AAYDA-nın “Avtomobil Yollarının Mühafizə Xidməti” MMC-ti dövlət içində "dövlət" yaratmışdır
Baş Prokuror yanında Korrupsiyaya qarşı Mübarizə Baş İdarəsinin “Avtomobil Yollarının Mühafizə Xidməti” MMC-də iyunun 20-də keçirdiyi əməliyyatın bəzi yeni detalları ölkə ictimaiyyətinə məlum olub. Belə ki, əldə edilmiş məlumata görə MMC-nin vəzifəli şəxsinin göstərişi ilə respublikanın magistral yollarında hərəkət edən yük avtomobili sürücülərindən qeyri-qanuni vəsaitlər yığıb. "Avtomobil Yollarının Mühafizə Xidməti" MMC-nin əməkdaşları sürücülərdən pul qarşılığında qeyri-qanuni ödəniş qəbzləri də veriblər. Bunun əvəzində nəqliyyat vasitələrinin normadan artıq yük daşınması hallarına da göz yumublar.
O da məlum olub ki, bəzi icazə vərəqələrinin Nazirlər Kabinetinin 104 saylı qərarı ilə Rəqəmsal və İnkişaf Nazirliyi Azərbaycan Yerüstü Nəqliyyat Agentliyi ( AYNA) verməli olduğu halda, AAYDA-nın "Avtomobil Yollarının Mühafizə Xidməti" MMC -nin qanunsuz olaraq xarici, yerli və tranzit nəqliyyat vasitələri sürücülərindən, fiziki və ya hüquqi şəxslərdən 700 manat, 300 manat alaraq qanusuz olaraq saxta icazə vərəqələri tərtib ediblər. Yəni, Rəqəmsal və İnkişaf Nazirliyi strukturunun səlahiyyəti daxilində görəcəyi işi əsassız olaraq mənimsəyərək pul qazanmaqla məşğul olublar. Nəticədə, AAYDA-nın bu qanunsuz əməli dövlət içində dövlət yaratmış anlamı kimi başa düşülür.
Məsələdən agah olan DİN-nin Baş Dövlət Yol Polisi İdarəsi iyunun 20-də KİV vasitəsilə dərhal yükdaşıma ilə məşğul olanlara xəbərdarlıq etmişdir ki, "nəqliyyat vasitələrilə normadan artıq yük daşınması hallarının qanunvericiliyə zidd olması ilə bağlı dəfələrlə xəbərdarlıq edilməsinə baxmayaraq , müşahidələr göstərir ki, bəzi sürücülər tərəfindən analoji qayda pozuntularına yol verilməsi hallarına rast gəlinir."
Xəbər verilmişdir ki , çoxsaylı sürücülərin şikayətləri əsasında keçirilmiş xüsusi əməliyyat zamanı saxlanılan AAYDA -nın "Avtomobil Yollarının Mühafizə Xidməti" MMC-nin nəzarət şöbəsinin rəhbəri Fikrət Hüseynov istintaqa ilkin ifadəsində “Avtomobil Yollarının Mühafizə Xidməti” MMC-nin rəisi Səftər İsmayılovun əleyhinə ifadə verib. Yəni, tapşırığın rəisi S.İsmayılovdan aldığını etiraf etmişdir.
Hazırda prokururluq əməkdaşları qurumun rəhbər şəxsləri ilə bağlı araşdırmalar aparır və MMC-nin bir sıra rəhbər şəxsləri istintaqa cəlb olunub. Həmçinin MMC-nin bəzi istiqamətlərdə fəaliyyətlərinə müvəqqəti qadağa qoyulub.
FİKRƏT HÜSEYNOV
Mənbə bildirir ki, əslən Naxçıvan Muxtar Respublikasının Nehrəm kəndindən olan Səftər İsmayılov Prezident Administrasiyasının şöbə müdirlərindən birinin- daha dəqiq desək, Prezident Administrasiyasında Vətəndaşların müraciətləri ilə iş şöbəsinin müdiri Süleyman İsmayılovun yaxın qohumudur. O, 2008 -ci ildən indiyədək “Avtomobil Yollarının Mühafizə Xidməti” MMC-yə rəhbərlk edir.
Məlumata görə, ilkin araşdırmalar zamanı 800-ə yaxın əməkdaşı, bir çox bölgədə məntəqəsi olan MMC-nin nəzarət etdiyi sahələr üzrə çoxsaylı ciddi qanunsuzluqlar aşkarlanıb. Korrupsiya və rüşvətə yol verildiyini sübut edən çoxsaylı faktlar üzə çıxıb.
Belə ki, yolların mühafizə zolağına düşən tikililərə icazənin, ağır tonnajlı yükdaşıma ilə məşğul olan şirkətlərə lisenziyaların, yolun asfalt örtüyünün altından hansısa kommunikasiya xətlərinin keçirilməsi üçün icazələrin verilməsi bu MMC-nin səlahiyyətində olub. MMC rəhbərliyinin isə bu səlahiyyətlərdən sui-istifadə etdiyi, şəxsi maraqları naminə qanunsuzluqlara yol verdiyi bildirilir.
Qeyd edək ki, yolları dağıdan yük maşınlarına qarşı tədbir görülməsi əvəzinə uzun illər ərzində onlardan rüşvət alınaraq buna göz yumulub. Nəticədə isə ölkənin bütün magistral yolları bərbad vəziyyətə düşüb. Və yolların çəkilməsi üçün son 15 il ərzində Azərbaycan hökumətinin zəmanəti ilə beynəlxalq donor təşkilatlardan alınaraq AAYDA-ya bu təyinat üzrə verilmiş xarici kredit borcunun məbləği 3.4 mlrd-a çatmışdır.
Məsələnin digər tərəfini araşdırdıqda o da məlum olur ki, uzun müddətdir Azərbaycanın istər magistral, istərə də şəhər və kəndlərə çəkilmiş asfalt yolların tez sıradan çıxmasıilə bağlı dövrü mətbuatda və ayrı-ayrı vətəndaşlar tərəfindən dövlət başçısına göndərilən şikayətlərin qarşısı elə bu gün istintaq altında olan AAYDA-nın "Avtomobil Yollarının Mühafizə Xidməti" MMC-yə 2008-ci ildən rəhbərlik edən Səftər İsmayılovun yaxın qohumu olan və PA-da vətəndaşların müraciətlərilə iş şöbəsinin müdiri cənab Süleyman İsmayılov tərəfindən alınması da səbəb olmuşdur. Belə olmasaydı prezident cənab İlham Əliyev AAYDA strukturunda uzun müddət baş verən özbaşnalıqlar barəsində dərhal lazımi tədbirlər görərdi.
Qaldı ki, Baş Prokuror yanında Korrupsiyaya qarşı Mübarizə Baş İdarəsinin “Avtomobil Yollarının Mühafizə Xidməti” MMC-də iyunun 20-də keçirdiyi əməliyyatın nəticəsində başlanmış genişmiqyaslı araşdırmalar 3 ay bitdikdən sonra, yəni sentyabrın 20-də "Cinayət içinin başlanmasının rədd edilməsi" haqqında Qərar qəbul ediləcəkdir. Və təbii ki, bu möhtəşəm və nəticəsi əvvəlcədən bəlli olan QƏRAR cənab PA-nin şöbə müdiri Süleyman İsmayılovun müdaxiləsindən sonra qəbul ediləcəkdir. Yoxsa ki, PA-nın şöbə müdirinin yaxın qohumu cənab Səftar İsmayılovun çoxsaylı qanunpozuntusu əməllərinə görə həbs edilməsi təbii ki, indiki Azərbaycan reallığında mümkün olmayan bir işdir, elə deyilmi, cənablar? Necə deyərlər, yaşayarıq görərik!
Araşdırmada adları qeyd edilən şəxslərin mövqelərini dərc ediləcəkdir.
İFADETV.COM -un araşdırma qrupu
