Azərbaycan Elm və Təhsil Nazirliyi (ETN) daha bir milyonluq tenderə imza atıb. Tribunainfo.az xəbər verir ki, nazirliyin nəzdində Təhsil Sisteminin İnformasiyalaşdırılması İdarəsi təhsil müəssisələrinin internet şəbəkəsi ilə təmin edilməsi xidmətlərini satın alacaq.
Məlumatda bildirilir ki, tenderin qalibi “TEXNO LYUKS M” MMC olub. Tərəflər arasında işlərin görülməsi üçün 2 milyon 894 min 491 manatlıq müqavilə imzalanıb.
Tribunainfo.az açıq mənbələr üzərindən araşdırma apararaq, bu şirkətlə bağlı bəzi maraqlı məlumatlar əldə edib. Məlum olub ki, “TEXNO LYUKS M” MMC Elm və Təhsil Nazirliyinə yad olan şirkət deyil. Belə ki, bundan əvvəl də tərəflər bir neçə teder məsələsində ortaq olublar.
Araşdırma zamanı bəlli olub ki, sözügedən MMC yalnız Elm və Təhsizl Nazirliyinin tenderlərini udub. Onu da bildirək ki, “TEXNO LYUKS M” MMC 2024-2025-ci ildə 5 tenderə qatılıb. Həmin tenderlərin hamısı ETN-ə məxsus olub. Məsələn, bu ilin 15 iyulunda ETN təhsil müəssisələrinin yüksəksürətli intranet şəbəkəsinə qoşulması, müəssisə daxili şəbəkənin genişləndirilməsi, həmçinin şəbəkənin genişləndirilməsi zamanı dayanıqlığın təmin olunması tenderini “TEXNO LYUKS M” MMC-yə verib və bunun müqabilində 4 milyon 271 min 495 manat ödəyib. Bundan 5 gün əvvəl isə eyni şirkət nazirliyin Ümumtəhsil məktəblərinin yüksəksürətli internet şəbəkəsinə qoşulması və şagirdlərin distant təhsilə cəlb olunması ilə əlaqədar məktəblərin fiber-optik kabellə internetə və daxili şəbəkəyə qoşulmasını həyata keçirib. Buna görə isə 2 milyon 498 min 534 manat ödəniş alıb.
Belə tenderlərdən daha ikisi ötən ilin sentyabrında baş tutub. Tribunainfo.az xəbər verir ki, müəssisələrin yüksəksürətli internet şəbəkəsinə qoşulması, müəssisə daxili şəbəkənin genişləndirilməsi həmçinin şəbəkənin genişləndirilməsi zamanı dayanıqlığın təmin olunması ilə əlaqədar müxtəlif proqram təminatlarının, avadanlıqların satın alınması üzrə müsabiqənin qalibi sözügedən şirkət olub və tərəflər 4 milyon 857 min 121 manata razılaşıblar. Eyni məzmunlu ikinci tenderin isə dəyəri 3 milyon 987 min 898 manat təşkil edib.
Onu da bildirək ki, “TEXNO LYUKS M” MMC 2022-2023-cü illərdə də yalnız ETN-in tenderlərinin qalibi olub. Bu barədə açıq mənbələrdə xeyli sayda məlumatlar var.
Bu gedişatdan belə başa düşüələn iki məqam var. Birincisi, ETN son bir ildə təkcə internetə 18 milyon 419 min 540 manat xərcləyib. İkincisi isə “TEXNO LYUKS M” MMC ilə hansısa gizli anlaşmanın olmasıdır. Çünki yalnız bir qurumun tenderlərini udan şirkət haqqında başqa təsəvvürün yaranması inandırıcı deyil.
Bildirək ki, nizamnamə kapitalı 50 manat olan “Texno Lyuks M” MMC-nin hüquqi ünvanı Bakı şəhəri, Nəsimi rayonu, 20 Yanvar, ev 24, m. 12 ünvanında yerləşir. Şirkət 2018-ci ildə yaradılıb. MMC-nin qanuni təmsilçisi Əliyev Emin Arif oğludur.
Qeyd edək ki, Emin Əliyev haqqında açıq mənbələrdə hər hansı geniş məlumat yoxdur. Tribunainfo.az-ın bu yöndə apardığı araşdırma zamanı belə bir ehtimal meydana çıxıb ki, “TEXNO LYUKS M” MMC-nin sahibinin atası dövlət vəzifəsində çalışır. Belə ki, Emin Əliyevlə Arif Əliyevin üst-üstə düşən məqamları var. Onlardan biri eyni ərazidə yaşamalarıdır.
Arif Əliyevin isə Əmək və Əhalinin Sosial Müdafiəsi Nazirliyinin Vətəndaşların qəbulu şöbəsinin müdiri işlədiyi açıq mənbələrdə mövcuddur. O, 2020-ci ildə dövlət başçısı tərəfindən “Dövlət qulluğunda fərqlənməyə görə” medalı ilə təltif də edilib.
Tərəfləri dinləməyə hazırıq.
