Xəbər verdiyimiz kimi, maliyyə naziri Sahil Babayev Maliyyə Nazirliyi Aparatının rəhbəri Cavanşir Yusifovu vəzifəsindən azad edib. Onun bu qərarı müzakirələrə səbəb olub. Adətən yeni nazirlərin fəaliyyətə başlayanda ilk “islahatları” aparat rəhbərini dəyişmək olur.
Aparat rəhbəri vəzifəsi nədir? Onlar hansı işləri görür, nə kimi səlahiyyətləri olur?
Globalinfo.az-a danışan sabiq material ehtiyatları naziri Şəmsəddin Rəhimovun sözlərinə görə, əslində, aparat rəhbəri nazirlik daxilində əlaqələndirici funksiyanı yerinə yetirir.
O deyib ki, aparat rəhbəri əsasən nazirin tapşırıqlarını icra edir:
“İstər əməkdaşlarla bağlı, istərsə də digər tapşırıqlar olsun, onu aparat rəhbəri yerinə yetirir. Eyni zamanda ola bilir ki, həmin nazir başqa nazirliklərə özü zəng etmir, bunu aparat rəhbərinin xətti ilə həyata keçirir. Fikrimcə, hər bir nazir ətrafında öz adamını görmək istəyir. Bilirsiniz, inamdan da çox şey asılıdır. Əgər yeni nazir köhnə kadra, aparat rəhbərinə inanırsa, onu işdə saxlaya bilər. İnam yoxdursa, mütləq onu yola salırlar”.
AĞ partiya başqanı Tural Abbaslının fikrincə, aparat rəhbərliyi hər nazirliyin əsas və strateji obyektidir:
“Demək olar ki, bütün işləri aparat rəhbərləri görür. Məsələn, qərara alınan işlərin icrası, nəzarəti, mexanizmi, strukturu və s. hamısını aparat rəhbərləri həyata keçirir. Dolayısı ilə nazir və müavinləri siyasi qərar verən orqandılar və onlar nələrəsə qərar verirlər, amma həmin qərarların icrası ilə artıq aparat məşğul olur. Yəni nazirliyin əsas “əli” aparatdır.
T.Abbaslı deyib ki, istənilən nazirin vəzifəyə gələndə öz adamı ilə işləmək istəməsi anlaşılandır:
“Təbii ki, təcrübəli aparat rəhbərləri adətən işdə saxlanılır. Çünki mexanizmi bilirlər, nazirliyin strukturundan xəbərdardırlar. Ona görə də təcrübə lazım olur. Bundan başqa, yeni təyin olunan aparat rəhbərləri adətən köhnə rəhbərləri ilə koordinasiyalı bir müddət işləyirlər ki, strukturun detallarını daha yaxşı öyrənsinlər”.
