Hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...
Məlum olduğu kimi, on gün əvvəl Qax Rayon İcra Hakimiyyətinin başçısı Musa Şəkiliyev və birinci müavini də daxil rayonun bir neçə vəzifəli şəxsi DTX-nın keçirdiyi əməliyyatla saxlanıldı. Və bir gün sonra barələrində həbs qətiimkan tədbiri seçildi. İlkin açıqlamaya görə o, qulluq mövqeyindən sui-istifadə etməklə, xüsusilə külli miqdarda dövlət əmlakını mənimsəmə cinayətində ittiham olunur...
Bu arada mediada son illərdə Qax rayonunda keçirilən tenderlərə diqqət çəkildi. Məlum oldu ki, Qax rayon İcra Hakimiyyətinin tenderlərinin ənənəvi “qalib”lərindən biri “RENAT-R” MMC adlı şirkətdir. 2013-cü ildə qeydiyyatdan keçən bu şirkət indiyədək abadlıq və təmir-tikinti işləri adı ilə 1 milyon manata yaxın dövlət satınalmasının qalibi olub. Çox güman ki, istintaq prosesində bu fakt diqqətdən kənarda qalmayacaq...
***
Yazıya bu faktlarla girişimiz təsadüf deyil. Təəssüf ki, bu və bunaqədərki olaylara baxmayaraq hələ də, əksər dövlət qurumlarının satınalmalarından müəyyən suallar boylanır. Qax rayonuna qonşu sayıla biləcək Balakən Rayon İcra Hakimiyyətinin başçısının Balakən Şəhər İnzibati Ərazi Dairəsi Üzrə Nümayəndəliyində olduğu kimi...
Xatırladaq ki, Balakən Rayon İcra Hakimiyyətinin başçısının Balakən Şəhər İnzibati Ərazi Dairəsi Üzrə Nümayəndəliyi daha bir tenderi yekunlaşdırıb. 20.06.2025-ci il tarixdə Nümayəndəlik "KM SERVİCES" Məhdud Məsuliyyətli Cəmiyyəti (MMC) ilə müqavilə bağlayıb. Bu müqavilə ilə Balakən Rayon İcra Hakimiyyətinin başçısının Balakən Şəhər İnzibati Ərazi Dairəsi Üzrə Nümayəndəliyi Balakən şəhərində aparılacaq abadlıq və təmir işləri üçün mal-materialların alınması qarışılığında "KM SERVİCES" MMC-nə 85.059 manat ödəməli olacaq.
İlk baxışdan heç bir qeyri-adilik müşahidə edilməsə də, balakənli oxucularımızın Yenixeber.org-a ötürdüyü məlumatlar müəyyən araşdırmaları zərurətə çevirir...
Əvvəla, nə karədisrə Balakən rayon mərkəzinin abadlaşması adı ilə keçirilən tenderlər az qala ədədi silsilə şəkilini alsın. Ötən illərdə şəhər yollarının, binaların təmiri adı ilə müxtəlif, həm də az sayılmayacaq məbləğlə tenderlər keçirilib, dövlətin puluna xəsislik edilməyib(?)
Bu əməkdaşlıqda diqqət çəkən vacib faktor Balakən Rayon İcra Hakimiyyətinin başçısının Balakən Şəhər İnzibati Ərazi Dairəsi Üzrə Nümayəndəliyinin dövlət vəsaitini etbar etdiyi "KM SERVİCES" MMC ilə bağlıdır. Heç də az məbləğ olmayan dövlətin pulunun etibar edildiyi bu şirkətin nəinki Veb-saytı yoxdur, ümumiyyətlə internet üzərindən hansısa əlaqə vasitəsinə rast gəlmək mümkünsüzdür(?)
Məlum olduğu kimi, “Dövlət Satınalmaları Haqqında” Azərbaycan Respublikasının Qaununda (maddə:23) təchizatçı tərəfin üzərinə müvafiq sahədə peşəkarlıq və təcrübə, maliyyə imkanları və ödəmə qabiliyyətinin olması, texniki imkanlarının və maddi-texniki bazasının olması, müvafiq tələblərə cavab verən işçi qüvvəsinin olması və s. kimi öhdəliklər qoyulur.
Belə olan halda yumşaq desək "KM SERVİCES"MMC-nin fəaliyyəti ciddi şübhələrə yol açır, suallar doğurur... Necə olur ki, “izi-tozu bilinməyən” bir şirkətə Balakən Rayon İcra Hakimiyyətinin başçısının Balakən Şəhər İnzibati Ərazi Dairəsi Üzrə Nümayəndəsi Telman Bayramov dövlətin pulunu etibar edir? Əlaqə telefonu belə olmayan şirkətin, yuxarıda sadaladığımız imkanlara malik olması nə dərəcədə mümkündür? Telman Bayramovun bu şirkəti “gündüz çıraqla tapması” hansı səbəb və maraqlardan qaynaqlanır? Və s.
Bəzən elə belə olur, dövlətin pulu şəxsi maraqların predmetinə çevriləndə daha çox tanınmayan, heç bir ünvanı, əlaqə vasitəsi olmayan şirkətlər “yada düşür”...
Digər diqqət çəkən məqam isə tərəflər arasında bağlanmış müqavilə ilə bağlı Dövlət Satınalmaların Vahid İnternet Portalının “Ətraflı” bölməsində alınacaq malların, görüləcək işlərin hər birinin qiymətinin göstərilməməsidir(?)
Biləsuvarda iki şübhəli tender: 2 il əvvəl təmir olunan yollar yenidən niyə təmir olunur?
[center]
[/center]
***
İnternet üzərindən apardığımız araşdırmalarla "KM SERVİCES" MMC ilə bağlı maraqlı məlumatlar əldə edə bildik. Bu istiqamətdə xüsusi ilə diqqət çəkən faktor isə şirkətin “hərşeyşünas” adlandırılması ilə bağlıdır...Şirkətin adı tikinti materiallarının alınması, yol çəkilişi və elektrik malları ilə təminat kimi ən müxtəlif işlərdən keçir.
Bu şirkətin nə zaman, hansı ünvanda təsis edilməyi ilə bağlı məlumat yoxdur. İnternet resurslarında isə yalnız baş mühasib Dinar Mustafayevin adı keçir. Amma onun da haqqında geniş məlumat yoxdur.
Sözügedən şirkət vaxtı ilə 3 gündə iki tender udub. Onlardan biri Mingəçevir Mənzil-Kommunal Təsərrüfat Birliyi ilə bağlanmış satınalma müqaviləsidir. Həmin müqaviləyə əsasən MMC MKTB üçün 2024-cü ildə mal-materialların satınalınmasını qarışılığında şirkətə 215.266,37 manat ödənilib.
Amma şirkət ölkənin bu başında satınalma işlərini həyata keçirdiyi bir vaxtda, ölkənin o biri başında, yəni Naxçıvanda yol çəkməyi üzərinə götürüb. “Culfa” Yol-Təmir İstismar MMC ilə bağlanılmış satınalma müqaviləsinə də tikinti mal-materialları… Tərəflər arasında 254.181,01 manatlıq müqavilə bağlanıb.
Lakin “KM SERVİCES” təkcə yol çəkib, tikinti materialları almaqla kifayətlənmir. O, həmçinin elektrik malları bazarında da “gücünü” sınayıb. Şirkətin “Bakı Metropoliteni” ilə bağladığı müqavilədən də bu aydın görünür. Məsələ belədir ki, “KM SERVİCES” MMC metropoliten üçün elektrik mühərrikləri üçün sarğı materialların satın alınmasını reallaşdırıb. Bu zaman şirkətə 133 008.96 manat ödənilib.
***
Biz Yenixeber.org olaraq hər iki tərəfdən – həm Balakən Şəhər İnzibati Ərazi Dairəsi Üzrə Nümayəndəlikdən, həm də "KM SERVİCES" MMC-dən müəyyən suallarımıza cavab almaq istədik.
Qeyd etdiyimiz kimi, "KM SERVİCES" MMC-nin heç bir əlaqə vasitəsinə rast gəlmədiyimizdən bu istəyimiz alınmadı...
Balakən Rayon İcra Hakimiyyəti başçısının Balakən Şəhər İnzibati Ərazi Dairəsi Üzrə Nümayəndəsi cənab Telman Bayramova isə 7 sualdan ibarət online sorğu ünvanladıq...Telman müəllimin müavini, həm də tender komissiyasının sədri İlham Kaltayevlə də telefonla danışdıq. Nəhayət sörğumuza “cavab” aldıq.
“Cavab” sözünü səbəbsiz dırnaqda yazmadıq. Günlər sonra Telman Bayramovun imzası ilə redaksiyamıza daxil olan məktubda 7 sualımızdan heç birinə cavab yer almır. Sadəcə “Dövlər satınalmaları haqqında” qanunun müəyyən maddələri xatırlanır...
[center]
[/center]
***
Hörmətli qurum rəsmisinə və bu mövzuda məlumatı az olanlara xatırladaq ki, Azərbaycan Respublikası “Dövlət Satınalmaları Haqqında Qaununu”n 20.1-ci maddəsində göstərilir ki, Satınalma komissiyasının tərkibi bu qnunun 21.2-ci maddəsinin tələbləri nəzərə alınmaqla tək sayda (azı 5 (beş) nəfər) olmaqla, satınalan təşkilatın nümayəndələrindən formalaşdırılır. Satınalma komissiyasının sədrini və üzvlərini satınalan təşkilatın rəhbəri təsdiq edir. Satınalan təşkilatın rəhbəri satınalma komissiyasının sədri ola bilməz.
Təchizatçının Lisenziya və ya icazəsi ilə də bağlı Qanunun 23.3.2-ci maddəsində göstərilir ki, “Lisenziyalar və icazələr haqqında” Azərbaycan Respublikasının Qanunu ilə tələb olunduqda, müvafiq sahibkarlıq fəaliyyətinin həyata keçirilməsi və ya müəyyən hərəkətlərin yerinə yetirilməsi üçün müvafiq lisenziyaya və ya icazəyə malik olması...
Eləcə də digər maddələrdə Təchizatçı ilə bağlı bir sıra tələblər sadalanır: satınalma müqaviləsinin icrası üçün müvafiq sahədə peşəkarlığının və təcrübəsinin olması, satınalma müqaviləsinin icrası üçün maliyyə imkanlarının və ödəmə qabiliyyətinin olması, texniki imkanlarının və maddi-texniki bazasının olması, müvafiq tələblərə cavab verən işçi qüvvəsinin olması...
***
Cənab Telman Bayramova xatırlatmaqda fayda var ki, hər bir Azərbaycan insanı vergiləri sayəsində formalaşan büdcə vəsaitinin necə xərcləndiyini bilməlidir. Bu onun haqqı və hüququdur...
Dövlət büdcəsi kiminsə şəxsi fondu deyil ki, ölkə ictimaiyyəti və aidiyyatı dövlət orqanları tərəfindən bir o qədər də, maraqlı görünməsin...
Təəssüf ki, hələ də, bəzi səlahiyyət sahibləri medianın sorğusuna cavab verməyin vəzifə borclarından biri olduğunu ya bilmir, ya da bilmək istəmirlər. Həm də onu bilmək istəmirlər ki, heç bir vəzifə sahibi bir gün “qapısının döyülmədən açılacağından” sığortalanmayıb...
Sonda onu da xatırladaq ki, Balakən Rayon İcra Hakimiyyətinin başçısı İslam Rzayevdir. (Yenixeber.org)
Mövzunun davamı olacaq.
[center]
[/center]
[b]İslam Rzayev[/b]
