AAYDA rəhbərliyinin sevimlisi olan Göyçaylı qardaşların – ATF MMC-nin fəaliyyəti barədə şikayətlər susmaq bilmir. 2018-ci ildə Göyçay rayonunda güclü yağıntılar inşasına milyonlarla pul ayrılmış körpünü yuyub uçurdu. Yağış tək körpüləri yumadı. Yeyintinin miqdarını da üzə çıxardı. Nəticədə tikinti aparan ATF MMC-nin rəhbərliyi məsuliyyətə cəlb olundu. Buna baxmayaraq cəmi iki il sonra sözügedən şirkət demək olar ki, əksər tenderlərin qalibi oldu. Azərbaycanda dövlət qurumlarının bahalı tender layihələri vasitəsilə hər il dövlət büdcəsinə külli miqdarda ziyan vurulması kimsəyə sirr deyil. Qurumların bu maxinasiyalarında isə onlara müxtəlif şirkətlər yardımçı olur. Bu yazımızda həmin şirkətlərdən biri olan “ATF” MMC-dən bəhs edəcəyik. Beləliklə…”ATF” – Üç qardaşın bir şirkəti “ATF” MMC əsasən Göyçay rayonunda asfalt yollarının tikintisi ilə məşğul olur. Bu şirkəti Azad, Təbriz və Faxrəddin Muradov qardaşları yaradıblar. Şirkətin adı da onların adlarının baş hərflərinin birləşməsindən ibarətdir. Azərbaycan Avtomobil Yolları Dövlət Agentliyinin sədri Saleh Məmmədovun sevimli şirkəti olan “ATF” MMC nəinki Göyçayda, Azərbaycanın müxtəlif yerlərində – İsmayıllının Basqal, Ucarın Yuxarı Şilyan, Bərgüşad, Bağman kəndlərində, Goranboyda, Tərtərdə, Balakəndə hazırda yol tikintisi işləri görür.İndi isə adıçəkilən şirkətin tenderlər vasitəsilə neçə milyonluq dövriyyəyə malik olduğunun statistikasına nəzər salaq.ATF şirkəti 2010-cu ildə 3,4 milyon manat, 2011-ci ildə 5,23 milyon manat, 2012-ci ildə 12,22 milyon manat, 2013-cü ildə 17,72 milyon manat, 2014-cü ildə 9,13 milyon manat, 2015-ci ildə 13,5 milyon manat, 2016-cı ildə 2,43 milyon manat, 2017-ci ildə 3,75 milyon manat, 2018-ci ildə 3,15 milyon manat, 2020-ci ildə 4 milyon manat dəyərində tenderlər “qazanıb”. Tenderlərin ümumi dəyəri 75 milyon manat olub.AAYDA bahalı layihələrin icrasını adətən özü həyata keçirir. Amma AAYDA sədri Saleh Məmmədov bəzən istisnalara yol verir və bu vaxt onun köməyinə öz himayədarlığı ilə yaranan “ATF” MMC şirkəti gəlir.Bahalı layihələr həyata keçirən AAYDA işlərin bəzilərini digər podratçılara həvalə etməsini bəyan etsə, məsələn, 2019-cu ildə bu podratçılara 153 milyon manat ödəniş həyata keçirsə də həmin şirkətlərin adları açıqlanmayıb. Belə ki, hər il çoxlu sayda və bahalı tenderlərin keçirilməsinə baxmayaraq, bu tenderlərin nəticələri ilə bağlı məlumatlara rast gəlmək olmur. Əgər belə olmasaydı, o halda, tenderin nəticələrini etender.gov.az vahid portalında görmək olardı.Amma kimsəyə sirr deyil ki, regionlarda bu cür işlərin böyük əksəriyyəti AAYDA-nın “tövsiyəsi” ilə “ATF” MMC şirkətinə həvalə edilir. Niyə məhz “ATF” MMC-nin seçilməsi isə tərəflərin korrupsiya əməllərində axtarılmalıdır. Saleh Məmmədovun “ATF” MMC ilə “iş birliyi” yalnız tenderlərlə yekunlaşmır. Hətta iş o yerə çatıb ki, Göyçayda yerləşən 17 saylı Yol İstismar İdarəsinin müdiri Rəşad Kərimovu işdən çıxarıb, yerinə “ATF” MMC-nin təsisçilərindən olan Təbriz Muradovun oğlu Tehranı müdir təyin ediblər. Bundan sonra dövlətin idarəsi olan 17 saylı Yol İstismarı İdarəsinin bütün texnikaları qanunsuz olaraq “ATF” MMC-nin tenderdə “udduğu” yol tikintisi işlərinə cəlb edilib. Bu isə korrupsiya cinayətidir. “ATF” MMC-nin təsisçisi və faktiki rəhbəri Fəxrəddin Muradov Cinayət Məcəlləsinin müxtəlif maddələri ilə təqsirləndirilərək məhkəmə qərarı ilə həbs olunub. Rəhbərlikdə isə onu qardaşları Azad və Təbriz Muradovlar əvəzləyib. Buna baxmayaraq, Saleh Məmmədovun agentliyi şirkətlə “işləməyə”, “ATF” də qurumun tenderlərinin rəqibsiz qalibi olmaqda davam edir. “ATF” MMC uzun müddətdir ki, paytaxtdan kənar rayonlarında şəhər, qəsəbədaxili avtomobil yollarının təmir-tikintisi, müxtəlif sosial infrasturktur obyektlərinin tikintisi, həmçinin abadlıq işlərinin həyata keçirilməsi ilə məşğuldur. AAYDA kimi dayağı olan “ATF” MMC son bir neçə ildə çoxlu sayda tenderin “qalibi” olmaqla milyonlarla manat dəyərində layihə icra edib. 2020-ci ilin məlumatına əsasən, şirkət Ağsu, Balakən, Kürdəmir və Mingəçevir şəhərlərində 5 layihəni icra edib. Bu layihələrin ümumi dəyəri 4 milyon manatı ötür. Ümumilikdə, “ATF” MMC 2010-cu ildən bəri yerli icra qurumlarının elan etdiyi 65 tenderin “qalib”i olub. Tenderlərın çoxu Göyçay, Ağdaş, Ağsu, Ucar, Balakən rayonları və Mingəçevir şəhərinin icra hakimiyyətləri tərəfindən elan edilib. Rəsmi məlumatların təhlili göstərir ki, tenderlərin 26-sı Göyçay rayonu ilə bağlı olub və bu tenderlərin ümumi dəyəri 32 milyon manat təşkil edib. “ATF” MMC Göyçayda sadəcə yol çəkməyib. Şirkət həm də abadlıq işlərinin icrasını həyata keçirib, orta məktəb tikintisi aparıb və s. Bir neçə gün öncə İsmayıllı Rayon İcra hakimiyyəti “Büdcədənkənar vəsait hesabına yolların əsaslı təmir işlərinin satın alınması” tenderinin nəticələrini elan etməsi, tenderin qalibi “ATF” MMC olması,Qalib şirkətə 170 889 manat ödəniləcəyi ilə bağlı yayılan xəbərlər ictimaiyyət tərəfindən birmənalı qarşılanmadı.Hal-hazırda işğaldan azad olunmuş bir neçə rayonda da yeni yolların salınmasını həyata keçirən ATF MMC-də güclü ixtisarların aparıldığı müşahidə olunur . Şirkət əməkdaşlarının verdiyi məlumata görə son bir ay ərzində təqribən 150 yə yaxın işçi ixtisara salınıb. Rəhbər şəxslər tərəfindən işcilərə ayın birindən sonra yeni ixtisarlar olacağı bildirilib. Maaşlar azaldılır.Bələ ki, əvvəllər kənar rayonlarda çalışan işçilərə gündəlik 45-50 AZN yazılırdısa, indi bu məbləğ 35-30 manata salınıb. Bu zavodun daxilində çalışan əməkdaşların məvacibində də müşahidə olunur( 30 AZN-dən 25-ə endirilib) İşcilər şirkətin əksər əməkdaşlarla əmək müqaviləsinin olmadığını, bu yolla vergidən yayınlandığını bildirirlər. Şərtlərin çətinliyi, müqavilənin olmaması, maaşların azaldılması səbəbindən əksər texnika sürücüləri işləməkdən imtina edirlər. İddiaya görə Kəlbəcər ərazisində aparılan işlər bu səbəbdən ləngiyir.
Pressdent.media
