyyatına alındığı bildirilir. Nizamnamə kapitalı 2000.00 manat olan QSC-nin hüquqi ünvanının BAKI ŞƏHƏRİ BİNƏQƏDİ RAYONU, BİLƏCƏRİ ŞTQ, NATƏVAN (BİLƏCƏRİ QƏS.), ev 2, qanuni təmsilçisinin isə hazırda Dadaşov Eldəniz Dadaş oğlu olduğu göstərilir. Reyestrə daxil edilmiş məlumatlarda QSC “DOST GROUP” MMC kimi qeydiyyatdan keçib və 06-10-2022-ci il tarixdən adı dəyişdirərək “Enerji Construction” MMC qoyulub. QSC-nin təsisçisi və ilk qanuni təmsilçisi Yusif Eldar oğlu Yusifli. 21.12.2022-ci il tarixdən MMC hüquqi formasını dəyişərək Qapalı Səhmdar Cəmiyyətinə çevrilib.
Qapalı Səhmdar Cəmiyyəti ilə bağlı rəsmi məlumatlar bu qədərdir. Bir də dövlət satınalmalarının internet portalında QSC-nin qalibi olduğu tenderlər barədə məlumatlar var. QSC dövlət qeydiyyatına alındıqdan 10 ay sonra, 18.11.2020-ci ildən 16.08.2023-cü ilə qədər, yəni 3 il ərzində dəyəri 3 milyon ABŞ dollarının ekvivalentindən yuxarı olan 10 açıq tenderin qalibi olub. QSC-nin udduğu tenderlərə və onların məbləğlərinə diqqət yetirək.
QSC dövlət qeydiyyatına alındıqdan cəmi 10 ay sonra “Azərişıq” ASC-nin keçirdiyi tenderin qalibi elan olunub və 18.11.2020-ci il tarixdə tərəflər arasında 6.795.148,69 manat məbləğində satınalma müqaviləsinin bağlanıldığı açıqlanıb.
06.08.2021-ci il tarixdə Qaçqınların Və Məcburi Köçkünlərin İşləri Üzrə Dövlət Komitəsinin Tikilməkdə Olan Müəssisələr Müdiriyyəti tərəfindən keçirilmiş tenderin qalibi elan olunub və tərəflər arasında 2.104.766 manat məbləğində satınalma müqaviləsinin bağlanıldığı açıqlanıb.
03.09.2021-ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 14.417.270,33 manat məbləğində satınalma müqaviləsinin bağlanıldığı açıqlanıb.
12.10.2021-ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 5.794.920,55 manat məbləğində satınalma müqaviləsinin bağlanıldığı açıqlanıb.
01.12.2021-ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 7.183.841,29 manat məbləğində satınalma müqaviləsinin bağlanıldığı açıqlanıb.
27.05.2022-ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 6.611.605,45 manat məbləğində satınalma müqaviləsinin bağlanıldığı açıqlanıb.
14.06.2022-ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 7.162.308,59 manat məbləğində satınalma müqaviləsinin bağlanıldığı açıqlanıb.
28.06.2022 -ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 4.928.215,66 manat məbləğində satınalma müqaviləsinin bağlanıldığı açıqlanıb.
26.07.2022 -ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 5.927.790,37 manat məbləğində satınalma müqaviləsinin bağlanıldığı açıqlanıb.
16.08.2023 -ci il tarixdə “Azərişıq” ASC-nin keçirdiyi tenderin qalibi elan olunub və tərəflər arasında 12.331.466,47 manat məbləğində satınalma müqaviləsinin bağlanıldığı açıqlanıb.
Göründüyü kimi “Enerji Construction” QSC son üç il ərzində iddiaçı olduğu 10 açıq tenderin 9-nu “Azərişıq” ASC-dən qalib gəlib və Səhmdar Cəmiyyətdən ümumi olaraq 71 152 563 manat məbləğində dövlət sifarişi alıb.
“Enerji Construction” QSC-nin direktoru Yusif Yusifli mətbuata açıqıamasında qeyd edir ki, “işləri görüb qurtarandan sonra “Azərişıq” nümayəndələri, yerli, regional “Azərişıq” idarələrinin rəisləri gəldilər. “Enerji Constraction”la “Azərişıq” arasında rəsmi müqavilə bağlandı, gördüyüm işlərin Forma 2-ni “Azərişıq”a təqdim etdim. Yerli şəbəkənin, regional şəbəkənin və “Azərişıq”ın rəhbər şəxsləri Forma 2-ləri və sənədləri qəbul etdilər. Bütün gördüyümüz işlərə baxış keçirib təhvil aldılar.”
Sahibkar deyib ki, “çox qısa müddətə Füzulidən Şuşaya yüksək gərginlikli elekrtik xəttləri çəkdik. Mən Qarabağda tapşırılan işləri gördüyüm müddətdə maliyyə məsələlərini Kamil Hüseynov öz üzərinə götürdü. O, özünü “Azərişıq” rəhbərinin ən yaxın dostu kimi təqdim etdiyindən, ona inamım vardı. Ödənişlər, müqavilələr Kamil Hüsyenovun rəhbərliyi altında həyata keçirildi”.
Yusif Yusifli həmçinin deyib ki, “bəzi işlər var ki, ödənişi ümumiyyətlə edilməyib. Kamil Hüseynova demişəm ki, vəsait, ödəniş lazımdır, çünki borc aldığım adamlar məni sıxır, evimə gəlir, məni narahat edirlər. Kamil Hüseynov da deyib ki, görülən işlərə görə hələ müqavilə bağlanmayıb, müqavilə bağlanandan sonra ödəniş olacaq. Sonradan öyrəndim ki, gördüyüm işlərə görə müqavilələr başqa firmalarla bağlanıb. Pul başqa firmalara köçürülüb və oradan da mənimsənilib”.
Bu açıqlamalardan da göründüyü kimi “Azərişıq” ASC-özbaşınalıqlar baş alıb gedir. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti dövlət satınalmalarının ölkədə şəffaf və azad rəqabət əsasında həyata keçirildiyini dəfələrlə açıqlayıb. Lakin sahibkar Yusif Yusifli açıqlamalarından belə çıxır ki, “Azərişıq” ASC-də satınalmalara ümumiyyətlə nəzarət yoxdu. Hər şey əvvəlcədən planlaşdırılır, dost-tanışlardan iş icraçıları müəyyən edilir, tenderlər isə formal olaraq keçirilir və guya satınalmaların qanun çərçivəsində keçirildiyi görüntüsü yaradılır.
Sahibkar Yusif Yusiflinin daha bir açıqlamasına diqqət yetirək: “bəzi işlərin vaxtında görülməməsi Kamil Hüseynovun vaxtında ödəmələri etməməsi ilə bağlı olub: “2 aya görəcəyimiz iş 5 aya qədər uzanırdı. Çünki ödənişlər edilmirdi. İcarəyə götürdüyümüz maşın-texnikalar da boş dayanırdı. Amma məcbur qalıb ödənişləri özümüz edirdik. Hər dəfə də deyirdi ki, işləri gör, pulun verləcək. Mən də işləmişəm. 5 milyon manatdan yuxarı borc yaranıb. Bü gün mən “Enerji Constraction” təsisçisi olsam da, şikətin direktoru Kamil Hüseynovun öz adamıdır.
Bu da “Azərişıq” ASC-nin tender şousunun görünməyən daha bir tərəfi. Kimdir Kamil Hüseynov ki, dövlət vəsaitlərini istədiyi kimi idarə edir, istədiyi şəxsə pullar ayırır. Yusif Yusiflinin iddiasına görə güya bütün bunlardan “Azərişıq” ASC-nin sədri Vüqar Əhmədovun xəbəri yoxmuş. Var, Vüqar Əhmədovun hər şeydən xəbəri var. Kamil Hüseynovu məhz o idarə edir.
Orxan Məmmədli
İfadetv.com-un araşdırma qrupu “Enerji Constraction” QSC-nin təsisçisi, sahibkar Yusif Yusiflinin bu açıqlamalarının araşdırılması üçün aidiyyatı dövlət qurumlarına müraciət ünvanlayıb.Hələlik səs səmir yoxdur.
Sahibkarın bu müraciətindən göründüyü kimi “Azərişıq” ASC bir korrupsiya yuvasına çevrilib. Bununla bərabər digər dövlət qurumlarını da öz korrupsiya piramidasının alətinə çevirib. Məlum olduğu kimi İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti satınalmaların təşkilinə nəzarət edən qurumdur. Necə olur ki, bu dövlət qurumu “Azərişıq” ASC-nin keçirdiyi satınalmaları saxtalaşdırmağa şərait yaradır? Müraciətindən də göründüyü kimi sahibkar iddia edir ki, “bəzi işlər var ki, ödənişi ümumiyyətlə edilməyib. Kamil Hüseynova demişəm ki, vəsait, ödəniş lazımdır, çünki borc aldığım adamlar məni sıxır, evimə gəlir, məni narahat edirlər. Kamil Hüseynov da deyib ki, görülən işlərə görə hələ müqavilə bağlanmayıb, müqavilə bağlanandan sonra ödəniş olacaq. Sonradan öyrəndim ki, gördüyüm işlərə görə müqavilələr başqa firmalarla bağlanıb. Pul başqa firmalara köçürülüb və oradan da mənimsənilib”.
Antiinhisar və İstehlak Bazarına Nəzarət Dövlət Xidməti sahibkarın bu açıqlamalarına niyə münasibət bildirmir? Necə olur ki, işi görən qalır qıraqda, müqavilə başqa şirkətlərlə bağlanılır? Bəs şəffaflıq? Bəs dövlət vəsaitlərindən səmərəli istifadəyə nəzarət harada qalır?
Maraqlıdır Baş prokurorluq yanında Korupsiyaya qarşı Mübarizə Baş İdarəsi “Azərişıq” ASC-də yol verilən bu kimi korrupsiya əməllərini niyə görməzdən gəlir? Sahibkar Yusif Yusifli “Azərişıq” ASC-nin satınalmalada yol verdiyi bütün qanusuzluqları bütün çılpaqlığı ilə açıb göstərir. Tək “Enerji Constraction” QSC ilə görülən işlərdə bu qədər qanunsuzluqlara yol verilirsə, eyni saxtakarlıqlara digər satınalmalarda da yol verilmədiyinə kim zəmanət verə bilər?
Satınalmaların təşkilinə nəzarət edən dövlət qurumu olaraq Antiinhisar və İstehlak Bazarına Nəzarət Dövlət Xidməti zəmanət verə bilərmi ki, analoji hallar “Azərişıq” ASC-nin işbirliyində olduğu digər şirkətlərlə də baş verməyib? Dövlət Xidməti zəmanət verə bilərmi ki, “Azərişıq” ASC-nin formal tenderlərinin qalibi kimi göstərdikləri "Harmony İndustrial Construction and Engineering Group" MMC, "19 saylı Tikinti Təmir İdarəsi" MMC, "Şans Construction" "Smart Energy Services" "İnterqas" “MSDIS Holding” MMC-lərlə eyni saxtakarlıqlar təkrar olunmayıb?
Baş prokurorluq yanında Korupsiyaya qarşı Mübarizə Baş İdarəsi dərhal hərəkətə keçməli, “Azərişıq” ASC-nin işbirliyində olduğu şirkətlərin fəaliyyətini araşdırıb hüquqi qiymət verməlidir.
İfadetv.com-un araşdırma qrupu
